نۇرسۇلتان نازاربايەۆ استاناعا قاتىسى جوق ادامداردىڭ ەسىمى بەرىلگەن كوشەلەردىڭ اتىن اۋىستىرۋدى تاپسىردى دەپ، حابارلايدى Qamshy.kz اقپارات اگەنتتىگى.
«استاناداعى كوشە اتاۋلارى ادامدى اداستىرادى. ءبىر كوشە، ءبىر كوشەنىڭ ءار جەرىندە ءتۇرلى اتاۋلار. مۇحامەدحانوۆ، سارايشىق، قوشقاربايەۆ - ءبىر كوشە بولسا، ورىنبور، سىعاناق، قالداياقوۆ - باسقا كوشە، مۇنىكىم بۇلاي جاساعان؟ پوشتاشىنىڭ ءوزى شاتاسادى. كوشە اتاۋلارىن رەتكە كەلتىرۋدى تاپسىرىپ ەدىم عوي. بۇل اتاۋلاردى كىم بەرگەن، بىلمەيمىن. ادىلبەك رىسكەلدى ۇلى ما، الدە وعان دەيىنگىلەر مە؟ قالاي بولسا سولاي. قالاعا، ءتىپتى، ەلگە بۇل ادامنىڭ قاتىسى بار ما، جوق پا؟، - دەدى نۇرسۇلتان نازاربايەۆ.
استانا اكىمىنىڭ ورىنباسارى ەرمەك امانشايەۆ ونوماستيكالىق كوميسسيانىڭ قۇرامىنا تانىمال عالىمدار مەن تاريحشىلار كىرەتىنىن ايتتى.
«ولار نە تۇسىنەدى؟ ءبىز قالادا تۇرامىز. ەگەر ادامنىڭ اتىن بەرمەسەڭ، نومىرلە. 13-داڭعىل دەپ، وسىلاي دۇرىس ەمەس پە؟ مىسالى، ءقازىر ۆاشينگتوندا بارلىق كوشە ءنومىر بويىنشا عانا جۇيەلەنگەن. مەن مۇنىڭ نە ەكەنىنەن بەيحابارمىن. ءبىر كەزدەرى تاسماعانبەتوۆكە (كوشەلەرگە - رەد.) سارايشىق، سىعاناق سياقتى تاريحي استانالاردىڭ ەسىمىن بەرۋگە رۇقسات ەتكەنمىن»، - دەيدى پرەزيدەنت.
سونىمەن بىرگە نۇرسۇلتان نازاربايەۆ استاناداعى كوشەلەردىڭ بىرىنە اتى بەرىلگەن مۇحامەدحانوۆ دەگەن ادامنىڭ كىم ەكەنىن سۇرادى.
«تانىمال اكادەميك، ابايتانۋدىڭ نەگىزىن قالاۋشىلاردىڭ ءبىرى»، - دەپ جاۋاپ بەردى ەرمەك امانشايەۆ.
«ابايتانۋشى، اۋەزوۆتانۋشى، تاعى بىردەڭە ... تانۋشى. استانا كوشەلەرىنە ءبارىنىڭ ەسىمىن بەرە بەرەسىڭ بە؟ ونىڭ قالاعا قانداي قاتىسى بار؟» - دەدى نازاربايەۆ.
«استاناعا قاتىسى جوق ادامداردىڭ ەسىمى بەرىلگەن كوشەلەردىڭ اتىن اۋىستىرىڭدار. ادامداردى شاتاستىرىپ، كوشە اتتارىن اۋىستىرا بەرگەننەن پايدا جوق، ءبىراق سوندا دا ءتارتىپ ورناتىڭدار. تاعى قايتالاپ ايتامىن، كوشەلەردى نومىرلەي سالىڭدار، بولدى، - دەدى پرەزيدەنت.
