ۇلتتىق بانك ءتوراعاسى دانيار اقىشيەۆ قازاقستاندىقتارعا ۆاليۋتا نارىعىنا قاتىستى ويلانباي شەشىم قابىلداماۋعا كەڭەس بەردى، - دەپ حابارلايدى Tengrinews.kz.

ۇلتتىق بانك باسشىسى سوڭعى كۇندەرى ايىرباستاۋ باعامىنىڭ اۋىتقىعانىن اتاپ ءوتتى.

— ناتيجەسىندە رەسەي ءرۋبلىنىڭ السىرەۋى اپتانىڭ باسىنان باستاپ شامامەن 10 پايىز بولدى. رەسەي فەدەراسياسى -قازاقستاننىڭ نەگىزگى ساۋدا ارىپتەسى. ەكى ەل ەۋرازيالىق ەكونوميكالىق وداقتىڭ قاتىسۋشىلارى بولىپ تابىلادى. بۇل ەكى ەلدەگى پروسەستەردىڭ ءوزارا تاۋەلدىلىگىن بىلدىرەدى. ناتيجەسىندە تەڭگە ەكى كۇن (9 جانە 10 ساۋىردە) ىشىندە 1،8 پايىزعا السىرەدى، - دەپ حابارلادى اقىشيەۆ.

سونداي-اق، ق ر ۇلتتىق بانكىنىڭ ءتوراعاسى قازاقستان مەن رەسەيدىڭ ۇلتتىق ۆاليۋتالارىنىڭ السىرەۋ قارقىنىنداعى ايىرما، بىرىنشىدەن، قازاقستانعا اقش سانكسيالارىنىڭ قولدانىلمايتىنىنا بايلانىستى ەكەندىگىن اتاپ ءوتتى. ەكىنشىدەن، اقىشيەۆتىڭ ايتۋىنشا، رەسەي ءرۋبلى تەڭگەگە اسەر ەتەتىن ماڭىزدى، ءبىراق جالعىز فاكتور ەمەس.

— قازاقستاننىڭ ماكروەكونوميكالىق كورسەتكىشتەرى تۇراقتى. مۇنايعا باعا ءبىر باررەل ءۇشىن 70 اقش دوللارىن قۇرايدى. ەكونوميكالىق ءوسۋ قارقىندارى جوعارى. تولەم بالانسىنداعى احۋال جاقسارۋدا. ينفلياسيا نىسانالى ءدالىز شەگىندە. الەمدىك شيكىزات نارىقتارىندا تۇراقتىلىق بولعان جاعدايدا قازاقستان ەكونوميكاسى ءۇشىن تاۋەكەلدەر شامالى دەپ باعالانادى. ۇشىنشىدەن، قازاقستان قور نارىعىنىڭ رەسەي نارىعىمەن سالىستىرعاندا وتىمدىلىگى جوعارى ەمەس. ونىڭ جاھاندىق قارجى نارىقتارىنا ىقپالداسۋى از. تيىسىنشە، قازاقستان مەن رەسەيدەگى احۋال ءار ءتۇرلى، - دەيدى اقىشيەۆ.

سونىمەن قاتار بانك ءتوراعاسى اقش-تىڭ نەمەسە باسقا ەلدەردىڭ رەسەيگە قاتىستى ىقتيمال ارەكەتتەرىنەن رەسەيدىڭ قارجى نارىعىندا شيەلەنىستىڭ جالعاسۋى ىقتيمال ەكەندىگىن ايتتى.

بۇل قىسقا مەرزىمدى بولاشاقتا تەڭگەنىڭ قۇبىلمالىلىعىن ساقتاۋعا اپارادى.

— قازاقستاننىڭ بارىنشا جاقسى ماكروەكونوميكالىق كورسەتكىشتەرىن ەسكەرە وتىرىپ، تەڭگەنىڭ قۇبىلۋى السىرەۋ جاعىنا دا، نىعايۋ جاعىنا قاراي دا ورىن الۋى مۇمكىن. باعامنىڭ اعىمداعى قۇبىلمالىلىعىنىڭ نارىقتىق جانە پسيحولوگيالىق سيپاتى بار. ايتارلىقتاي اۋىتقۋ كەزەڭىندە اكتيۆتەردى شۇعىل اۋىستىرۋ كەيىننەن ەداۋىر شىعىندارعا اپارۋى مۇمكىن، - دەپ قورىتىندىلادى ق ر ۇلتتىق بانكىنىڭ ءتوراعاسى.