مەكسيكالىق بوكسشى ساۋل الۆارەسكە وتا جاسالدى، دەپ xابارلايدى Qamshy.kz اقپارات اگەنتتىگى
بوكسشى ءوزىنىڭ ينستاگرام پاراقشاسىنا فوتوسىن جاريالاپ جانە جاسالعان وتا تۋرالى ايتتى. ونىڭ سوزىنە قاراعاندا، شەمىرشەكتى قالپىنا كەلتىرۋ ءۇشىن تىزەنىڭ ارتروسكوپياسى جاسالعان.
«3-4 اپتادان كەيىن قۇلان-تازا جازىلىپ شىعامىن»، - دەپ جازدى الۆارەس. ال مەكسيكالىق بوكسشىنىڭ پروموۋتەرى ەريك گومەستىڭ ايتۋىنشا، الۆارەستىڭ تىزەسىندە ىسىك بولعان. وتا كەزىندە سونى الىپ تاستادى.
«بۇل جاراقات ەمەس. گولوۆكينگە قارسى جەكپە-جەك وتپەيتىن بولعاننان كەيىن وتا جاساۋعا شەشىم قابىلداندى. ايتپەسە، ساۋلدىڭ مازاسى كەتىپ جۇرگەن. 5 مامىردا ريەۆانش بولعان كۇندە دە ول بوكستاسۋعا دايىن ەدى. تىزەسىنە قاتتى زاقىم كەلمەگەن»، - دەدى گومەس.
ايتا كەتەيىك، ناۋرىزدىڭ باسىندا ساۋل الۆارەس "كلەنبۋتەرول" اتتى دوپينگ قولدانعانى ءۇشىن ايىپتالدى. سەبەبى اقپان ايىنداعى ەكى سىناماسى وڭ ناتيجە كورسەتتى. وسىدان كەيىن اقش-تىڭ نيەۆادا شتاتىنىڭ اتلەتيكالىق كوميسسياسى وعان جەكپە-جەكتەرگە قاتىسۋعا تىيىم سالدى. 18 ساۋىردە نەگىزگى تىڭداۋلار وتەدى. سول كەزدە مەكسيكالىق بوكسشى دوپينگتى ادەيى قولدانباعانىن دالەلدەۋى ءتيىس. تىڭداۋلار ءالى وتپەسە دە، ساۋل الۆارەستىڭ كومانداسى 5 مامىر كۇنگى ريەۆانشتان باس تارتتى. گەنناديي گولوۆكين بولسا، وسى كۇنگە قارسىلاس تابا الماي ءجۇر.
