بۇگىن اباي اتىنداعى ۇلتتىق پەدوگوگيكالىق ۋنيۆەرسيتەتىنىڭ فيلولوگيا فاكۋلتەتىندە "ءلاتيپا ءلۇپىلى"، "ماڭگىلىك مەكەن"، "كۇناسىز مەكەن"، "سەنىڭ ارقاڭ" جىر جيناقتارىنىڭ اۆتورى، ق ر جازۋشىلار وداعى مەن ق ر جۋرناليستەر وداعىنىڭ مۇشەسى، اقىن، اۋدارماشى داۋلەتبەك بايتۇرسىن ۇلىمەن كەزدەسۋ ءوتتى، - دەپ حابارلايدى Qamshy.kz پورتالى.

كەشتىڭ مودۋلياتورى- بەلگىلى ادەبيەتتانۋشى، عالىم، فيلولوگيا عىلىمدارىنىڭ دوكتورى تەمىرحان تەبەگەنوۆ. اقىننىڭ شىعارماشىلىعى، ءومىر جولى مەن ولەڭى تۋرالى سىرلى دا ساليقالى سۇحباتقا اباي اتىنداعى پەدوگوگيكالىق ۋنيۆەرسيتەتىنىڭ ستۋدەنتتەرى تەگىس جينالعان. اقىن پوەزياسىنا، ونداعى "ماڭگىلىك اقيقات" يدەولوگياسىن شىن تۇسىنگەن، ولەڭنىڭ قۇدىرەتىن باعالايتىن قاۋىمنىڭ قاراسى مول بولعانىنىڭ ايقىن كورىنىسى-زالدا ينە شانشار ورىن بولماعانىندا. ءتىپتى، ستۋدەنتتەر اقىننىڭ ولەڭدەرىن مانەرىنە كەلتىرىپ وقىسا، اقىننىڭ جولىن قۋۋشى شاكىرتتەرى داۋلەتبەك بايتۇرسىنۇلىنا ارناعان جۇرەك جاردى ولەڭدەرىن ارنادى. سونداي-اق، جاستار اقىننىڭ سوزىنە جازىلعان اندەردى ناقىشىنا كەلتىرىپ، ءبىرى دومبىرامەن، ەندى ءبىرى گيتارامەن شىرقادى.

كەشكە داۋلەتبەك بايتۇرسىن ۇلىنىڭ ومىردەگى جانە ولەڭدەگى ىنىلەرى دە كەلگەن. كەش بارىسىندا ءسوز العان اقىن، "سەرپەر" سىيلىعىنىڭ يەگەرى سايات قامشىگەر، جازۋشى سەرىكبول حاسان، جازۋشى ەربولات ابىكەن ۇلى، اقىن تەمىرلان جوراباي ت.ب. داۋلەتبەك بايتۇرسىن ۇلى تۋرالى باياندامالار جاساپ، اقىننىڭ اقىندىقتان بولەك اعالىق قاسيەتىن اتاپ ءوتتى. سونىمەن قاتار، اقىننىڭ قالامگەر ىنىلەرى داۋلەتبەك بايتۇرسىن ۇلى تۋرالى قىزىقتى ەستەلىكتەرىمەن ءبولىستى. اقىن، داۋلەتبەك بايتۇرسىنۇلىمەن وتكەن ادەبي-سازدى كەشتىڭ سوڭىندا اقىن "سەنىڭ ارقاڭ"، "جورگەم"، "ماڭگىلىك مەكەن" كىتاپتارىن جاس وقىرماندارعا قولتاڭباسىمەن تاپسىردى.