وڭتۇستىك قازاقستان وبلىسىنىڭ ونەرپازدارى وسى جىلدىڭ ءساۋىر مەن ناۋرىز ايلارىندا  ەۋروپا مەن ازيانىڭ  9 مەملەكەتىندە 22 كونسەرت قويدى. بۇل تۋرالى وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا وبلىستىق مادەنيەت جانە تىلدەردى دامىتۋ باسقارماسىنىڭ مادەنيەت جانە ونەر ءبولىمىنىڭ باسشىسى عاليا شارافييەۆا ءمالىم ەتتى.

«ەلباسىنىڭ «بولاشاققا باعدار: رۋحاني جاڭعىرۋ» ماقالاسى اياسىندا تۇركسوي ۇيىمىنىڭ ۇيىمداستىرۋىمەن ناۋرىز مەرەكەسىنە ارنالعان كونسەرتتىك باعدارلامامەن شەتەلدە وڭىردەگى  ش.قالداياقوۆ اتىنداعى وبلىستىق فيلارمونيانىڭ ارتىستەرى مەن حالىقارالىق بي بايقاۋلاردا جۇلدەلى ورىندارعا يە بولىپ جۇرگەن «قازىنا» بي ءانسامبلى جانە تۇركىستاندىق «سەمسەر» توبى ونەر كورسەتتى. ولار ەۋروپاداعى بوسنيا جانە گەرسەگوۆينانىڭ زەنيسا، سارايەۆو، موستار قالالارىندا، چەرنوگوريانىڭ سەتينە، البانيانىڭ تيرانا، ماكەدونيانىڭ گوستيۆار، بولگاريانىڭ پلوۆديۆ جانە سوفيا قالالارىندا بولدى. ال وبلىستىق وپەرا جانە بالەت تەاترىنىڭ سوليستەرى مەن مادەنيەت جانە حالىق شىعارماشىلىعىنىڭ ارتىستەرى فينليانديا، شۆەسيا، ەستونيا ەلدەرىندە ونەر كورسەتتى»،-دەدى ع.شارافييەۆا.

سونىمەن قاتار، باسپا ءسوز كونفەرەنسياسىندا ءسوز العان  حالىقارالىق تۇركسوي ۇيىمىنىڭ رەجيسسەرى ارمان نۇرماحامات ۇلى تۇركيا ەلىندە ناۋرىز ايىندا وتكەن «كاستامونۋ - تۇركى الەمىنىڭ مادەني استاناسى» جىلىنىڭ اشىلۋ سالتاناتىنا وبلىس اكىمىنىڭ قولداۋىمەن بارىپ قايتقانىن اتاپ ءوتتى.

«ءار ەلدەن كەلگەن ونەرپاز ءوز ءداستۇرىن، ءتىلى مەن ءدىلىن ونەر ارقىلى ناسيحاتتاپ، تۋىستىعى بەرىك تۇركى ەلىنە شۋاعىن شاشتى. وندا وڭتۇستىك ونەرپازدارى «سارىارقا» انىمەن كاستامونۋ كوگىن انمەن تەربەتىپ، «بابالار رۋحى» انىمەن ەل نامىسىن تۋ ەتە اسقاقتاتقان «سەمسەر» توبىنىڭ جىگىتتەرى  ەل ىقىلاسىنا بولەندى. ورنەكتى بيىمەن حالىقارالىق جۇلدەلەردى قانجىعاسىنا بايلاپ جۇرگەن «قازىنا» بي ءانسامبلىنىڭ ءاربىر قيمىلى پاتريوتتىق رۋحپەن ۇندەسىپ، تاتۋلىق پەن بەرەكە-بىرلىكتى پاش ەتتى. بۇدان بولەك، اتالعان ونەر مايتالماندارى تۇركيانىڭ كاستامونۋ، انكارا، ىستامبۇل قالالارىنىڭ تۇرعىندارىنا كونسەرتتىك باعدارلاما ۇسىندى»،-دەدى ارمان نۇرماحامات ۇلى.

بۇدان بولەك، سپيكەرلەر ەلباسىنىڭ «بولاشاققا باعدار: رۋحاني جاڭعىرۋ» ماقالاسى مەن استانانىڭ 20 جىلدىعىنا وراي  وڭىردە وبلىستىق «بۇراڭ بەل» بي فەستيۆالى جانە «قازىنا» بي ءانسامبلىنىڭ 30 جىلدىعىنا ارنالعان «دالا رۋحى» مەرەيتويلىق كونسەرتى وتەتىنىن ايتتى.