25 ساۋىردە الماتى قالاسى مامانداندىرىلعان اۋدانارالىق ەكونوميكالىق سوتىنىڭ «Delta Bank» اق جۇمىسىن ءماجبۇرلى تۇردە توقتاتۋ تۋرالى سوت شەشىمى كۇشىنە ەندى. بۇل تۋرالى Qamshy.kz اقپارات اگەنتتىگى قازاقستاننىڭ دەپوزيتتەرگە كەپىلدىك بەرۋ قورىنىڭ باسپا ءسوز قىزمەتىنە سىلتەمە جاساپ حابارلايدى.
وسىلايشا بانكتىڭ كليەنتتەرى مەن ۇلەسكەرلەرى — جەكە تۇلعالار اعىمداعى شوتى مەن تولەم كارتالارىنداعى سومانى قايتارۋعا قۇقىلى. ناقتىراق ايتقاندا، ولار 10 ميلليون تەڭگەگە دەيىن قارجىنى ۇلتتىق ۆاليۋتادا، 5 ميلليون تەڭگەگە دەيىنگى سومانى شەتەل ۆاليۋتاسىندا قايتارىپ الا الادى.
تولەمدى قايتارۋ «بانك سەنتركرەديت» اق ارقىلى قازاقستاننىڭ دەپوزيتتەرگە كەپىلدىك بەرۋ قورىنىڭ قاراجاتى ەسەبىنەن وتەلەتىن بولادى. بانك-اگەنت كەپىلدەندىرگەن تولەمدى وتەۋدى 2018 جىلدىڭ 17 مامىرىنان باستايدى.
كەپىلدەندىرگەن تولەمدى وتەۋ بويىنشا قدكبق مىندەتتەمەسىنىڭ سوماسى 141 ميلليون تەڭگەگە تەڭ؛ كليەنتتەردىڭ سانى - تولەمگە قۇقىلى جەكە تۇلعالاردىڭ سانى — 2 244 ادام.
كەپىلدەندىرىلگەن تولەمدى قايتارۋعا ارنالعان قدكبق-نىڭ جالپى مولشەرى 577،6 ميلليارد تەڭگەنى قۇرايدى.
سونىمەن بىرگە كەپىلدەندىرىلگەن سومادان كوپ اقشا سالعان جەكە جانە زاڭدى تۇلعالار بانك اكتيۆتەرىن وتكىزۋ بارىسىندا ءتارتىپ بويىنشا كەزەكپەن قازاقستان رەسپۋبليكاسىنىڭ بانك جانە بانك جۇمىسى تۋرالى زاڭناماسىنا سايكەس، «Delta Bank» اق-تىڭ ليكۆيداسيالىق كوميسسياسىنان ءوز بەرەشەگىن الۋعا قۇقىلى.
ەسكە سالا كەتسەك، «Delta Bank» اق بانككە قاتىستى جانە وزگە دە وپەراسيالار بويىنشا ق ر ۇلتتىق بانك باسقارماسىنىڭ قاۋلىسىمەن 2017 جىلدىڭ 3 قاراشاسىندا ليسەنزيادان ايىرىلعان بولاتىن. ۇلتتىق بانك ءتوراعاسىنىڭ بۇيرىعىمەن «Delta Bank» باسقارۋ ورگانىنىڭ بارلىق قۇزىرەتى ۋاقىتشا اكىمشىلىككە بەرىلگەن ەدى. ۋاقىتشا اكىمشىلىكتىڭ قۇرامىنا ۇلتتىق بانك پەن «قازاقستاننىڭ دەپوزيتتەرگە كەپىلدىك بەرۋ قورىنىڭ» قىزمەتكەرلەرى ەنگەن. «Delta Bank» اق-نىڭ جۇمىسىن ءماجبۇرلى تۇردە توقتاتۋ تۋرالى شەشىمدى الماتى قالاسى مامانداندىرىلعان اۋدانارالىق ەكونوميكالىق سوتى 2018 جىلدىڭ 13 اقپانىندا شىعارعان بولاتىن.
قازاقستاننىڭ دەپوزيتتەرگە كەپىلدىك بەرۋ قورى — 1999 جىلى ەكىنشى دەڭگەيلى بانكتەردىڭ زاڭدى مۇددەسى مەن قۇقىعىن قورعاۋ ءۇشىن قۇرىلعان ۇلتتىق بانكتىڭ ۇيىمى بولىپ تابىلادى.
پىكىر قالدىرۋ