استانادا «بولاشاق ماماندىقتارى: Y، Z ۇرپاقتارى قانداي باعىتقا دايىن بولۋى كەرەك؟» تاقىرىبىندا رەسپۋبليكالىق عىلىمي-پراكتيكالىق كونفەرەنسيا ءوتتى. شاراعا ق ر ءدىن ىستەرى جانە ازاماتتىق قوعام ءمينيسترى دارحان كالەتايەۆ قاتىسىپ، پرەزيدەنتتىڭ بەس الەۋمەتتىك باستاماسىنىڭ جاستار ساياساتى ماسەلەلەرىن شەشۋدەگى ماڭىزىن اتادى.

شارا «جاستار» عىلىمي-زەرتتەۋ ورتالىعىنىڭ 5 جىلدىعىنا وراي ۇيىمداستىرىلىپ وتىر. ول 2013 جىلى ەلباسىنىڭ قازاقستان حالقى اسسامبلەياسىنىڭ XIX سەسسياسىندا بەرگەن تاپسىرماسىنا سايكەس قۇرىلعان.

كونفەرەنسيانىڭ ماقساتى - جاستاردىڭ وزەكتى ماسەلەلەرىن تالقىلاۋ، ەڭبەك نارىعى جۇيەسىنىڭ اعىمداعى جاعدايىن باعالاۋ، جاستاردى جۇمىسپەن قامتۋدىڭ جاڭا نىساندارى مەن جاستاردىڭ رۋحاني-ادامگەرشىلىك يدەالدارىن بولجاپ تالداۋ، سونىمەن قاتار «رۋحاني جاڭعىرۋ» باعدارلامالىق ماقالاسى مەن پرەزيدەنتتىڭ بەس الەۋمەتتىك باستاماسىن ىسكە اسىرۋ پەرسپەكتيۆالارىن تالقىلاۋ بولىپ تابىلادى.

عىلىمي-پراكتيكالىق كونفەرەنسيا جۇمىسىنا وتاندىق جانە شەتەلدىك ساراپشىلار، مەملەكەتتىك ورگاندار مەن ديپلوماتيالىق قىزمەت وكىلدەرى قاتىستى.

شارانىڭ اشىلۋ راسىمىندە دارحان كالەتايەۆ ق ر مەملەكەتتىك حاتشىسى گۇلشارا ءابدىقالىقوۆانىڭ «جاستار» عىلىمي-زەرتتەۋ ورتالىعىنىڭ 5 جىلدىعىمەن قۇتتىقتاۋ حاتىن وقىپ بەردى.

د. كالەتايەۆ ءوز سوزىندە قازاقستان رەسپۋبليكاسى پرەزيدەنتى ن.ءا.نازاربايەۆتىڭ بەس الەۋمەتتىك باستاماسىندا ايتىلعان مەملەكەتتىك قولداۋ شارالارى نەگىزىنەن جاستاردىڭ الەۋمەتتىك مارتەبەسىن كوتەرۋگە جانە جاستاردى الاڭداتاتىن  ماسەلەلەرى شەشۋگە باعىتتىلعان. 

ءمينيستردىڭ ايتۋىنشا، جاستار ءۇشىن ءبىلىم الۋ، جۇمىسپەن قامتۋ جانە وتباسىن قۇرۋ بۇگىنگى كۇن تارتىبىندەگى ەڭ وزەكتى ماسەلەلەر بولىپ تابىلادى.

سونداي-اق، كونفەرەنسيا بارىسىندا ق ر ءبىلىم جانە عىلىم مينيسترلىگىنىڭ جاۋاپتى حاتشىسى ارىن ورسارييەۆ، الماتى مەنەدجمەنت ۋنيۆەرسيتەتىنىڭ پرەزيدەنتى اسىلبەك قوجاحمەتوۆ، جاستار ساياساتى سالاسىنداعى ساراپشى Maria Cristina Bacalso بايانداما جاسادى.

«جاڭا ماماندىقتار اتلاسى» جوباسىن قۇراستىرۋشى دميتريي سۋداكوۆ «بولاشاقتىڭ داعدىلارى. جاڭا الەمدە نەنى مەڭگەرۋىمىز قاجەت؟» اتتى بايانداماسىن تانىستىردى. وندا XXI عاسىردىڭ بازالىق داعدىلارى مەن جۇمىسپەن قامتۋعا ىقپال ەتەتىن پروسەسستەر تۋرالى ايتىپ ءوتتى.

كونفەرەنسيا اياسىندا «جاڭا جۇمىسپەن قامتۋ نىساندارى جانە وزىق ءبىلىم بەرۋ»، «فۋتۋرولوگيا جانە بولاشاق ماماندار»، «زاماناۋي الەمدە ءبىلىم بەرۋ: Y، Z ۇرپاقتارىنىڭ رۋحاني-ادامگەرشىلىك يدەالدارى» اتتى سەكسيا جۇمىستارى وتكىزىلدى. 

كونفەرەنسيا قورىتىندىسى بويىنشا ماتەريالدار جيناعى شىعارۋ جانە رەزوليۋسيا قابىلداۋ جوسپارلانىپ وتىر.

مۇرات راحيمجانوۆ