باتىس قازاقستان وبلىسىنىڭ اكىمى التاي كولگىنوۆ 26 ءساۋىر كۇنى حەلسينكيگە بارىپ، قالالىق ينفراقۇرىلىمدى دامىتۋ، قورشاعان ورتانى قورعاۋ جانە قالدىقتاردى وڭدەۋ سالالارى بويىنشا فين تاجىريبەسىمەن تانىستى.

باتىس قازاقستان وبلىسىنىڭ اكىمى التاي كولگىنوۆ جۇمىس ساپارىمەن حەلسينكيگە باردى. وبلىس اكىمىنىڭ بۇل جول­عى شەت مەملەكەتكە جۇ­مىس ساپارىنىڭ ماقسا­تى – ەنەرگەتيكا جانە تۇراقتى دا­مۋ، قورشاعان ورتانى قورعاۋ ءجا­نە تۇرمىستىق قالدىقتاردى قايتا وڭدەۋ سەكىلدى سالالاردىڭ قالا ينفراقۇرىلىمىن دامىتۋ­دا قولدانىلۋى باعىتىنداعى ءتا­جىريبەلەردى ساراپتاۋ بولاتىن.

جۇمىس ساپارى بارىسىندا اكىم فينليانديا ءسىم مەملەكەتتىك حاتشىسى ورىنباسارى م.كەينيانەنمەن كەزدەستى. وندا وبلىس اكىمى باتىس قازاقستان وبلىسى بويىنشا اتقارىلىپ جاتقان شارالار ەلباسى بەلگىلەگەن ستراتەگيالىق تاپسىرمالار اياسىندا جۇزەگە اسىپ جاتقانىن ايتتى.

شارا بارىسىندا فينليانديانىڭ «VTT» تەحنولوگيالىق زەرتتەۋلەر ورتالىعىنىڭ ماماندارى جاساقتاعان تۇجىرىمدامالار تانىستىرىلدى. اكىم بۇل ساپاردا سونداي-اق تۇرمىستىق قالدىقتاردى وڭدەۋ ورتالىعىنا باس سۇقتى.

كەزدەسۋ بارىسىندا حەلسينكي مەن باتىس قازاقستان اكىمدىگىنىڭ، فين «بيزنەس-حاب» جوباسى، «Collaprime» كومپانياسى اراسىندا ىنتاماقتاستىق جونىندەگى كەلىسىمگە قول قويىلدى. بۇل ءوز كەزەگىندە ەكى تاراپتىڭ «ەكسپو-2017» كورمەسى كەزىندەگى كەلىسىمىنىڭ كەلەسى ماڭىزدى قادامى بولىپ ەسەپتەلەدى. ايتا كەتەيىك، بۇعان دەيىنگى بقو اكىمدىگى مەن «Collaprime» كومپانياسى اراسىنداعى كەلىسىم 3D-جوبالاۋ باعىتىندا كوللەدج مۇعالىمدەرىنىڭ بىلىكتىلىگىن ارتتىرۋعا باعىتتالعان ەدى.

قوس تاراپ فيندىك BIM-تەحنولوگيالارى مەن 3D-جوبالاۋ تەحنولوگياسى وبلىستىڭ ينفراقۇرىلىمى مەن قۇرىلىسى سالاسىنا وڭ اسەرىن تيگىزەتىنىنە سەنىم بىلدىرەتىنىن جەتكىزدى. ايتا كەتۋ كەرەك، «Collaprime» 2016 جىلى فينليانديانىڭ BIM-تەحنولوگيالارى بويىنشا ۇزدىك كومپانياسى اتانعان.