وڭتۇستىك قازاقستان وبلىستىق ءماسليحاتىنىڭ كەزەكتەن تىس جيىرما ءۇشىنشى سەسسياسىندا دەپۋتاتتاردىڭ قاراۋىنا شىمكەنت قالاسى حالقىنىڭ ءبىر ميلليونعا جەتۋىنە وراي، وعان ەرەكشە مارتەبە بەرۋ، وبلىس ورتالىعىن تۇركىستان قالاسىنا كوشىرۋ جانە وسىعان بايلانىستى وبلىستىڭ، تۇركىستان، كەنتاۋ قالالارىنىڭ شەكارالارىنا وزگەرىستەر ەنگىزۋ ماسەلەلەرى ۇسىنىلدى.
ەنگىزىلىپ وتىرعان وزگەرىستەرگە سايكەس، تۇركىستان قالاسىنىڭ وبلىس ورتالىعى بولۋى كەزىندە قالا اكىمدىگىنە قاراستى 12 اۋىل وكرۋگى كەنتاۋ قالاسى اكىمدىگىنىڭ قاراماعىنا وتەتىن بولادى. شىمكەنت قالاسىنىڭ اۋماعى وزگەرىسسىز قالىپ، وبلىستىڭ اۋماعىنان جەكە ءبولىنىپ شىعۋىنا بايلانىستى وبلىستىڭ اۋماعى قىسقارماق. سونىمەن قاتار، الەۋمەتتىك، اكىمشىلىك نىسانداردىڭ ورنالاسۋ جاعدايى مەن ينفراقۇرىلىممەن، ونىڭ ىشىندە، اۋىز سۋمەن، گازبەن، اۆتوموبيل جولدارىمەن، بايلانىس جەلىلەرىمەن قامتىلۋى، اعىن سۋمەن قامتاماسىز ەتىلۋى، جەر جاعدايى، ولاردىڭ حالىققا ىڭعايلى بولۋ ماسەلەلەرىنىڭ بارلىعى ەسكەرىلگەن.
سەسسيا جۇمىسىنا قاتىسقان وبلىس اكىمى جانسەيىت تۇيمەبايەۆ بارشانى شىمكەنت قالاسى تۇرعىندارىنىڭ 1 ميلليونعا جەتۋىمەن شىن جۇرەكتەن قۇتتىقتادى.
«ەلباسىمىز نۇرسۇلتان ءابىش ۇلى نازاربايەۆ قاشان دا ۇلت رۋحانياتىنىڭ التىن ۇياسى، قازاق تاريحىنىڭ ءتۇپ تامىرى – وڭتۇستىككە ايرىقشا كوڭىل ءبولىپ كەلەدى. تاۋەلسىز قازاق ەلىندە تۇڭعىش رەت ميلليوندىق قالانى مەجەلەۋ، وعان ارنايى مارتەبە بەرۋ ءىسى 2014 جىلدان باستالدى. بۇگىندە كوزدەلگەن ماقسات ورىندالىپ، شىمكەنت قالاسى تۇرعىندارى 1 ميلليونعا جەتىپ وتىر. ءبىز سىزدەرمەن بىرگە شىمقالاعا رەسپۋبليكالىق مارتەبە بەرۋمەن قاتار، جاڭادان وبلىس ورتالىعىن تاڭداۋ باقىتى بۇيىرعان تاريحي ءساتتىڭ تابالدىرىعىندا تۇرمىز. مۇنداي ورتالىق رەتىندە قازاق ەلى ءۇشىن عانا ەمەس، ءيسى تۇركى الەمىنە ورتاق، قاسيەتتى تۇركىستاننىڭ تاڭدالۋىن حالىقتىڭ زور ىقىلاسپەن قابىلداۋىن قۋانىشپەن اتاپ ايتقىم كەلەدى. مۇنى تۇركىستان، كەنتاۋ قالالارىنىڭ شەكارالارىنا وزگەرىستەر ەنگىزۋ بارىسىندا تۇرعىندارمەن جۇرگىزىلگەن قوعامدىق تىڭداۋلار مەن وزدەرىڭىزبەن تالقىلاۋ بارىسىندا ايقىن سەزىنىپ وتىرمىز»،-دەدى ايماق باسشىسى.
اتالعان ماسەلە بويىنشا ۇكىمەت جانىنان قۇرىلعان ارنايى جۇمىسشى توپپەن بىرلەسە ءبولۋدىڭ ەكونوميكالىق تيىمدىلىگىنە، ونىڭ وبلىستىڭ، شىمكەنت، تۇركىستان، كەنتاۋ قالالارىنىڭ الەۋمەتتىك-ەكونوميكالىق دامۋىنا اسەرى جان-جاقتى تالداندى.
جوعارىدا اتالعان ۇسىنىستى قولداعان حالىق قالاۋلىلارى وڭتۇستىك قازاقستان وبلىسىنىڭ اكىمشىلىك-اۋماقتىق قۇرىلىسىنىڭ كەيبىر ماسەلەلەرى تۋرالى وبلىس اكىمدىگى قاۋلىسى مەن ءماسليحاتتىڭ شەشىمىنە قول قويدى.
جالپى، قالانىڭ ينجەنەرلىك-ينفراقۇرىلىممەن قامتىلۋ دەڭگەيى جوعارى بولىپ تابىلادى. بۇل كورسەتكىشتەر شىمكەنت قالاسىنا ەرەكشە مارتەبە بەرۋىنە تولىق مۇمكىندىك بەرەدى.
قازاقتا «قوس تويىڭ قابات بولسىن، ەكى دۇنيەڭ ابات بولسىن» دەيتىن كەرەمەت ءسوز بار ەكەنىن ايتقان وبلىس اكىمى جانسەيىت تۇيمەبايەۆ ۇلى تۇران دالاسىنىڭ تەمىرقازىعى، ۇلى تۇركى بابالاردىڭ ءتۇپقازىعى سانالاتىن قاسيەتتى ولكە تۇركىستاندى وبلىس ورتالىعى ەتۋ ۇسىنىسى بارشاعا ەرەكشە وي سالاتىنىن جەتكىزدى.
«تۇركىستان - رۋحتى قايراپ، الاشتى ارقالاندىرىپ، تاعدىرلى كەزەڭدەردە قازاق دەيتىن ەلدى ساقتاپ، بەرەكەسىن ارتتىرا بىلگەن قاسيەتتى جەر. ساناعا سىلكىنىس تۋعىزىپ، وتانشىلدىق سەزىمدى تەرەڭدەتەتىن تىڭ باستاما رۋحاني جاڭعىرۋدىڭ جارقىن كورىنىسى بولارى انىق. وسى ورايدا تۇركىستان تۋريزم سالاسى بويىنشا سامارقاند، بۇحارا، حيۋا سياقتى قالالارمەن باسەكەلەسىپ، تۇرىك الەمىنىڭ استاناسى جانە وبلىس ورتالىعى رەتىندە الەمدىك ارەنادا قازاقستاننىڭ بەدەلىن بيىكتەتىپ مارتەبەسىن اسقاقتاتادى دەپ ەسەپتەيمىن»،-دەدى قورىتىندى سوزىندە وبلىس اكىمى.
