اقش-تا سوتتالعان قازاقستاندىق دياس قادىربايەۆ 2018 جىلدىڭ 23 شىلدەسىندە مەرزىمىنەن بۇرىن بوساتىلادى، دەپ حابارلايدى ق ر ءسىم Informburo.kz رەسمي ساۋالىنا جاۋاپ رەتىندە.
"دياc قادىربايەۆ تەحاستاعى Big Spring فەدەرالدىق تۇرمەسىندە جازاسىن وتەپ جاتىر. وتانداسىمىز جاقىن ارادا بوستاندىققا شىعاتىنىن قۋانا حابارلايمىز. تۇرمەدەن شىققان سوڭ دياستى ۆيزا ماسەلەسى بويىنشا اقش-تىڭ ميگراسيالىق قىزمەتىنە تاپسىرادى. ۇلگىلى ءتارتىبىنىڭ ارقاسىندا دياس مەرزىمىنەن بۇرىن، 23 شىلدەدە بوساتىلادى دەپ جوسپارلانعان. ق ر ءسىم وتانداسىمىزدىڭ ەلگە ورالۋى ءۇشىن بار كۇش جىگەرىن جۇمساپ جاتىر"، - حابارلادى ق ر ءسىم
ءسىم دياستىڭ فيزيكالىق، پسيحولوگيالىق جاعدايى وتە جاقسى ەكەنىن اتاپ ءوتتى.
"قازاقستان ەلشىلىگىنىڭ وكىلدەرى وتانداسىمىزدىڭ اكەسى مۇرات قادىربايەۆپەن تۇراقتى تۇردە بايلانىسىپ وتىر. ق ر ءسىم دياستىڭ وتانىنا ورالۋ پروسەسىن تەزدەتۋ ءۇشىن بار كۇش-جىگەرىن جۇمساپ جاتىر"، - دەلىنگەن حابارلامادا.
"2017 جىلى قازاقستاننىڭ باس پروكۋراتۋراسى اقش-تىڭ ادىلەت مينيسترلىگىنە دياس قادىربايەۆتى وتانىنا اۋىستىرۋ ماسەلەسى بويىنشا بىرنەشە رەت ءوتىنىم بەرگەن. الايدا قىلمىسىنىڭ اۋىرلىعىنا بايلانىستى وتانداسىمىزدى كەرى قايتارۋعا كەلىسىم بەرمەگەن"، - دەپ حابارلادى مينيسترلىك.
بوستونداعى مارافون كەزىندە جارىلىس ۇيىمداستىردى دەگەن كۇدىكپەن ۇستالعان ازامات تاجاياقوۆ پەن دياس قادىربايەۆقا ايعاقتاردى جويۋعا ارەكەتتەنىپ، تەرگەۋ امالدارىنا بوگەت جاسادى دەگەن ايىپ تاعىلعان. تەرگەۋ دەرەكتەرىنە قاراعاندا، تەراكتتان ءۇش كۇن وتكەننەن كەيىن ولار سارنايەۆتىڭ نوۋتبۋگى مەن پەراتەحنيكالارى بار سومكەنى لاقتىرىپ جىبەرگەن. بولجام بويىنشا، ولار جاڭالىقتاردان سارنايەۆتىڭ سۋرەتىن كورىپ، ونىڭ تەراكتقا قاتىسى بار ەكەنىن تۇسىنگەن سوڭ قولدارىنداعى ايعاقتاردان قۇتىلۋعا كىرىسكەن. كەيىن ول سومكە قوقىس جاشىگىنەن تابىلدى. ناتيجەسىندە دياس قادىربايەۆ التى جىلعا، ازامات تاجاياقوۆ 3،5 جىلعا باس بوستاندىعىنان ايىرىلدى.
2016 جىلى ازامات تاجاياقوۆ قازاقستانعا ورالدى. ءقازىر اتىراۋداعى جوو-لاردىڭ بىرىندە مۇنايشى ماماندىعى بويىنشا ءبىلىم الىپ ءجۇر.
