2015 جىلدىڭ 20 ناۋرىز كۇنى استانا قالاسىنىڭ كونگرەسس-حولل سارايىندا «ازيا» توبىنىڭ شىعارماشىلىق ءان كەشى وتەدى.
«ازيا» توبىنىڭ مۇشەسى رەنات باسيتوۆ 2014 جىلدىڭ جازىندا اپاتقا ۇشىراعاننان كەيىن توپتىڭ شىعارماشىلىق جۇمىستارى ءبىراز باياۋلاپ قالعان بولاتىن. ايتكەنمەن، تىڭدارماندارى مەن ارىپتەستەرىنىڭ قولداۋىنا يە بولعان رەناتكوپ كۇتتىرمەي اياعىنان تۇرىپ كەتتى. وسىعان دەيىن ۇجىم جەكە كونسەرتىن استانا قالاسىندا وتكىزۋگە دايىندالىپ كەلدى.
«ازيا» توبىنىڭ استانا قالاسىندا وتەتىن ءان كەشىندە ءانشى گۇلنۇر ورازىمبەتوۆا، قايرات نۇرتاس، «اراي» جانە «Di-Art» توپتارى ونەر كورسەتەدى.
«ازيا» توبى 2004 جىلدىڭ مامىر ايىندا قۇرىلدى. توپ قۇرامىندا ەربول ءشارىپوۆ، رەنات باسيتوۆ، نۇرسۇلتان باتىرقۇلوۆ سىندى ءانشى جىگىتتەر ونەر كورسەتەدى. توپ تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ قابىرعاسىندا قالانعان. وسى ۋاقىتقا دەيىن «ازيانىڭ» «بيلە، بيلە»، «مۇستافا شوقاي»، «عاجايىپ كۇي»، «جەتىقاراقشى»، «ماحاببات ارالى»، «اۋىلعا كەل، اياۋلىم»، «جۇرەگىمدى جاۋلادىڭ»، «قىرمانعا كەل، قالقاتاي»، «سىيلا ءانىڭدى»، «مەرەكە» جانە ەربولات قۇدايبەرگەنوۆپەن بىرىگىپ «ايىم» اندەرىنە تۇسىرىلىگەن بەينەباياندارى جارىق كورگەن.
