بۇگىن استانا كۇنى قارساڭىندا داستۇرگە اينالعان پارتيا قاتارىنا قابىلداۋ راسىمىندە «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ وسىلاي دەدى.

ونىڭ ايتۋىنشا، بۇل جۇمىستار ەلباسىنىڭ تاپسىرماسى بويىنشا قولعا الىنعان پارتيانىڭ كادرلىق الەۋەتىن ارتتىرۋ ماقساتىندا جۇزەگە اسىرىلىپ وتىر.

– ءبىز ءبارىمىز جۇدىرىقتاي جۇمىلىپ ەلباسىنىڭ سەنىمدى تىرەگى جانە جاڭعىرۋ پروسەستەرىنە بەلسەندى قاتىساتىن ستراتەگيالىق كۇش بولىپ قالىپتاسۋىمىز كەرەك. بۇل – پارتيامىزدىڭ قازىرگى كەزەڭدەگى باستى ميسسياسى. سول ءۇشىن سانعا ەمەس، ساپاعا باسىمدى بەرىلەدى. ول جۇمىس تيىمدىلىگىن ارتتىرۋعا جانە پارتيا ءتوراعاسى تاپسىرعان مىندەتتەردى تابىستى ورىنداۋعا دا سەپتىگىن تيگىزەتىن ماڭىزدى قادام، – دەدى ماۋلەن اشىمبايەۆ.

وسىعان وراي بۇگىن كەلەشەگىنەن مول ءۇمىت كۇتتىرەتىن جاس عالىمدار، كاسىبىن دوڭگەلەتىپ وتىرعان ىسكەر ازاماتتار، ىت-تەحنولوگيا مەن سيفرلاندىرۋ ىسىندە ايتارلىقتاي جەتىستىكتەرگە قول جەتكىزگەن بىلىكتى ماماندار جانە ءوز سالاسىندا بيىك بەلەستەردى باعىندىرعان باسقا دا قوعام بەلسەندىلەرى پارتيا مۇشەسى اتاندى.

جاڭا نۇروتاندىقتارعا پارتيالىق بيلەتتەرىن ءوز قولىمەن تاپسىرعان ماۋلەن اشىمبايەۆ ساياسي كەڭەس وتىرىسىندا ەلباسى پارتيا قىزمەتىن جاڭعىرتۋعا باعىتتالعان ادىس-تاسىلدەر مەن جاڭا جوبالاردى ماقۇلداپ، ولاردى جۇزەگە اسىرۋ ءۇشىن ناقتى تاپسىرمالار بەرگەنىنە نازار اۋداردى. سونداي-اق پارتيا قاتارىنا جاڭادان قابىلدانعان ازاماتتار الداعى ۋاقىتتا سول باستامالاردى جۇزەگە اسىرۋعا ەلەۋلى ۇلكەن ۇلەس قوساتىنىنا سەنىم ءبىلدىردى.

سونىمەن قاتار «نۇر وتان» پارتياسى ءتوراعاسىنىڭ ءبىرىنشى ورىنباسارى بارشا ءىس-شاراعا قاتىسۋشىلاردى استانا كۇنىمەن قۇتتىقتاپ، بيىل بۇل مەرەكەنىڭ ءمانى دە، ماڭىزى دا بۇرىنعىدان وزگەشە ەكەنىن ايتتى.

– بيىل حالقىمىزدىڭ ماقتانىشىنا اينالعان ارمان قالامىز استانانىڭ نەگىزى قالانعانىنا 20 جىل تولىپ وتىر. وسى ۋاقىت ارالىعىندا ەلوردامىز شاعىن عانا وبلىس ورتالىعىنان بۇكىل الەم مويىنداعان ءححى عاسىردىڭ اسەم دە سۇلۋ شاھارىنا اينالدى. استانا – اتا-بابالارىمىزدىڭ اقيقاتقا اينالعان ارماندارىنىڭ جارقىن كورىنىسى، تاۋەلسىزدىك جىلدارىندا قول جەتكىزگەن جەتىستىكتەرىمىزدىڭ ايقىن سيمۆولى جانە قازاق ەلىنىڭ ماڭگىلىك ەل بولىپ قالىپتاسۋىنىڭ مىزعىماس نىشانى. وسى جەتىستىكتەرىمىزدىڭ بارلىعى ەلباسىمىزدىڭ ەرەن ەڭبەگى مەن سىندارلى ساياساتىنىڭ جەمىسى. ەلباسى استانانى سالۋ ارقىلى وتانىمىزدىڭ ابىرويىن اسقاقتاتىپ، ەلىمىزدى الەمنىڭ ەڭ بەدەلدى مەملەكەتتەرىنىڭ قاتارىنا قوستى، – دەدى ماۋلەن اشىمبايەۆ.