بيە سۇتىنەن جاسالعان، جانۋار ءونىمىنسىز ۆەگەتەريان بالمۇزداعى، بەلسەندىرىلگەن كومىر قوسىلعان قارا بالمۇزداق، بيوبالمۇزداق. الماتىدا ورتالىق مادەنيەت جانە دەمالىس ساياباعىندا وتكەن «بالمۇزDay» فەستيۆالىندە مۇزداي ءدامنىڭ ەرەكشە تۇرلەرى ۇسىنىلدى.

جازعى ماۋسىمدا اسا قاجەت بالمۇزداقتىڭ كوڭىل-كۇيدى كوتەرەتىنى بەلگىلى. بۇگىندە وندىرۋشىلەر ونىڭ  دەنساۋلىققا پايداسىنا ەرەكشە كوڭىل بولۋدە. تاعامدى تالعاپ جەيتىندەرگە بالمۇزداقتار اراسىنان دا مول تاڭداۋ بار.

الەم بويىنشا قازاقستاندا العاش رەت بيە سۇتىنەن بالمۇزداق جاسالدى. قۇرامىندا قانتى جوق، گيپپولەرگەندى بالمۇزداقتىڭ ءوز تۇتىنۋشىلارى بار. ماسەلەن، سيىر سۇتىندە كەزدەسەتىن اقۋىزعا اللەرگياسى بار ادامدار، گيپپوالەرگەندى ساۋمالدان جاسالعان بالمۇزداقتى جەي الادى.

«بيە ءسۇتى ساۋمالدان جاسالعان بالمۇزداق. بۇعان قانت قوسىلماعان. ساۋمال گيپپواللەرگەندى ءارى ءتاتتى. سوندىقتان بۇل بالمۇزداقتىڭ ءدامى باسقالارىنا ۇقساس كەلەدى.  كوبىنەسە ديابەتپەن اۋىراتىندار مەن اللەرگياسى بار ادامدار تۇتىنادى.  الەم بويىنشا العاش رەت ءبىزدىڭ ەلدە جاسالعان ءونىم. قازاقستان  نارىعىندا 2  جىلدان بەرى بارمىز. شەتەلدىكتەر وتانىنا بازارلىق رەتىندە الىپ كەتىپ جاتادى»،-دەدى قازاق تاعامتانۋ اكادەمياسىنىڭ مامانى اقەركە بەيسەنعالي.

مۇنى تۇتىنبايتىندار ءۇشىن ۆەگەتەرياندىق بالمۇزداق ءتۇرى دە بار. Eco Shmeko قازاقستانعا نەبارى ەكى اپتا بۇرىن كەلگەن.

«بۇل ۆەگەتەرياندىق بالمۇزداق. جانۋار ءسۇتى قوسىلماعان. مۇزداتىلعان جەمىس-جيدەكتەردەن جاسالادى. سىرتىنداعى ءۆافليى دە ۆەگەتەرياندىق  تاسىلدە دايىندالعان. ءدامى كادىمگى بالمۇزداقتان دا تاتتىرەك ءارى زيانسىز. ادامدار قىزىعۋشىلىق تانىتۋدا.  مۇنداي ءونىم ازىرگە قازاقستاندا جوق. ءبىز 2 اپتا بۇرىن عانا العاشقى ساۋدامىزدى جاسادىق،- دەدى Eco Shmeko بالمۇزداعىن ساتۋشى Arash.

سوڭعى كەزدە الماتىدا قارا ءتۇستى بالمۇزداق پايدا بولدى. قۇرامىنا بەلسەندىرىلگەن كومىر قوسىلعان  ءتاتتىنىڭ اعزاعا جاعىمدى اسەرى بار.

«قارا بالمۇزداقتىڭ  ەرەكشەلىگى قۇرامىندا بەلسەندىرىلگەن كومىر بار. ول ءتاتتى ءارى پايدالى. اعزاداعى توكسيندەردى ايداپ شىعارادى. بەلسەندى كومىردىڭ مولشەرى كوپ ەمەس، سوندىقتان بالمۇزداقتى جەۋگە قانداي دا ءبىر شەكتەۋ قويىلماعان. بۇدان بولەك قۇرامىندا بەلگيالىق شوكولاد ءدامى بار. الماتى تۇرعىندارىمەن  ءبىر ايدان بەرى تانىسپىز»،-دەيدى ساتۋشى ءانۋار اكۋوۆ.

ءداستۇرلى «بالمۇزDay» فەستيۆالى بيىل الماتىدا  ءۇشىنشى رەت وتۋدە. ەرەكشەلىگى سول، بۇل جولى شارا ەكى كۇنگە ۇلاسادى. ەڭ العاش فەستيۆالدى وتكىزۋ يدەياسىن ۇسىنعان ميرا سالامبايەۆا بۇگىندە ونىڭ ۇيىمداستىرۋشىسى.

«ەڭ العاش وتباسىلىق مەرەكەلىك فەستيۆال ۇيىمداستىرسام دەگەن نيەت بولعان. الماتىدا اشىق اسپان استىندا «بالمۇزDayدى» وتكىزۋ مەن ءۇشىن تابىلعان يدەيا بولدى. ءۇشىنشى جىل وتكىزىلىپ وتىرعان شارا بۇل جولى ەكى كەزەڭنەن تۇرادى. بۇگىن كەلۋشىلەر بالمۇزداقتىڭ تۇر-تۇرىنەن ءدام تاتۋعا مۇمكىندىك الدى. سونىمەن قاتار بالالاردىڭ ورىنداۋىندا كونسەرتىك نومىرلەردى نازارلارىڭىزعا ۇسىنىپ وتىرمىز. ۇتىس ويىندارىن ۇيىمداستىردىق. بۇگىنگى فەستيۆال قوناقتارى سۋرەتكە ءتۇسىپ، ونى Instagram الەۋمەتتىك جەلىسىندە #balmuzday_2018 حەشتەگىمەن جاريالاپ، سىيلىقتارعا يە بولا الادى. كونسەرتكە اۋتيزممەن اۋىراتىن بالالار قوناق بولادى. ءبىز ولارعا بالمۇزداق ۇلەستىرەمىز. ءارى ءبىزدىڭ سەرىكتەستەرىمىزدىڭ اتىنان سىيلىقتار تابىستالادى»،-دەدى ميرا سالامبايەۆا.

ونىڭ ايتۋىنشا، فەستيۆال ەرتەڭ ءان بايقاۋىمەن جالعاسادى. مۇندا 3-تەن 16 جاسقا دەيىنگى بالالار اتا -انالارىمەن ءان شىرقايدى. قازىلار القاسى قاتىسۋشىلاردى  وتباسىلىق جانە جەكە ورىنداۋ اتالىمىندا ماراپاتتايتىن بولادى.