قازاقستاننىڭ حالىقارالىق رەزەرۆىنىڭ كولەمى 2018 جىلعى شىلدە ايىندا ماۋسىممەن سالىستىرعاندا 0،61%، 2017 جىلعى جەلتوقسانمەن سالىستىرعاندا 1،58% تومەندەپ، 87،668 ملرد اقش دوللارىن قۇراعان. بۇل تۋرلى ۇلتتىق بانك اقپارات تاراتتى.

قارجى ينستيتۋتىنىڭ مالىمەتىنە قاراعاندا، قازاقستاننىڭ جالپى حالىقارالىق رەزەرۆىنىڭ كولەمى شىلدە ايىندا 2،62% ءوسىپ (جىل باسىنان بەرى 0،46% وسكەن)، 30،886 ملرد دوللاردى قۇراعان، سونىڭ ىشىندە تازا حالىقارالىق رەزەرۆ 2،67% ءوسىپ (+0،51%)، 30،388 ملرد دوللار بولعان.

ق ر ۇلتتىق قورى اكتيۆتەرىنىڭ كولەمى 2،29% (-2،66%) تومەندەپ، 56،782 ملرد دوللاردى قۇرادى. ەركىن كونۆەرتاسيالاناتىن ۆاليۋتاداعى اكتيۆتەردىڭ كولەمى 18،09 ملرد دوللاردى قۇرادى، بۇل كورسەتكىش وتكەن ايدا 5،41% (ال وتكەن جىلدىڭ جەلتوقسانىنان بەرى 0،86% ازايعان) وسكەن. التىن ۆاليۋتالاردىڭ كولەمى 1،07% (+2،39%) قىسقارىپ، 12،796 ملرد دوللاردى قۇرادى.

ءبىر اي بۇرىن ۇلتتىق ەكونوميكا ءمينيسترى تيمۋر سۇلەيمەنوۆ ءبىرىنشى جارتىجىلدىقتىڭ قورىتىندىسى بويىنشا ءجىو-نىڭ ءوسىمى 4،1 پروسەنتتى قۇراعانىن مالىمدەگەن بولاتىن. «ينفلياسيا بىرتىندەپ ازايىپ كەلە جاتىر جانە سوڭعى ءۇش جىلداعى ەڭ تومەن مانگە جەتتى. جىل باسىنان بەرى ول 2،6 پروسەنتتى قۇرادى، ال جىلدىق ينفلياسيا – 5،9%. ينفلياسيانىڭ بارلىق كومپونەنتى بويىنشا باعا ءوسىمى باسەڭدەگەنى بايقالادى»، — دەگەن ەدى مينيستر.

ال نەگىزگى كاپيتالعا سالىناتىن ينۆەستيسيالار بويىنشا جوعارى ءوسۋ ءۇردىسى ساقتالعان. ءوسىم 25،8%ء-تى قۇرادى.

«بيىل 1 ماۋسىمىنداعى جاعداي بويىنشا ەلدىڭ حالىقارالىق رەزەرۆتەرى 0،9%-كە ۇلعايىپ، 89،9 ميلليارد اقش دوللارىنا دەيىن جەتتى. ۇلتتىق قوردىڭ اكتيۆتەرى 1،5 پروسەنتكە ءوستى»، — دەلىنگەن سۇلەيمەنوۆتىڭ 10 شىلدەدەگى ەسەبىندە.