اقبوتا كەرىمبەكوۆا، ءانشى:
– جارىلقاپ قالىبايدى ءوز ءىسىنىڭ مايتالمانى رەتىندە جاقسى بىلەمىن. بۇل سايلاۋدا ەلباسىنىڭ ءوزى سايلاناتىنى بەلگىلى عوي، دەگەنمەن سايلاۋعا قاتىسۋعا كىم-كىمنىڭ دە حاقىسى بار دەپ ويلايمىن. جارىلقاپ اعانىڭ بيلىككە ەل-جۇرتتىڭ پروبلەماسىن جەتكىزەمىن دەۋى – قۇپتارلىق ءىس-اق. ەلدىڭ قامىن ويلايتىن ازاماتتاردىڭ بيلىك باسىنا كەلگەنىنە شىن قۋانامىز.
سايات مەدەۋوۆ، ءانشى: – مەن جارىلقاپ قالىبايدىڭ پرەزيدەنتتىككە ۇمىتكەر بولۋىنا قارسى ەمەسىپىن. مۇنى «دۇرىس ەمەس» دەپ قابىلداۋدىڭ قاجەتى جوق. اركىم ءوز شاماسىن بىلەدى عوي. مىسالى، مەن ءوزىمدى پرەزيدەنتتىككە ۇسىنا الماس ەدىم دەگەن سەكىلدى. جارىلقاپ اعانىڭ ءبىلىمى، ءورىسى جەتىپ، «ۇلتتىڭ تالاپ-تىلەگىن بيلىككە جەتكىزەمىن» دەپ تۇرسا، وندا نەگە ءوزىن پرەزيدەنتتىككە ۇسىنباسقا؟
مەرۋەرت تۇسىپبايەۆا، ءانشى: – جارىلقاپ قالىبايدىڭ پرەزيدەنتىككە ۇمىتكەرلىككە سايلاۋعا قاتىسىپ جاتقانىن قولدايمىن. ويتكەنى جارىلقاپ قالىباي – ەلىمىزگە تانىمال ازامات. ەكىنشىدەن، وتە مىقتى، ساۋاتتى جۋرناليست. جۋرناليستەر – حالىق پەن بيلىكتىڭ ورتاسىنداعى التىن كوپىر. ەگەر جۋرناليست قاراپايىم حالىقتىڭ مۇڭىن مۇڭداپ، جوعىن جوقتاپ، جانايقايىن بيلىككە جەتكىزبەسە، كىم جەتكىزەدى؟! «ءتورتىنشى بيلىك وكىلدەرى» دەپ جۋرناليستەردى ايتادى عوي. ءقازىر، وكىنىشكە قاراي، ۇساق-تۇيەك، وسەك-اياڭ جازعىش جۋرناليستەر كوبەيىپ كەتتى. جارىلقاپ اعا – بۇرىنعى اعا بۋىن جۋرناليستەردىڭ ءبىرى. سوندىقتان ونىڭ پرەزيدەنتتىككە ۇمىتكەر رەتىندە تىركەلىپ، حالىقتىڭ مۇڭ-مۇقتاجىن جەتكىزەمىن دەگەنى جاس جۋرناليستەرگە ۇلگى بولۋى كەرەك. وسى ورايدا ول كىسىنىڭ باستاماسىن قولدايمىن!
التىناي جورابايەۆا، ءانشى: – حالىقتى ويلاعان ءاربىر ازاماتتىڭ «ەلىم» دەپ سوققان جۇرەگىنەن اينالىپ كەتەسىڭ عوي. ويتكەنى اتا-بابامىزدىڭ قاسىق قانى قالعانشا كۇرەسىپ الىپ قالعان جەرىن كوركەيتىپ، ۇرپاقتىڭ وسىپ-ونۋىنە كىشكەنە بولسا دا ىقپالى تيگەنى جاقسى. جارىلقاپ اعايدىڭ پرەزيدەنتتىككە ۇمىتكەر رەتىندە تىركەلگەنىن باسىندا تۇسىنبەي قالدىم. سويتسەم، ول كىسىنىڭ كوزدەگەنى حالىقتىڭ الەۋمەتتىك جاعدايىن كوتەرۋ ەكەن عوي. ارينە، ونداي ازاماتتاردىڭ بارىنا قۋانامىز.
جازيرا بايىربەكوۆا، ءانشى: – ءبىزدىڭ ەلدە حالىقتىڭ ءسوزىن سويلەيتىن ازاماتتار وتە از. سوندىقتان جارىلقاپ قالىبايدىڭ «وسى سايلاۋدى پايدالانىپ، حالىقتىڭ الەۋمەتتىك جاعدايىن، تالاپ-تىلەگىن، مۇڭ-مۇقتاجىن بيلىككە جەتكىزسەم» دەگەن ويى ماعان ۇنادى. سول سەبەپتەن ول كىسىنى قولدايمىز. ۇلتىن، ەلىن سۇيەتىن ازاماتتاردىڭ باس كوتەرگەنى، شىنىندا دا، ءبىزدى قۋانتادى.
ماقسات بازاربايەۆ، ءانشى: – شىنىن ايتقاندا، ءبىز ساياساتقا مۇلدەم ارالاسپايمىز. سوندىقتان جارىلقاپ قالىبايدىڭ سايلاۋعا قاتىساتىنى تۋرالى پىكىرىمدى ايتپاي-اق قويايىنشى. سەبەبى بىزگە «زۆونوك» كەلدى. الدىن الا ەسكەرتۋ جاسالدى.
گۇلميرا اقۇرپەكوۆا، ءانشى: – مەن ساياساتقا ارالاسقاندى ۇناتپايمىن. ءار ازاماتتىڭ ءوزىن كانديداتتىققا ۇسىنۋىنا قۇقى بار عوي. جارىلقاپ اعا ەمتيحاننان وتكەنىن جاڭالىقتاردان ەستىدىم. ارتىستەردى حالىق «وتە باي، جاعدايى جاقسى» دەپ ويلايدى. ۇنەمى كومەك سۇرايدى. سوندىقتان جارىلقاپ اعا وسى سايلاۋ دوداسى ارقىلى حالىقتىڭ الەۋمەتتىك جاعدايىن كوتەرگەنىن قالايمىن. پرەزيدەنتتىڭ دە نەگىزگى ماقساتى – حالىقتىڭ جاعدايىن جاقسارتۋ عوي، سول جولدا جۇمىس ىستەپ جاتىر. جالپى، حالقىن ويلايتىن ازاماتتاردىڭ كوپ بولعانىن قالايمىن.
تامارا اسار، ءانشى: – ج.قالىباي – وتە ىسكەر ادام. ول كىسى – جوقتان بار جاساۋشى، ۇلتشىل ازامات. ارينە، پرەزيدەنتتىككە قول جەتكىزۋ قيىن، ءبىراق بۇل ماقساتى قۇپتارلىق ءىس.
توپتاستىرعان نۇرگەلدى ءابدىعاني ۇلى
