تۇركىستان وبلىسىنىڭ اكىمى جانسەيىت تۇيمەبايەۆ جۇمىس ساپارىمەن ماقتاارال اۋدانىنا باردى. ءوڭىر باسشىسى الدىمەن ءيىرجار اۋىلدىق وكرۋگى ناۋرىز اۋىلىنداعى جاڭادان سالىنعان ن.بەكەجانوۆ اتىنداعى 200 ورىندىق مەكتەپتىڭ اشىلۋىنا قاتىسىپ، جەرگىلىكتى جۇرتتى جاڭا وقۋ جىلى قارساڭىنداعى قۋانىشتى جاڭالىقپەن قۇتتىقتادى.
«تۇركىستان ءوڭىرى ەڭ كوپ حالىق تىعىز ورنالاسقان ايماق. تۋۋ كورسەتكىشى دە جوعارى. ماسەلەن، بيىلدىڭ وزىندە وبلىس بويىنشا ءبىرىنشى سىنىپقا 55 مىڭنان استام وقۋشى كەلەدى. ياعني، مەكتەپكە كەلەتىن وقۋشى سانى 19 مىڭعا ارتقان. دەموگرافيالىق وسىمگە بايلانىستى 2018-2025 جىلدارى ارالىعىندا وڭىردە 184 مەكتەپ سالۋ قاجەتتىلىگى تۋىنداپ وتىر. بيىل ءبىلىم بەرۋ سالاسىنا قاجەتتى 83 نىساننىڭ قۇرىلىسى قولعا الىنعان. ونىڭ 40-ى جىل سوڭىنا دەيىن پايدالانۋعا بەرىلەدى. مىنە، بۇگىن دە ماقتاارال اۋدانىندا جاڭا مەكتەپ اشىلىپ، اۋىل وقۋشىلارىنا ەسىگىن اشادى»، - دەدى جانسەيىت قانسەيىت ۇلى.
كەيىن وبلىس اكىمى ماقتاارال اۋدانىنداعى ازاتتىق اۋىلىندا ورنالاسقان لوگيستيكالىق ورتالىققا ايالدادى. اگرارلى اۋداندا شارۋالاردىڭ ءونىمىن ساقتاپ، ءارى قاراي ساتۋ ءۇشىن قولايلى جاعداي جاساۋ ماقساتىندا قولعا الىنعان جوباعا 9 گەكتار جەر تەلىمى قاراستىرىلعان. ورتالىقتا جاڭا ۇلگىدەگى جەمىس-جيدەك ساقتاۋ جانە ۋاقىتشا سۇرىپتاۋ قويمالارى، مۇزداتقىش كامەرا مەن جۇك كولىكتەرىنە ارنالعان تۇراقجاي، تەحنيكالىق قىزمەت كورسەتۋ ستانساسىن سالۋعا جالپى قۇنى 1 ميلليارد تەڭگەگە جۋىق ينۆەستيسيا تارتۋ كوزدەلگەن. الداعى ۋاقىتتا اۆتوپاركينگ، ەلەكتروندى تارازى، جۇك ساقتاۋ قويمالارى، تۇراقجاي، قۇجاتتاندىرۋ ورتالىعى، قوناق ءۇي، اسحانا، ساۋدا ءۇيى، اۆتو جۋۋ ورنى سالىناتىن بولادى.
