مەملەكەت باسشىسى كاتار مەملەكەتىنىڭ دامۋ قورىنىڭ قولداۋىمەن سالىنعان №85 جاڭا مەكتەپ-ليسەيدىڭ وقۋ كابينەتتەرىن ارالاپ كورىپ، ونىڭ ماتەريالدىق-تەحنيكالىق بازاسىمەن تانىستى، سونداي-اق وقۋشىلارمەن اڭگىمەلەستى.
نۇرسۇلتان نازاربايەۆ جۋرناليستەر الدىندا سويلەگەن سوزىندە ەلىمىزدىڭ بارشا وقۋشىلارىن، ۇستازدار قاۋىمى مەن اتا-انالاردى ءبىلىم كۇنىمەن قۇتتىقتاپ، وسى سالتاناتتى ءىس-شارانىڭ ەلوردادا بوي كوتەرگەن جاڭا وقۋ ورداسىنىڭ قابىرعاسىندا ءوتۋىنىڭ سيمۆولدىق ءمانى بار ەكەنىن ايتتى.
– بۇگىندە رەسپۋبليكا بويىنشا 181 مەكتەپ سالىنىپ جاتىر. 23 مەكتەپتىڭ قۇرىلىسى اياقتالىپ، العاشقى وقۋشىلارىن قابىلدادى. قازاقستان بويىنشا 7 مىڭنان استام مەكتەپ 3 ميلليون وقۋشىعا ەسىك اشتى. سونىڭ 350 مىڭى – مەكتەپ تابالدىرىعىن العاش رەت اتتايدى، – دەدى قازاقستان پرەزيدەنتى.
ەلباسى XXI عاسىرداعى جوعارى تەحنولوگيالىق الەمدە ءىلىم-بىلىم يننوۆاسيانىڭ كىلتى جانە قازاقستان دامۋىنىڭ باستى رەسۋرسى سانالاتىنىن ايتىپ، مەملەكەتىمىز ءبىلىم بەرۋ سالاسىنا زور ءمان بەرىپ وتىرعانىنا توقتالدى.
مەملەكەت باسشىسى فۋنكسيونالدىق ساۋاتتىلىقتى دامىتۋعا باعىتتالعان ورتا ءبىلىمنىڭ جاڭارتىلعان مازمۇنىنا كوشۋ قاجەتتىلىگىن اتاپ ءوتىپ، وقۋشىلاردىڭ قازىرگى جاعدايدا العان بىلىمدەرى مەن ماشىقتارىن تاجىريبەدە قولدانا الۋعا ءتيىس ەكەنىنە نازار اۋداردى. بۇل پەداگوگتىڭ بىلىكتىلىگى مەن كاسىبيلىگىنىڭ جوعارى دەڭگەيدە بولۋىن تالاپ ەتەدى.
– مەملەكەت پەداگوگتاردى دايارلاۋ، ءبىلىم سالاسىنداعى ەڭبەكاقى جۇيەسىن جەتىلدىرۋ جونىندە جۇيەلى جۇمىس جۇرگىزىپ كەلەدى. وسى وقۋ جىلىنان باستاپ اتتەستاسيادان وتكەن مۇعالىمدەردىڭ جالاقىسى جاڭا جۇيە بويىنشا 30-50 پايىزعا ارتادى، – دەدى قازاقستان پرەزيدەنتى.
نۇرسۇلتان نازاربايەۆ زاماناۋي تەحنولوگيا ءداۋىرى مەن قازاقستاننىڭ ءۇشىنشى جاڭعىرۋىنىڭ تالاپتارى بالالارعا ساپالى ءبىلىم بەرىپ، ولاردىڭ تالداۋ جانە كرەاتيۆتى دامۋ قابىلەتىن قالىپتاستىرۋ ءۇشىن جاڭا مىندەتتەر قوياتىنىن اتاپ ءوتىپ، وقۋشىلاردىڭ اقپاراتتىق تەحنولوگيا مەن شەت تىلدەرىن ەركىن مەڭگەرۋى قاجەت ەكەنىنە نازار اۋداردى.
1200 ورىنعا ارنالعان ءبىلىم مەكەمەسىندە 48 كابينەت بار. جاراتىلىستانۋ-ماتەماتيكا باعىتىنداعى №85 مەكتەپ-ليسەيدىڭ وقىتۋ پروسەسى مەملەكەتتىك ءبىلىم ستاندارتىنىڭ تالاپتارىنا ساي يننوۆاسيالىق تەحنولوگيالاردى پايدالانۋ ارقىلى مەملەكەتتىك جانە ورىس تىلدەرىندە جۇرگىزىلەدى.
