بۇگىن الماتىلىقتار كونستيتۋسيا كۇنىن اتاپ ءوتىپ جاتىر. قالانىڭ جەتىسۋ اۋدانى قاستەرلى مەيرامدى بارشا تۇرعىنىمەن بىرگە «گۇلدەر» ساياباعىندا تويلادى. بۇل كۇنگە ارنايى كونسەرتتىك باعدارلاما دايىندالىپ، دەنەنى شىنىقتىراتىن سپورتتىق شارالار ۇيىمداستىرىلعان. 

سونداي-اق، زاڭ سالاسىندا ايانباي ەڭبەك ەتىپ جۇرگەن اۋدان قىزمەتكەرلەرى ماراپاتتالدى. وعان قوسا، ءبىلىم كۇنى قارساڭىندا 350-دەن استام از قامتىلعان وتباسى بالالارىنا مەكتەپكە قاجەتتى سومكە مەن جابدىقتار تەگىن تاراتىلدى. 4 مىڭعا جۋىق حالىقتىڭ باسىن قوسقان دۋمان كەشكە دەيىن جالعاسپاق.  

«اتا زاڭ. ودان ارتىق قاستەرلەيتىن زاڭ جوق. سوندىقتان، بارشاڭىزدى شىن جۇرەكتەن قۇتتىقتايمىن! ەلىمىز امان، جۇرتىمىز تىنىش بولعاي! بۇگىن تاڭ اتپاستان 30 شاقتى ارداگەرىمىز وسى جەردە «بەلسەندى ۇزاق عۇمىر» باعدارلاماسىنىڭ اياسىندا ۋ-شۋمەن اينالىسىپ جاتىر. ءدال ءقازىر سكانديناۆتىق جۇگىرۋ ءوتىپ جاتىر. اسىق اتۋ، قازاقتىڭ ۇلتتىق ويىندارى دا قاتار وتۋدە»، – دەدى الماتى قالاسى جەتىسۋ اۋدانى اكىمىنىڭ ورىنباسارى ۆياچەسلاۆ ۆاۆيلين.

مەرەكەلىك كوڭىل-كۇي اۋەزوۆ اۋدانىندا دا وتە كوتەرىڭكى بولدى. بۇگىن اۋداندا تۇراتىن قوس انا كۇمىس القا يەلەنىپ، قۋانىشقا كەنەلدى. ال 16 جاسقا تولعان ون شاقتى جاسوسپىرىمگە العاشقى ءتولقۇجات تابىستالدى. حالىق باستى قۇجاتتىڭ قۇندىلىعىن جەتە ءتۇسىنىپ، تاۋەلسىز مەملەكەت بولىپ قالىپتاسۋىمىزعا اتا زاڭنىڭ ۇلەسى كوپ دەپ بىلەدى. سوندىقتان، قۇقىعىمىزدى وزگەگە تاپتاتپاي، ەڭسە تىكتەدىك دەيدى.

«بارشا قازاقستاندىقتاردى جانە الماتى تۇرعىندارىن، اۋەزوۆ اۋدانىنىڭ تۇرعىندارىن بۇگىنگى كونستيتۋسيا كۇنىمەن شىن جۇرەكتەن قۇتتىقتايمىز. وسىنداي جاس بالالارىمىزدان باستاپ، ۇلكەن بۋىن ازاماتتارىمىزعا دەيىن وسى زاڭىمىزدى ءارقاشاندا قولدانىپ، قاستەر تۇتىپ جۇرۋگە، سول زاڭدى ساقتاپ جۇرۋگە شاقىرامىن. ال اۋدانىمىزعا ءبىر ادامداي ەڭبەك ءسىڭىرىپ، ۇلەس قوسىپ جۇرگەن ازاماتتار اۋدان اكىمىنىڭ قۇرمەت گراموتاسىن الدى»، – دەدى الماتى قالاسى اۋەزوۆ اۋدانى اكىمىنىڭ ورىنباسارى داستان قايرات ۇلى.