اقتوبەدە 52 وزبەكستان ازاماتىنىڭ ءومىرىن جالماعان اۆتوبۋستاعى ورتكە قاتىستى سوت وتىرىسى باستالدى. العاشقى وتىرىسقا قاتىسۋعا كورشى ەلدەن مارقۇمداردىڭ تۋىستارى دا كەلدى. ولار پروسەسس باستالماي جاتىپ-اق جاقىندارىنىڭ تىرىدەي جانىپ كەتكەنىنە سەنبەيتىنىن مالىمدەدى. ال ايىپتالۋشى دەپ تانىلعان اۆتوبۋستىڭ ءۇش جۇرگىزۋشىسىنىڭ قورعاۋشىلارى ولاردى اقتاپ شىعۋدى تالاپ ەتتى. 

وسىدان سەگىز اي بۇرىن اقتوبە وبلىسىندا اۆتوبۋستا تىرىدەي جانىپ كەتكەن وزبەكستاننىڭ 52 ازاماتىنىڭ بارلىق جاقىندارىنا جابىرلەنۋشى رەتىندە سوتتان شاقىرتۋ جىبەرىلىپتى. ءبىراق جەردىڭ شالعايلىعىنا بايلانىستى باسىندا جولعا فەرعانادان  شىققان 25 ادامنىڭ اقتوبەگە 11ء-ى عانا بيلەت تاۋىپ جەتكەن. ەندى  سوتتىڭ اقىرىنا دەيىن وسىندا بولامىز دەپ وتىر. 

"11 ادام بولىپ ءقازىر پاتەر جالداپ جاتىرمىز. سەگىز ايدان بەرى تەرگەۋدىڭ قالاي جۇرگەنىنەن، كىمدى ايىپتاپ جاتقانىنان بەيحابارمىز. وقيعانىڭ قالاي بولعانىن بىلگىمىز كەلەدى. 19 جاستاعى ۇلىم قىرشىن كەتتى"، — دەيدى باقتيار عاريپوۆ.

پروسەسس باستالماي جاتىپ، سۋديا قايتا-قايتا ءۇزىلىس جاريالاۋمەن بولدى. ويتكەنى جابىرلەنۋشىنىڭ بىردە-بىرى قازاقشا تۇسىنبەيدى ەكەن. ال وزبەكشەگە اۋداراتىن ءتارجىماشى اقتوبەدە اتىمەن جوق. سوندىقتان ورىس تىلىنە اۋدارىپ بەرەتىن بولىپ كەلىستى. كورشى ەلدەن كەلگەندەردىڭ بارلىعى دەرلىك جاقىندارىنىڭ اۆتوبۋستا تىرىدەي جانىپ كەتكەنىنە سەنبەيدى، دەپ حابارلادى كتك.

"بۇل ءبىر بولىپ جاتقان قويىلىم سياقتى. ۇلدارىمىزدىڭ تابىتىن اكەلگەن كەزدە بىزگە اشتىرمادى. دنك ساراپتاماسىنىڭ ناتيجەسىن كورسەتپەدى. جاقىندارىمىزدىڭ اۆتوبۋستا جانىپ كەتكەنى راس بولسا، نەگە تەرگەۋ كەزىندە دالەل كەلتىرمەدى؟"، — دەپ اتاپ ءوتتى  وبورجون حاكيموۆ.

جابىرلەنۋشىلەردىڭ كۇدىكتەن كۇيىنەتىندەي جاعدايلارى بار. ويتكەنى، مارقۇمداردىڭ كەيبىرىنىڭ ۇيالى تەلەفوندارى وسى كۇنگە دەيىن قوسۋلى تۇر ەكەن. 

"وسىندا قينالىپ ارەڭ جەتتىم. ۇلىم مەن نەمەرەمدى ىزدەپ كەلدىم. ولاردىڭ ولگەنىنە سەنبەيمىن. ويتكەنى ۇيالى تەلەفوندارى ءالى كۇنگە دەيىن ىستەپ تۇر. قوڭىراۋ سوقساڭ ەشكىم كوتەرمەيدى. بۇل جاعدايدى قالاي تۇسىنەمىز؟ ادام ورتەنگەندە، ۇيالى تەلەفوندارى دا جانىپ كەتۋى كەرەك قوي"، — دەپ اشىندى يۋلدۋزحون عانييەۆا.

ەندى وقيعانىڭ قالاي بولعانىن اۆتوبۋس ورتەنگەندە ءتىرى قالعان ءۇش جۇرگىزۋشى ايتىپ بەرۋى كەرەك. ءقازىر ولار ايىپتالۋشى رەتىندە قاماۋدا وتىر. ولاردان بولەك سوتقا شىمكەنتتەگى اۆتوپارك باسشىسى مەن مەحانيگى جاۋاپ بەرۋگە قولحاتپەن قاتىناپ ءجۇر. تەك ورتەنگەن اۆتوبۋستىڭ قوجايىنى جوق. وعان حالىقارالىق ىزدەۋ جاريالانعان. قورعاۋشىلار وقيعانىڭ انىق-قانىعىن انىقتاۋ ءۇشىن ەڭ الدىمەن اۆتوبۋستا ءتىرى قالعان وزبەكستاندىق ەكى جولاۋشىنى تىڭداۋ كەرەك دەپ وتىر. 

"تۋىستان ايىرىلعان وڭاي ەمەس. ءبىراق ءۇش جۇرگىزۋشىنى كىنالاي بەرۋگە دە بولمايدى. بۇل جەردە ەكى كۋاگەر بار عوي. وزبەكستان ازاماتى. دۇرىس پا؟ سول ادامدار شاقىرتىلۋى كەرەك ەدى"، — دەيدى ايىپتالۋشىنىڭ ادۆوكاتى نۇرشات پەرنەبەكوۆا.

سەگىز اي بۇرىن اۆتوبۋستا امان قالعان ەكى وزبەكستان ازاماتى سوت وتىرىسىن  وزدەرىن قاتىستىرماي جۇرگىزۋگە ارىز بەرگەن. ءبىراق ولاردىڭ كۋالىك ەتۋىن قوس تاراپ تا تالاپ ەتىپ وتىر. ەندى ولاردىڭ پروسەسسكە قاتىسۋ، قاتىسپاۋىن سوت شەشەدى.