الماتىدا اۋداندىق ىشكى ىستەر باسقارمالارىنىڭ قورشاۋلارى ءبىرىڭعاي ستيلدە بولادى. مۇنداي قورشاۋ ءقازىر ناۋرىزباي اۋداندىق ىشكى ىستەر باسقارماسىندا تۇر. وعان قوسا، فرونت-كەڭسەلەر دە بوي كوتەرەدى. اينەكتەن جاسالعان قابىلداۋ كابينەتتەرىنە كەلگەن تۇرعىندارعا قىلمىستىق جانە اكىمشىلىك پوليسيا قىزمەتكەرلەرى كەڭەس بەرەدى. وسىلايشا ازاماتتار ءتارتىپ ساقشىلاردان كوكەيدەگى ساۋالعا تەز جاۋاپ الۋعا مۇمكىندىك الادى. سونداي-اق ارنايى بەكەتتەر دە سالىنادى. ونىڭ قۇرىلىسى 2019 جىلى باستالماق. 

«قازىرگى تاڭدا ىشكى ىستەر باسقارماسىنىڭ قورشاپ جاتقان قورشاۋلارى مەملەكەتتىك بيۋدجەتتەن بىردە-بىر تيىن شىعارىلماي سالىنعان بولاتىن. جەتەكشىلەردىڭ وزدەرىمەن. ءوز كۇشتەرىمەن. ال كەلەر جىلعا وسى قورشاۋلاردى سالۋ ءۇشىن مەملەكەتتىك قازىنادان 614 ميلليون تەڭگەگە جۋىق قاراجات ءبولىندى»، – دەدى الماتى قالالىق ءىىد رەسمي وكىلى سالتانات ازىربەك.

ىشكى ىستەر دەپارتامەنتىنىڭ جەدەل باسقارۋ ورتالىعىندا قىزمەتكەرلەر سانى ارتادى. قوسىمشا 4 جۇمىس ورنى اشىلعان. قازىرگى تاڭدا ورتالىقتا 10 وپەراتور جۇمىس ىستەيدى. ودان بولەك، 13 ادام ىس-تاجىريبەدەن ءوتىپ جاتىر. ورتالىق قىزمەتكەرلەرى ءقازىر 12 ساعاتتىق جۇمىس كەستەسى بويىنشا قىزمەت ەتۋدە. اۋىسىممەن جۇمىس جاسايتىندىقتان بوس ۆاكانسيا بار دەيدى ورتالىق باسشىلارى. جالاقى 40 مىڭ تەڭگەدەن باستالادى. قالاداعى كولىك قوزعالىسى مەن قوعامدىق قاۋىپسىزدىكتى سىرتتاي باقىلاپ وتىرادى. سونداي-اق ءتۇرلى جاعدايعا تاپ بولعان ازاماتتاردىڭ قوڭىراۋىن قابىلداپ، جەدەل ارەكەت ەتۋ دە وسى قىزمەتكەرلەردىڭ مىندەتى.  

«قازىرگى كەزدە جاساپ جاتقان اناليزگە قاراعاندا، كۇنىنە 12 ساعاتتىڭ ىشىندە كۇندىزگى كەزدە 1000-نان استام حابارلاما تۇسەدى. تۇندە دە سولاي. ءار اپتادا ءار ءتۇرلى حابارلامالار تۇسەدى. جالپى، ەڭ از دەگەنى مىڭنان اسادى. وپەراتورلاردىڭ ءبىلىمى جاعىنان قۇقىقتىق كودەكستەردى ءبىلۋى ماڭىزدى، قالانى ءبىلۋى كەرەك. قالادا باعىت-باعدار جاساي الۋى كەرەك. قالانى بىلمەسە قيىنداۋ بولادى. دۇرىس باعدار جاساسا، حابارلاما دا تەز جەتەدى»، – دەدى الماتى قالالىق ءىىد جەدەل باسقارۋ ورتالىعى باسشىسىنىڭ ورىنباسارى مۇحتار اشەيەۆ.