اتا زاڭىمىز قابىلدانعان قاسيەتتى كۇن، ياعني كونستيتۋسيا كۇنى الماتى قالاسىندا اتالىپ ءوتتى. بۇگىن رەسپۋبليكا سارايىندا بولعان سالتاناتتى جيىننىڭ شىمىلدىعىن قالا اكىمى باۋىرجان بايبەك اشىپ بەردى. ول اتا زاڭنىڭ بۇگىنگى كۇن مەن بولاشاق ءۇشىن قابىلدانعانىن جانە جىلدان جىلعا ەل ازاماتتارىنىڭ قۇقىقتىق مادەنيەتىن جوعارىلاتۋ جولىندا ىرگەلى جۇمىستار اتقارىلىپ كەلە جاتقانىن باسا ايتتى.

قۇقىقتىق، زاڭدىلىق ماسەلەلەرىن عالامتور ارقىلى شەشۋ دە ويداعىداي جۇزەگە اسىرىلۋدا. ول ءۇشىن ارنايى «ەلەكتروندىق ۇكىمەت» پورتالى قۇرىلعانى بارشاعا ايان. باۋىرجان بايبەك الماتى قالاسىن تۇرعىندارعا بارىنشا جايلى شاھار ەتۋ ءۇشىن جاسالىپ جاتقان شارالارعا توقتالىپ ءوتتى.  

«ايتا كەتەيىك، بيىل جاڭا وقۋ جىلىنا بولىنگەن گرانتتار سانى 17 پايىزعا ءوسىپ، 22 مىڭدى قۇرادى. ياعني، رەسپۋبليكا كولەمىندەگى گرانت سانىنىڭ 30 پايىزى الماتى قالاسىنىڭ جوعارى وقۋ ورىندارىنا بەرىلگەن. قازىرگى قولدانىلىپ جۇرگەن كونستيتۋسيا 1995 جىلى 30 تامىزدا بۇكىلحالىقتىق رەفەرەندۋم ارقىلى قابىلدانعانىن ايتا كەتۋ كەرەك. وعان دەيىن ياعني، قازاقستان تاۋەلسىزدىگىن العاننان كەيىنگى 1993 جىلدىڭ 28 قاڭتارىندا ءوزىنىڭ العاشقى اتا زاڭىن قابىلداعان بولاتىن»، – دەدى الماتى قالاسىنىڭ اكىمى باۋىرجان بايبەك.

زاڭناماعا سايكەس، 30 تامىز كونستيتۋسيا كۇنى – دەمالىس كۇنى ەكەنى بەلگىلى. بيىل مەرەكە بەيسەنبىگە ءتۇسىپ تۇرعاندىقتان، ۇكىمەت قاۋلىسىمەن، 25 تامىزداعى دەمالىس كۇنى 31 تامىزعا اۋىستىرىلدى. وسىلايشا، اپتاسىنا بەس كۇن جۇمىس ىستەيتىن قازاقستاندىقتار 30 تامىزدان 2 قىركۇيەككە دەيىن 4 كۇن دەمالادى.