قازاقستان پرەزيدەنتى الماتى قالاسىنا جۇمىس ساپارى بارىسىندا جاياۋ جۇرگىنشىلەر مەن ۆەلوسيپەدشىلەر ءۇشىن ينفراقۇرىلىمى قايتا جاساقتالعان اباي جانە نۇرسۇلتان نازاربايەۆ داڭعىلدارىن ارالاپ كوردى. بۇل تۋرالى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەە جاساپ حابارلادى. 

قالا اكىمى باۋىرجان بايبەك مەملەكەت باسشىسىنا شاھار تىرشىلىگىن ساۋلەت-قۇرىلىس جۇرگىزۋ تۇرعىسىنان رەتتەۋ ءۇشىن پيلوتتىق رەجىمدە ەنگىزىلگەن جاڭا ديزايىن-كود ءادىسى جونىندە مالىمدەدى. بۇل ءادىس مەگاپوليستىڭ ءبىرىڭعاي ءستيلىن قالىپتاستىرۋعا ارنالعان ءارى ءبىر قۇجاتتا ناقتىلانعان ەرەجەلەر مەن ۇسىنىمداردى ايقىندايدى.

سونىمەن قاتار، نۇرسۇلتان نازاربايەۆ جالپى ۇزىندىعى 8،7 شاقىرىمدى قامتيتىن تيميريازيەۆ جانە جاندوسوۆ كوشەلەرىنىڭ بويىمەن تارتىلعان BRT كوشە-جول جەلىسىمەن تانىستى.

بۇدان بولەك، مەملەكەت باسشىسى الماتى قالاسىنىڭ يندۋستريالىق ايماعىن ارالاپ كوردى.

قازاقستان پرەزيدەنتىنە الماتى قالاسىنىڭ يندۋستريالىق ايماعىنداعى جۇمىس ناتيجەلەرى مەن ونى دامىتۋدىڭ پەرسپەكتيۆالىق جوسپارلارى جونىندە مالىمدەلدى.

نۇرسۇلتان نازاربايەۆ جوعارى تەحنولوگيالى توك وتكىزگىش كابەل ونىمدەرىن شىعاراتىن «كمك Investment» جاۋاپكەرشىلىگى شەكتەۋلى سەرىكتەستىگىنىڭ وندىرىستىك سيكلىمەن، سونداي-اق دايىن ءونىم ۇلگىلەرىمەن تانىستى.

كاسىپورىن جۇمىسشىلارىمەن اڭگىمەلەسكەن ەلباسى وندىرىستە ەۋروپالىق ساپاعا ساي باسەكەگە قابىلەتتى ءونىم شىعارۋعا مۇمكىندىك بەرەتىن زاماناۋي تەحنولوگيا مەن قۇرىلعىلار قولدانۋدىڭ ماڭىزدىلىعىن اتاپ ءوتتى.

مەملەكەت باسشىسى «Tokyo Rope Almaty» جاۋاپكەرشىلىگى شەكتەلۋ سەرىكتەستىگىنىڭ زاۋىتىندا مەتالل گابيون تورىن جاسايتىن اۆتوماتتاندىرىلعان وندىرىسپەن تانىسىپ، دايىن ءونىم ۇلگىلەرىن كوردى.