اقتوبەلىك شەنەۋنىكتەر وقۋشىلارعا الىپپە تاۋىپ بەرە الماي الەككە ءتۇسىپ جاتىر. ءبىلىم بولىمىندەگىلەر ءبىرىنشى سىنىپقا باراتىن وقۋشىنىڭ سانىنان شاتاسىپ، باسپاحاناعا دۇرىس تاپسىرىس بەرمەگەن. سونىڭ سالدارىنان مەكتەپ تابالدىرىعىن ەندى اتتاعان بالالاردىڭ جارتىسىندا ءبىر ايدان بەرى وقۋلىق جوق دەپ حابارلايدى Qamshy.kz اقپارات اگەنتتىگى كتك تەلەارناسىنىڭ دەرەگىنە سۇيەنىپ.
«قالا شەتىندەگى مەكتەپتىڭ ءبىرىنشى سىنىپ وقۋشىلارى ءبىر ايدان بەرى ءالى الىپپەنىڭ بەتىن اشپاعان. تەگىن تاراتىلاتىن وقۋلىق بۇلارعا جەتپەي قالىپتى. ماتەماتيكا مەن ساۋات اشۋ وقۋلىعى دا جوق»، - دەيدى تۇرعىن گۇلباحرام ەلبايەۆا.
وقۋلىقتىڭ جوقتىعىنان مۇعالىمدەر دە قينالىپ كەتكەن. وتكەن ساباعىنىڭ تاپسىرماسىن سۋرەتكە ءتۇسىرىپ، اتا-انالارعا ۇيالى تەلەفون ارقىلى تارتۋعا ءماجبۇر. ودان قالدى كوشىرمە جاسايدى.
ءقازىر تەك ءبىر مەكتەپتىڭ ەمەس، قالاداعى ءبىرىنشى سىنىپقا باراتىن مىڭ جارىم وقۋشىنىڭ وقۋلىعى جوق. شەنەۋنىكتەر بالا سانىنان «شاتاستىق» دەپ وتىر. ويتكەنى، ءبىلىم مينيسترلىگى بيىل التى جاسقا تولماعان بۇلدىرشىندەرگە دە ساباققا كەلۋگە رۇقسات بەرگەن. سوندىقتان مەكتەپ تابالدىرىعىن جاڭا اتتاعان شاكىرتتەردىڭ سانى كوبەيىپ، كىتاپ جەتپەي قالىپتى.
«ءبىز توعىز مىڭداي بالا العاش پارتاعا وتىرادى دەپ جوسپارلاعان ەدىك. ەندى ءبىلىم مينيسترلىگىنىڭ بۇيرىعىنان كەيىن تاعى مىڭ جارىم بالا قوسىلدى. سول سەبەپتى كىتاپ جەتپەي قالدى»، - دەيدى ءبىلىم ءبولىمى باسشىسىنىڭ ورىنباسارى دينا حالەتوۆا.
ءبىرىنشى سىنىپ وقۋشىلارىنا جەتپەي قالعان وقۋلىققا جەرگىلىكتى بيۋدجەتتەن شۇعىل تۇردە 100 ميلليون تەڭگە ءبولىنىپتى. ءبىراق ول اقشاعا قاشان كىتاپ جەتكىزەتىنى ءازىر بەلگىسىز. ال تامىز ءماسليحاتىندا ءبىلىم سالاسىنا جاۋاپتى شەنەۋنىكتەر ايماقتاعى بارلىق وقۋشىنى تەگىن وقۋلىقپەن تولىق قامتىدىق دەگەن ەدى.
