مەكتەپ تۇلەكتەرىنەن ۇلتتىق ءبىرىڭعاي تەستىلەۋگە قاتىسۋعا ءوتىنىش قابىلدانا باستادى. استانالىق كەيبىر اتا-انا “مۇعالىمدەر بالامىزدى تەستىلەۋگە جىبەرگىسى كەلمەيدى” دەگەن شاعىم ايتتى.

استاناداعى № 4 مەكتەپتىڭ 11- سىنىپ وقۋشىسى اڭسار بەيسەنبەك بولاشاق ماماندىعىن ءالى تاڭداماعان. ونىڭ اكەسى سارسەنبەك بەيسەنبەك بالاسىن “مەكتەپ باسشىلارى ۇلتتىق ءبىرىڭعاي تەستىلەۋگە (ۇبت-عا) جىبەرگىسى كەلمەي وتىرعانىن” ايتىپ شاعىمداندى.

“ۇلىم كەرەمەت وقيدى دەپ ايتپايمىن. ءبىراق دايىندىق تەستىلەۋدە 70 ۇپايعا دەيىن الىپ ءجۇر. ال مەكتەپ ديرەكتورى ورىنباسارى “جوو-عا تۇسكىلەرىڭىز كەلسە، قازاق-رەسەي ۋنيۆەرسيتەتىنە بارىڭىزدار، ول جەرگە ۇبت قورىتىندىسى قاجەت ەمەس، اتتەستاتپەن قابىلدايدى. ۇلىڭىز تەست تاپسىرا المايدى جانە مەكتەپتىڭ ۇلگەرىم كورسەتكىشىن تومەندەتەدى”، – دەگەن جاۋاپ الدىم دەيدى سارسەنبەك بەيسەنبەك.

ءبىراق سارسەنبەك بەيسەنبەك وزىنەن سۇراعان [ۇبت تاپسىرمايمىز دەگەن] وتىنىشتەرىن جازباي كەتىپ قالعان.

ال بۇل مەكتەپتىڭ ديرەكتور ورىنباسارى ايگۇل قاشايەۆا مۇنى تەرىسكە شىعاردى. ونىڭ ايتۋىنشا، “وقۋشىعا ۇبت-عا قاتىسپا” دەگەن تالاپتى ەشكىم قويا المايدى. وندايعا مەكتەپ باسشىلىعىنىڭ، مۇعالىمدەردىڭ قۇقىعى جوق”. قاشايەۆانىڭ ايتۋىنشا، ۇبت-عا بايلانىستى مەكتەپ وكىلدەرى اتا-انالارمەن كەزدەسۋ وتكىزە باستاعانى راس، ءبىراق ونداعى اڭگىمەنىڭ مازمۇنى باسقا.

مەكتەپ باسشىلىعىنىڭ ايتۋىنشا، بيىل № 4 ورتا مەكتەپتى 96 وقۋشى بىتىرەدى. ولاردىڭ دەنى ۇبت تاپسىرماق. الايدا وسى مەكتەپتىڭ 11-سىنىپ وقۋشىسى سەرىك نۇرماعامبەتوۆ ازاتتىققا “تەست تاپسىرمايتىنىن” ايتتى.

ونىڭ سوزىنە قاراعاندا، مۇعالىمدەر “ۇبت-عا قاتىسپا!” دەگەن. ال وقۋشىنىڭ اناسى گۇلباقىت نۇرماعامبەتوۆا “مۇعالىمدەر ءوزىن شاقىرتىپ، بالاسىنىڭ ۇلگەرىمى ناشار ەكەنىن، تەستىلەۋدەن وتە المايتىنىن ەسكەرتكەنىن” ايتادى.

قۇلاعىمدى جەپ قويعان سوڭ تەست تاپسىرماۋ جونىندە سۇراعان ءوتىنىشىن جازىپ بەرىپ تىنىشتالدىق

“قۇلاعىمدى جەپ قويعان سوڭ تەست تاپسىرماۋ جونىندە سۇراعان ءوتىنىشىن جازىپ بەرىپ تىنىشتالدىق”، – دەيدى گۇلباقىت نۇرماعامبەتوۆا .

استانا مەكتەپتەرىنىڭ بىرىندە التى جىل ءمۇعالىم بولىپ ەڭبەك ەتكەن تىنىشتىق قىدىربايەۆا “ۇلگەرىمى ناشار وقۋشىنى ۇبت-عا قاتىستىرماۋ جايىندا مەكتەپ ىشىندە اتا-انامەن وڭاشا اڭگىمە جۇرەتىنىن” جاسىرمايدى.

ونىڭ ايتۋىنشا، “ونداي اڭگىمەنىڭ شىعۋىنا مەكتەپتىڭ ۇبت-دان شىعاتىن كورسەتكىشى كىنالى”. تۇلەكتەردىڭ “كورسەتكىشى تومەن بولسا، مۇعالىمدەر سۇيكىمسىز اتانىپ، “ورنىڭنان كەتەسىڭ”، “كاتەگورياڭىز ءبىر ساتىعا تومەندەيدى” دەگەندەي سوگىس الىپ، مەكتەپتى تەكسەرەتىن كوميسسيا جيىلەيدى” ەكەن.

الايدا استانا قالاسى ءبىلىم باسقارماسى ورتا ءبىلىم بەرۋ ءبولىمى باسشىسى بوتاگوز ءجۇنىسوۆانىڭ سوزىنە قاراعاندا، تۇلەكتەر دە، اتا-انالار دا ۇبت-عا قاتىسۋ-قاتىسپاۋ تۋرالى شەشىمدەرىن وزدەرى قابىلدايدى.

ءبىرى “شەتەلدە وقيمىن”، ەندى ءبىرى “تاپسىرمايمىن” دەپ ءوتىنىش جازىپ تاستايدى. سوڭىندا ءبىرىنىڭ شەتەلگە اقشاسى جەتپەي قالادى. ەكىنشىسى تاۋەكەلگە بەل بايلاپ، تەست تاپسىرماق بولادى. ال بالاسى مەكتەپتى بيىل بىتىرەتىن سارسەنبەك بەيسەنبەك “ۇبت تاپسىرمايمىن” دەگەن ءوتىنىشتى ءبارىبىر جازبايمىن. بالام باعىن سىنايدى. مۇعالىمدەردىكى دۇرىس ەمەس. مينيستر بلوگىنا جازىپ جىبەردىم” دەيدى.