اقتاۋدا تەاتر اكتريساسى باسشىسىن جىنىستىق قاتىناسقا ماجبۇرلەدى دەپ ايىپتادى

/uploads/thumbnail/20170708174255767_small.jpg

شىمىلدىق سىرتىنداعى شىتىرمان وقيعا! اقتاۋدا وبلىستىق دراما تەاتردىڭ اكتريساسى مادەنيەت وشاعىنىڭ باسشىسىن قىزمەتكەرلەرىن جىنىستىق قاتىناسقا ماجبۇرلەيدى دەپ ايىپتادى.

باستى ءرولدى اكتەرلىك شەبەرلىك ەمەس، توسەكتەگى “ونەرى” ءۇشىن بەرەدى دەگەن اكتريسا بۇرىنعى جۇمىس ورنىن “جەزوكشەلەر مەكەنى” دەپ اتادى دەپ حابارلايدى كتك ارناسى. تەاتر باسشىلىعى ارينە وزدەرىنە شاڭ جۋىتقان جوق. ەندى تاراپتار ماسەلەنى سوتتا شەشپەك. كلاسسيكالىق جانجال، دراما، تراگەديا جانە شىتىرمان وقيعا. مۇنىڭ ءبارى ماڭعىستاۋ دراما تەاترىنىڭ ساحناسىندا ەمەس، سىرتىندا ءوربىپ جاتىر. دينا احمەتجان ونەر ورداسىندا 11 جىل ەڭبەك ەتىپتى. سودان بەرگى ىشىندە ساقتاپ جۇرگەن سىرىن ءقازىر اشىپ وتىر. ايتۋىنشا، تەاتر ديرەكتورى بىرنەشە جىلدان بەرى ءسوز سالىپتى. اكتريسا باستىعىنا اشىنا بولۋدان باس تارتىپ، جۇمىستان قاعىلعان كورىنەدى.

ماعان باسشى اشىقتان-اشىق، مەنىڭ كوڭىلىمنەن شىعۋىڭ كەرەك، ياعني توسەكتەس بول دەدى. كەلىسكەن جوقپىن

“ماعان باسشى اشىقتان-اشىق، مەنىڭ كوڭىلىمنەن شىعۋىڭ كەرەك، ياعني توسەكتەس بول دەدى. كەلىسكەن جوقپىن. سوسىن مەنىڭ كىم ەكەنىمدى بىلەسىڭ بە، ءبارى مەنى جاقتايدى، سەنى ءبىر-اق كۇندە قۋىپ جىبەرەمىن دەپ ايتتى”، – دەيدى اكتريسا دينا احمەتجان. ال بۇل ماسەلەنىڭ ۋشىعۋىنا ديرەكتوردىڭ كوڭىلدەس بولۋعا جاساعان ۇسىنىسى ەمەس، باسپانا جايى سەبەپ بولىپ تۇر. دينانىڭ ءوز ءۇيى بولماعان. قىزمەتتىك پاتەر الۋى كەرەك ەكەن. وتكەن جىلى وعان تەاتر باسپانا ساتىپ الىپ بەرىپتى. ءبىراق 700 مىڭ تەڭگەسىن وزىنە تولەتكەن. سودان سوڭ، جۇمىستان شىعارا سالىپتى. “بۇل جەردە ديرەكتور نۇرنياز مۇقانوۆ پەن تەاتر رەجيسسەرى گۇلسينا ميرعالييەۆا پاتەردى ياعني تەك ءوزى جاقسى كورەتىن ادامدارىنا عانا بەرەدى. كوڭىلىنەن شىققان ادامدار اتاق، پاتەر الادى”، – دەدى دينا احمەتجان.

ءسويتىپ، تەاتر پاتەرىن دە بەرمەگەن، تولەگەن اقشاسىن دا قايتارماپتى. ءومىر سپەكتاكلىنىڭ بۇلايشا بىتۋىنە قارسىلىق تانىتقان اكتريسا، جۇمىستان زاڭسىز شىعاردى دەپ سوتقا ارىز جازعان. الايدا جەڭىلىپ قالدى.

“قارالاۋ دەيتىن بولادى. اكتەر مەن اكتريسالار مەنى اكە دەيدى. سولاردان قالعان بالالار نەمەرەم. بۇنى ايتۋدىڭ ءوزى ۇيات”، – دەپ وتىر نۇرماحان ءجانتورين اتىنداعى دراما تەاترىنىڭ ديرەكتورى نۇرنياز مۇقانوۆ. وزدەرىنە لاس ايىپ تاققانىنا قاراماستان تەاتر ۇجىمى بۇرىنعى ارىپتەسىنىڭ ونەرىن جوعارى باعالايدى. رەجيسسەردىڭ سوزىنە سەنسەك، ول ارتىستىك شەبەرلىگىن ساحنادان تىس كەزدە دە قولدانادى ەكەن. “ول مەنىڭ كينوما ءتۇستى. ايايتىنمىن. ءبىر كەزدەرى كۇيەۋىمەن اجىراسىپ ءجۇردى. وعان باستى رولدەردى اياماي بەردىم. قىز جىبەكتى، بايان سۇلۋدى وينادى. ادامنىڭ اياۋشىلىعىن تۋدىرا الاتىن اكتريسا بولىپ تۇر عوي. ءتىپتى كۇلكىلى ەكەن”، – دەيدى نۇرماحان ءجانتورين اتىنداعى دراما تەاترىنىڭ رەجيسسەرى گۇلسينا ميرعالييەۆا. ەندى قوس تاراپ سوتتا كەزدەسەتىن بولدى. دينا احمەتجان باسپانا مەن اقشاسىن قايتارىپ الۋعا تالپىنىپ جاتىر. ال تەاتر ديرەكتورى بۇرىنعى قىزمەتكەرىن جالا جاپقانى ءۇشىن جازاسىن بەرمەك.

قاتىستى ماقالالار