2018 جىلعى 15 قاراشادا «الاتاۋ» ءداستۇرلى ونەر تەاترىنىڭ العاشقى قويىلىمى «جىر-جولبارىس» (جامبىل. ءومىر كەزەڭدەرى) كورەرمەن نازارىنا ۇسىنىلدى. قويىلىمدا حالىق اۋىز ادەبيەتىنىڭ حح عاسىرداعى الىبى، اقىن، ەپيك جىرشى جامبىل  ءومىرىنىڭ كەيبىر كەزەڭدەرى ونىڭ ايتىسكەر اقىن، ەل مۇڭىن جىرلايتىن تۇلعا رەتىندە قالىپتاسۋى ساحنالاندى.

ءسۇيىنبايداي جىر دۇلدۇلىنەن ءتالىم العان جامبىل – شىنايى، تازا شىندىقتى كوركەم سۋرەتتەگەن اقىن. جامبىلدى ءدۇيىم جۇرتقا تانىتقان – ونىڭ سۋىرىپ سالما ايتىستان باستالعان وتتى ولەڭدەرى ەدى.  جامبىلدىڭ جانىس، شىبىل، بولتىرىك، قۇلمانبەت، شاشۋبايمەن ايتقان ايتىستارى قازاق ادەبيەتىنىڭ التىن قورىنا ەندى. سونداي-اق، قىرعىز ەلىنىڭ توقتاعۇل، مۇراتالى، ءالىمقۇل، بالىق، تىنىبەك، قاتاعان سياقتى اقىندارىمەن دە ايتىسقانى بەلگىلى. سونىمەن قاتار، جامبىل مۇرالارىنىڭ ىشىندە قىز بەن جىگىتتىڭ قايىم ايتىسى دا، تۇرە ايتىس تا، سۇرە ايتىس تۇرلەرى دە بار. وسىنىڭ قاي-قايسىسىندا دا جامبىل ءوزىنىڭ ناعىز مايتالمان، كەستەلى ءسوزدىڭ شەبەرى ءارى ۇشقىر ويلى، تاپقىر شەشەن ەكەنىن دالەلدەگەن ءىرى تۇلعا.

پەسانى جازۋ بارىسىندا تەاتر ديرەكتورى ب. ءجۇسىپوۆ باستاعان شىعارماشىلىق توپ جامبىل ەلىنە بارىپ، اقىننىڭ مۋزەيىن ارالادى. مۋزىكالىق قويىلىمنىڭ كەڭەسشىسى، جامبىلدىڭ كوزىن كورگەن شاشتاي اقساقالدىڭ ۇلى جۇماباي شاشتايۇلىمەن دە بىرنەشە كەزدەسۋ وتكىزىپ، پەسانىڭ بارىسىن تالقىلادى. وسىنداي ىزدەنىستەردىڭ ناتيجەسىندە قويۋشى-رەجيسسەر ەسلام نۇرتازين مەن پەسانىڭ اۆتورى ءانناس باعدات «جىر-جولبارىس» قويىلىمىنا XIX عاسىردىڭ اياعى مەن XX عاسىردىڭ باستاپقى كەزەڭىندەگى قوعامنىڭ شيەلەنىسكەن تۇستارىن زەردەلەپ، زامان تالابىنا سايكەس ۇيلەستىرىپ كورسەتە ءبىلدى. قويىلىمنىڭ كوركەمدىك دەڭگەيىن ءاربىر قاقتىعىستاعى ءسوز استارى مەن اقىنداردىڭ ايتىسى ارقىلى شارىقتاۋ شەگىنە جەتكىزىپ وتىردى. ساحنانىڭ بەزەندىرىلۋى، بارىمتاشىلىقتى سۋرەتتەگەندەگى اتتاردىڭ وبرازى قازىرگى زاماناۋي ستيلدە جاسالعان. جامبىل رولىندەگى – اسەت ەسجان سۋىرىپ سالما  اقىن جىر الىبىن جوعارى دەڭگەيدە سومداي ءبىلدى. ەسترادا اندەرىن ورىنداپ جۇرگەن جاس اكتەر جامبىلدىڭ كەسەك-كەسەك ويلارىن، جىرلارىن جاندى داۋىستا شەبەر ورىندادى. قويىلىمدا قازاق بي ناقىشتارى زاماناۋي كونتەمپوراري، فولكدەنس بي باعىتتارىمەن سينتەزدەلىپ ۇسىنىلدى. سونداي-اق، ديناميكالىق سەنوگرافيا قولدانۋدىڭ ناتيجەسىندە دراماتۋرگيانىڭ زاڭدىلىقتارى ساقتالىپ، حورەوگرافيا، ءداستۇرلى مۋزىكا مەن درامالىق ساحنالار ءوزارا جىمداسا ءتۇستى.

سپەكتاكلدە جامبىل مەن بۇرىمنىڭ ماحابباتىنا سول كەزدەگى قوعامنىڭ ۇستانىمدارى كەدەرگى كەلتىرەدى. كىرشىكسىز سۇلۋ سەزىمنىڭ تۇنىعىن مۇڭ شايقاپ، اشىنعان اقىن، حالىقتىڭ اۋىر تۇرمىسىن، مۇڭ-مۇقتاجىن، ەل باسىنداعى اۋىرتپالىقتى، بولىس-بيلەر پاراقورلىعىنىڭ ايقىن كورىنىستەرىن قىزىل تىلىمەن ورىپ، باتىل سىناي ءبىلدى.

كەش قوناعى قازاقستاننىڭ حالىق ءارتيسى، پروفەسسور ەسمۇحان نەسىپباي ۇلى وبايەۆ زالعا لىق تولى كورەرمەنگە «جىر-جولبارىس» سپەكتاكلىنىڭ جوعارى دارەجەدە وتكەندىگىن ايتا كەلە، تەاتر ۇجىمىنا تابىس تىلەدى.

نازگۇل نۇرساعات،

«الاتاۋ» ءداستۇرلى ونەر تەاترىنىڭ

ءداستۇرلى ونەردى دامىتۋ جانە ۇيلەستىرۋ ءبولىمىنىڭ قىزمەتكەرى