"ارميان گەنوسيدىنە" قاتىستى رەسەي پرەزيدەنتى ۆ.  ءپۋتيننىڭ مالىمدەمەسىنەن كەيىن، تۇركيا رەسپۋبليكاسىنىڭ جاڭا پرەزيدەنتى تايىپ ەردوعان مىرزا قارسى تاراپقا اشىق نارازىلىعىن ءبىلدىردى. ول پۋتيننەن ۋكرايناداعى جاعدايلارعا قاتىستى ەسەپ (جاۋاپ) بەرۋىن سۇراعان. بۇل تۋرالى Reuters اگەنتتىگى حابارلايدى.

"رەسەي اتالمىش وقيعاعا قاتىستى  "گەنوسيد" تەرمينىن ءبىرىنشى مارتە قولدانىپ وتىرعان جوق. جەكە مەنىڭ نارازىلىعىمدى تۋدىرعانى - ءپۋتيننىڭ وسى قادامعا بارعانى، وسى مالىمدەمەنى جاساعانى. ۋكراينا مەن قىرىمداعى جاعدايدى بۇكىل الەم ءبىلىم، كورىپ وتىر. پۋتين الدىمەن ۋكراينا ءۇشىن، قىرىم ءۇشىن جاۋاپ بەرسىن. سوسىن بارىپ "گەنوسيد" تۋرالى ءسوز ايتسىن"،-دەدى تۇكريا پرەزيدەنتى.

24 ءساۋىر كۇنى تۇركيا ءسىم ءپۋتيننىڭ "ارميان گەنوسيدىنە" قاتىستى مالىمدەمەسىن سىنعا العان بولاتىن.

22 ءساۋىر كۇنى بەلگىلى بولعانداي، رەسەي پرەزيدەنتى پۋتين "گەنوسيدسىز الەم" اكسياسىنىڭ ۇيىمداستىرۋشىلارىنا حات جولداعان. حاتتا "1915 جىلدىڭ 24 ءساۋىرى - تاريحتاعى ەڭ اۋىر، قايعىلى، قارالى كۇن. بۇل كۇنى ادامزات تاريحىنداعى  ەڭ قورقىنىشتى - ارميان حالقىنىڭ گەنوسيدى بولعان كۇن"، دەلىنگەن.

24 ءساۋىر كۇنى رەسەي پرەزيدەنتى ەريەۆانعا ارنايى كەلىپ، گەنوسيدتتىڭ ءجۇز جىلدىعىنا ارنالعان شارالارعا قاتىسقان. ول تاريحي ەسكەرتكىشكە گۇل شوقتارىن قويىپ، تاريحي مۇراجايلاردى ارالاعان. ودان كەيىن پۋتين ءوزىنىڭ رەسمي بايانداماسىندا "حالىقتى جاپپاي قىرىپ سالعانداردىڭ ارەكەتى ەشقانداي اقتاۋعا جاتپايدى"، دەگەن.

1915-1923 جىلدار ارالىعىن ارميان حالقى گەنوسيد نەمەسە "ۇلى قىرعىن" دەپ اتايدى. سەبەبى، وسمان يمپەرياسى تۇسىندا ءدال وسى جىلدار ارالىعىندا يمپەرياشىلداردىڭ قولىنان مىڭداعان ارميان ۇلتى ازاماتتارى قازا تاپقان. تۇرىك دەرەككوزدەرىندە سول جىلدارى 200 مىڭنان استام ارميان حالقى قىرىلعان دەپ كورسەتىلسە، ارميان دەرەككوزدەرىندە ميلليونعا جۋىق دەپ ايتىلادى. دەسە دە، تۇركيا بيلىگى بۇل قاندى قىرعىنعا "گەنوسيد" دەگەن ات بەرۋگە قارسى.

نۇرزات توعجان