ديماش تۋرالى بىقسىعان اڭگىمە كوبەيىپ كەتتى. ەرىنبەگەننىڭ ءبارى ايتىپ قالىپ جاتىر. قۇددى ءبىر سول بالاعا الەمدىك داڭقتى وزدەرى الىپ بەرگەندەي...
كەيبىر جۋرنالشى باۋىرلارىمىز دا بىلدىرمەگەنسىپ وتتى كوسەپ-كوسەپ قويادى.
اناۋ جىلى بالانىڭ باريتون داۋسىنان حابارى جوق بىرەۋلەرى "سەنىڭ ايعايلاعان ايەل داۋىسىڭ ۇنامايدى" دەپ بولاشاعىنا بالتا شاپپاق بولعان. ەندى مىنە، كوتەرە المايتىن شوقپاردى بەلىنە بايلاپ، ەلدى دۇرلىكتىرىپ، ديماشتان "ساۋعا" سۇراپ ءجۇر. اڭگىمەلەرىنىڭ ەش قيسىنى جوق. اياۋلىسىنىڭ جانىندا ايفونىن شۇقىلاپ وتىرىپ، ساياسات سوعاتىندارىن قايتەرسىڭ؟!
"حالىقارالىق داۋدى نەگە شەشىپ بەرمەيدى" دەپ كوكيتىندەرى كوكەيگە قونبايدى. نەگىزى، قازاق پەن جۇڭگو اراسىنداعى كۇردەلى دە كۇرمەۋلى ماسەلەلەرگە اتاق-دارەجە ەمەس، اۆتوريتەتتەر عانا ءجون ايتا الادى. مىسالى، سوناۋ جىلى ماسكەۋدەگى ۇلكەن تەاتردا شەشەن جانكەشتىلەرى جۇزدەگەن ادامدى كەپىلگە ۇستاعانى ەسىمىزدە. سوندا ەشكىمنىڭ باتىلى بارماعان اجالدىڭ ارانىنا كسرو حالىق ءارتىسى يوسيف كوبزون باردى. سوڭىنان كوبزون مارقۇم اللا پۋگاچيەۆاعا: "سەن نەگە وسىنشا بەدەلىڭمەن قوعامداعى پروبلەمالارعا ارالاسىپ، ءوز پىكىرىڭدى ايتپايسىڭ" دەپ رەنجىپ سويلەگەنى بار. ايتپاقشى، ونداي دەڭگەيدەگى ادامدار قازاقستاندا دا جەتەرلىك قوي. مىسالى، كسرو حالىق ءارتىسى تولەگەنوۆا، ق ر حالىق ءارتىسى رىمبايەۆا اپايلارىڭنىڭ حالىقارالىق بەدەلى ديماشتان تومەن بە؟
♦ديماش قىتايدا قىسىم كورگەن قازاقتار جايلى: مەنىڭ دە جانىم اۋىرادى (ۆيدەو)
وسىنداي ارداقتى، تالانتتى، بەدەلدى اپا، اعالارىڭا سىن ساعاتتا "ۇلت ءۇشىن ماڭىزدى ءبىر ماسەلەنى قولداساڭىز" دەۋگە بولماس پا؟!
جوق، اتاعىنان ات ۇركەتىن، ابىروي-داۋلەتىن اتان تۇيە كوتەرە المايتىن اعالارى ۇكىمەتتە، پارلامەنتتە وتىرعان بازبىرەۋلەر ءاۋىل-ۇيدىڭ قوي توبەتىنشە ءۇرىپ، ديماشتاي جاس ءبورىنىڭ بالتىرىنان ءبىر تىستەپ قالۋعا بارىن سالىپ جاتىر...
كەشە قولداماعاندار بۇگىن قورلاۋعا بار. قورقاۋلىق ەمەي، نەمەنە؟!
كەشە قازاقتى بوراتتار كەمسىتكەندە، وسى جاتىپاتارلاردىڭ بىرەۋى ءسوز تاۋىپ اقتاي الۋعا جاراپ پا ەدىڭ؟!
سول قازاقتىڭ قانداي اقسۇيەك، دارىندى ۇلت ەكەندىگىن كۇللى دۇنيەگە مويىنداتىپ، التى قۇرلىقتىڭ ەر-قاتىنىنا باس ءيدىرتىپ، كوز جاسىن كول ەتكەن ديماش سىندى وعلاندى مىڭ قازاقتىڭ ورنىنا قيماس ەدىم. ارى-بەرىدەن سوڭ قىتايدىڭ وزىندە تۋىپ وسكەن، ول جەردەگى قانداستاردىڭ پروبلەماسىن دا، جۇڭگو ساياساتىن دا ءبىر كىسىدەي جاقسى بىلەتىن اتاعى جەر جارعان ونەر، سپورت تارلاندارى دا جەتەرلىك قوي! الدە ولاردان سۇراۋعا بولماي ما؟
قىسقاسى، كوڭىلدە تۇيتكىل بولعان وسى ساۋالداردىڭ جاۋابىن تابا المادىم...
بۇ قازاقتىڭ ءتىلى اۋزىڭا سىيماعان "كوپ پىسىعىن" جونگە سالار ءبىر اقىلمان كىسى جوق پا ارامىزدا...
اۋ، اعايىن، ادىلەت قايدا؟
سەرىكباي قىلىشبايدىڭ فەيسبۋك پاراقشاسىنان الىنعان
پىكىر قالدىرۋ