اقش پرەزيدەنتى دونالد ترامپ Twitter-گە جازبا قالدىرامىن دەپ تاعى دا باسى داۋعا قالدى دەپ حابارلايدى Qamshy.kz اقپارات اگەنتتىگى tmz.com سايتىنا سىلتەمە جاساپ.

ويتكەنى وقىرماندار پرەزيدەنتتىڭ جازباسىنان گرامماتيكالىق قاتە تاپقان.

«ترامپ ەشقاشان ءوزىنىڭ جازبالارىن بۇلاي ءتاتتى كۇيىندە ۇسىنعان ەمەس. ول پرەزيدەنتتىككە ءوزىنىڭ نارازىلىعىن بىلدىرگەننەن كەيىن، «ۇرلاندى» دەگەن ءسوزدىڭ ورنىنا بايقاۋسىزدا مەرەكەلىك داستارحانعا قوياتىن ءتاتتى تۋرالى جازىپ كەتكەن»، - دەپ باياندادى tmz.com سايتى.

5 مامىر كۇنى امەريكا پرەزيدەنتى، ارنايى پروكۋرور روبەرت ميۋللەر ونىڭ رەسەيمەن «سىبايلاستىعىن» انىقتاۋ ءۇشىن تەرگەۋ امالدارىن جۇرگىزگەندىكتەن، پرەزيدەنتتىگىنىڭ ەكى جىلى بوسقا ۇرلانعانىن جازباق بولعان.

الايدا، stolen (ۇرلانعان – رەد.) ءسوزىن، امەريكالىق باسشى stollen دەپ جازعان. ءبىر ءارىپ قاتە كەتكەن ءسوزدىڭ ماعىناسى بىردەن وزگەرگەن. ويتكەنى، stollen نەمىستەردەن كەلگەن ءتاتتى ناننىڭ اتاۋى. اقش-تا بۇل تاعام روجدەستۆو كەزىندە ءجيى جاسالادى.

ءبىر ءارىپتىڭ ارتىق جازىلعانىن بايقاعان ترامپتىڭ وقىرماندارى، پرەزيدەنتتىڭ قارنى اشقان بولار دەپ، بىردەن ءتاتتى ناننىڭ قالاي دايىندالاتىنى تۋرالى كۇلكىلى پىكىرلەر قالدىرعان.

كەيىن ترامپ تۆيتەردەگى جازباسىنداعى گرامماتيكالىق قاتەنى بىردەن تۇزەتكەن.

ەستەرىڭىزگە سالا كەتسەك، اقش ناۋرىز ايىندا ترامپتىڭ Twitter-دەگى جازبالارىنىڭ جيناعىن جاساعان بولاتىن.

ۇسىنعان: مارجان سابەت