«اعىمداعى جىلدىڭ 15 ءساۋىرى مەن 15 جەلتوقسانى ارالىعىندا ماقتاارال اۋدانىندا حالىقارالىق ەڭبەك ۇيىمىنىڭ «ماقتاارال اۋدانىندا بالالار ەڭبەگىنىڭ مونيتورينگ جۇيەسىن قۇرۋ» دەپ اتالاتىن جوبا جۇزەگە اسىرىلۋدا. ونىڭ شەڭبەرىندە اتالعان اۋداندا 5 مونيتورينگتىك توپ قۇرىلدى. جوبا اياسىندا ماقتا القاپتارىندا ەڭبەك ەتۋگە ءماجبۇر بالالاردىڭ وتباسىلارىنا 3 رەت ازىق-تۇلىك بەرىلدى. جوبا شامامەن 50 مىڭ اقش دوللارىن قۇرايدى. مونيتورينگ توپتارى انىقتاعان 130 بالا ءۇشىن وقۋعا ارنالعان قۇرال-جابدىقتار ساتىپ الىندى. 16-18 جاس ارالىعىنداعى 20 بالا قازىرگى ۋاقىتتا بەلگىلى ءبىر كاسىپ بويىنشا ماماندىق الۋدا»، - دەدى ول. ع.ءجۇسىپوۆانىڭ ايتۋىنشا، بۇگىندە ماقتا القاپتارىندا ەڭبەك ەتىپ جاتقان بالالاردىڭ سانى ەداۋىر ازايعان. «2008 جىلى بالالار قۇقىعىن قورعاۋ باسقارماسى بالالار ەڭبەگىنە باعىتتالعان ءوز جۇمىسىن باستاعان كەزدە، ءبىر عانا ماقتاارال اۋدانىندا ماقتا القابىندا ەڭبەكتەنىپ جۇرگەن 400-دەن استام بالا انىقتالعان. ال قازىرگى ۋاقىتتا جۇيەلى جۇرگىزىلگەن جۇمىستاردىڭ ارقاسىندا، سوڭعى رەيدتىك شارانىڭ ناتيجەسى بويىنشا ماقتا تەرۋمەن اينالىسىپ جۇرگەن 11 بالا انىقتالدى جانە بۇل بالالار ءوز اتا-انالارىنىڭ القاپتارىندا ەڭبەكتەنگەنىن ەسكەرۋ قاجەت. سەبەبى، بۇگىندە اتالعان اۋداندا القاپ كولەمى 5 گەكتاردان اسپايتىن 23 مىڭنان استام شاعىن شارۋا قوجالىقتارى بار. مۇنداي شاعىن شارۋا قوجالىقتارىنىڭ جۇمىسشى نەمەسە تەحنيكا جالداۋعا شاماسى جەتپەيتىنى بەلگىلى. سوندىقتان، ولار ءوز بالالارىنىڭ ەڭبەك كۇشىن پايدالانادى»، - دەدى باسقارما باسشىسى.