شىمكەنت قالالىق بالالار اۋرۋحاناسى 23 اقپاننان جۇمىسىن باستادى. جاڭا مەديسينالىق مەكەمە كوپ سالالى بالالار اۋرۋحاناسى بولىپ سانالادى. مۇندا جاسوسپىرىمدەرگە جوعارى بىلىكتى ماماندار قىزمەت كورسەتۋدە. اۋرۋحانادا 15 جاسقا دەيىنگى 10 مىڭنان استام جەتكىنشەكتىڭ ستاسيونارلىق ەم الۋىنا مۇمكىندىك بار.

اسار شاعىناۋدانى اۋماعىندا ورنالاسقان №1 قالالىق بالالار اۋرۋحاناسى 270 ورىنعا ارنالعان. مەديسينالىق مەكەمە سۋ جاڭا ءارى زاماناۋي ۇلگىدەگى قۇرال-جابدىقتارمەن قامتىلعان. اۋرۋحانانىڭ اۋماعى كەڭ. ەكى كورپۋستان تۇرادى. «ا» كورپۋسىندا قابىلداۋ بولمەسى، جاراقات پۋنكتى، شۇعىل ناۋقاستارعا شاعىن وپەراسيالىق بولمە، قارقىندى تەراپيالىق ەمدەۋ پالاتالارى بار. قابىلداۋ بولمەسىنىڭ جۇمىسى ءقازىردىڭ وزىندە قىم-قۋىت. ماماندار ءار ناۋقاستى قابىلداپ، ەم-دوم بولىمدەرىنە جىبەرۋدە.

جۇرەگىندە اقاۋى بار بالالارعا جاڭا اۋرۋحانادا بارلىق جاعداي جاسالىپتى. وتىز توسەك ورنى بەرىلگەن. ودان بولەك ويىن الاڭشاسى دا بار. ەسكى اۋرۋحانادا ويىن الاڭشاسى بولعان، ءبىراق تار ەدى. جاڭالىقتى بىردەن بايقاعان اتا-انالار وسىنداي جاعدايدى جاساپ وتىرعان بيلىككە ريزالىقتارىن بىلدىرۋدە. سولاردىڭ ءبىرى — كىشكەنتاي مۋباراكتىڭ اناسى.

ءامينا يبراگيموۆا، اتا-انا: «وپەراسيادان كەيىن ءۇش اي سايىن ەم الامىز. جاڭا اۋرۋحانا جاقسى ەكەن. تازالىعىنان بولەك پالاتالار ىڭعايلى سالىنعان. كەڭ. بۇرىن ءبىر پالاتادا بەس-التى ادام جاتاتىنبىز، ەندى ءۇش توسەكتەن بەرىلگەن».

جانساقتاۋ ءبولىمى دە سوڭعى ۇلگىدەگى جاڭا تەحنولوگيامەن جابدىقتالعان. ءاربىر ناۋقاسپەن ەم جۇرگىزۋگە ىڭعايلى. ولاردىڭ ءارقايسىسى بەينەباقىلاۋ كامەراسىمەن باقىلانادى. مۇندا 18 توسەك بار. جاڭا تۋىلعان سابيدەن باستاپ 15 جاسقا دەيىنگى جەتكىنشەكتەردى ەمدەۋ ءۇشىن بىلىكتى ماماندار قىزمەت كورسەتەدى.

اقجول ابدرايموۆ، جانساقتاۋ ءبولىمىنىڭ مەڭگەرۋشىسى: «بۇرىنعى جاعدايعا قاراعاندا ءقازىر تىم جاقسى. جاعداي ستاندارتتارعا ساي جاسالعان. ءاربىر ناۋقاسقا ەم-دوم جاساپ، قىزمەت كورسەتۋگە وتە ىڭعايلى».

اۋرۋحاناداعى تاعى قىرىق ورىن وڭالتۋ بولىمىنە بەرىلگەن. ودان بولەك ويىن الاڭشاسى جانە مونتەسسوري كابينەتى بار. تۋماسىنان سال اۋرۋىنا شالدىققان بۇلدىرشىندەردىڭ ساۋىعىپ كەتۋى ارنايى باعدارلاما ارقىلى قاداعالانادى.

مۋسايم ارىستانوۆ، وڭالتۋ ءبولىمىنڭ مەڭگەرۋشىسى: «ءبىر بالا 10 كۇن ەمدەلەدى. وسى كۇن ارالىعىندا ارنايى باعدارلاما ءتۇزىلىپ، ەم قابىلدايدى. ارنايى ترەناجەر زالى بار. ويىن الاڭشاسى بار. مۇنداعى جابدىقتاردىڭ بارلىعى تۋماسىنان سال اۋرۋىنا شالدىققان نەمەسە ديسپلازيا دياگنوزى قويىلعان بالالارعا ارنالعان».

اۋرۋحانادا 15 جاسقا دەيىنگى 10 مىڭنان استام جەتكىنشەك ستاسيونارلىق ەم الا الادى. تەك جاڭا مەديسينالىق مەكەمەگە جەتۋ وڭايعا سوقپاي تۇر. تۇرعىندار باعىتتىق كولىكتەردىڭ سانى ارتسا، يگى بولار ەدى دەيدى. ال وعان دەيىن جاڭا اۋرۋحاناعا № 8 جانە 9 باعىتتاعى اۆتوبۋستارمەن جەتۋگە بولادى.