ترەنينگتىڭ ءمودۋلى حالىقارالىق تالاپتار مەن تاجىريبەلەرگە سايكەس قۇرىلىپ، رەسپۋبليكا ايماقتارىندا قوعامدىق باقىلاۋشىلارعا ءدارىس بەرە الاتىن ترەنەرلەر دايىنداۋعا نەگىزدەلگەن.

"امانات" پلاتفورماسى قىزمەتىنىڭ باستى باعىتى تۋرالى تانىستىرىلىم باقىلاۋشى شتاب ءتوراعاسى مۇرات ابەنوۆتىڭ، "امانات" پلاتفورماسىنىڭ الماتى قالاسى بويىنشا شتابىنىڭ باسشىسى قازىبەك شايح جانە ادىستەمە اۆتورى شىڭعىس لەپسىبايەۆتىڭ قاتىسۋىمەن ءوتتى. ءىس-شاراعا 250-دەن استام ادام قاتىستى.

"ترەنينگتىڭ ماقساتى – ازاماتتاردى سايلاۋدىڭ وتكىزىلۋى كەزىندە عانا ەمەس، وعان دەيىن دە مونيتورينگ پەن باقىلاۋ جۇرگىزۋدى ۇيرەتۋ. ءبىز 1100 ەرىكتىلەردەن قۇرىلعان ءتىزىم جاسادىق. ونىڭ ىشىندە الماتى قالاسىنىڭ 26 ۇەۇ جانە قازاقستان حالقى اسسامبلەياسىنىڭ 12 ەتنومادەني بىرلەستىك وكىلدەرى، قالالىق جوو ستۋدەنتتەرى بار. ءبىر-بىرىن اۋىستىرىپ ىڭعايلى جۇمىس ىستەۋ ءۇشىن باقىلاۋشىلار سانى سايلاۋ ۋچاسكەلەرىنە قاراعاندا كوبىرەك بولۋى كوزدەلگەن"، – دەدى قازىبەك شايح.

وسى كەزەڭدە "امانات" پلاتفورماسى ادامداردى مونيتورينگتى دۇرىس جۇرگىزۋدى ۇيرەتۋگە جۇمىلدىرىلعان. "امانات" باقىلاۋشىلارى اشىق سايلاۋ ۋچاسكەلەرىنىڭ جابدىقتالعانى، ۋچاسكەنىڭ ورنالاسۋ ىڭعايلىلىعى، مۇمكىندىگى شەكتەۋلى ادامدارعا قولجەتىمدىلىگىن قارايدى.

"قازىرگى ۋاقىتتا ەلىمىزدىڭ بارلىق ايماقتارىندا "امانات" پلاتفورماسىنىڭ فيليالدارى اشىلعان. بۇل قوعامدىق پلاتفورمانى قۇرۋ تۋرالى يدەيانىڭ جاقتاۋشىلارى وتە كوپ. وكىنىشكە وراي كوپتەگەن ازاماتتار ءوز قۇقىقتارى مەن ەلدەگى زاڭنامالاردى جاقسى بىلە بەرمەيدى. وسىعان وراي ءبىز قىزىعۋشىلىق بىلدىرگەندەردى جىگەرلى تۇردە ۇيرەتۋدى باستادىق. كوپتەگەن سەمينارلار ءتۇرلى سپيكەرلەردىڭ قاتىسۋىمەن ونلاين تۇردە وتۋدە. قازىرگى ۋاقىتتا رەسپۋبليكا بويىنشا 10 مىڭنان استام تاۋەلسىز باقىلاۋشى ءبىلىمىن جەتىلدىرۋدە"، – دەپ ءسوز سويلەدى مۇرات ابەنوۆ.

"امانات" پلاتفورماسىنىڭ بەلسەندىلەرى الەۋمەتتىك جەلى، باسپا جانە ەلەكتروندىق ب ا ق ارقىلى سايلاۋعا باقىلاۋشى رەتىندە قاتىسۋعا نيەت بىلدىرۋشىلەرگە ۇندەۋ جاسادى.

"ەڭ جەڭىلى amanat.kz سايتىنا كىرىپ ءوتىنىش بەرۋ. ەرىكتى ءوز قالاۋى بويىنشا سايلاۋ الدى، سونداي-اق سايلاۋ بارىسىنداعى مونيتورينگكە قاتىسا الادى. ءاربىر قالا تۇرعىندارى داۋىس بەرۋ جولدارى، ۇمىتكەرلەردىڭ مۇمكىندىكتەرى مەن تەڭ قۇقىقتارى جونىندە ۇيرەتۋ كۋرستارىنا قاتىسا الادى. "امانات" توبى كەز-كەلگەن پرەزيدەنتتىككە ۇمىتكەر رەتىندە تىركەلگەن كانديداتقا قالا تۇرعىندارىنىڭ تىلەكتەرىن جيناۋمەن دە اينالىسادى"، – دەپ ءسوزىن ءتامامدادى قازىبەك شايح.

بۇدان بولەك، مۇرات ابەنوۆ باستاعان قوعامدىق پلاتفورما وكىلدەرى الماتى قالاسىنىڭ اۋماقتىق سايلاۋ كوميسسياسىنىڭ ءتورايىمى ج. اسانوۆامەن باقىلاۋشىلاردىڭ جۇمىسىن ءتيىمدى ۇيىمداستىرۋ ماسەلەسى بويىنشا كەزدەسكەن بولاتىن.

ەستەرىڭىزگە سالا كەتسەك، "امانات" قوعامدىق پلاتفورماسى – سايلاۋدىڭ ادال جانە اشىق ءوتۋىن قالايتىن قازاقستاندىقتاردان قۇرىلعان تاۋەلسىز ەرىكتى ۇيىم. قۇرامىنا قوعام بەلسەندىلەرى، ەكسپەرتتەر، جۋرناليستتەر مەن قوعامدىق ۇيىمدار وكىلدەرى بار.