باسقا ۇلتتاردى قايدام، ال، قازاق بيلىگىندەگىلەردى (بيلىكتى "ۇلكەن"، "كىشى" دەپ بولۋگە بولمايدى. سونداي-اق، ءبىزدىڭ قازاق "باستىقتى" دا "ۇلكەن" نەمەسە "كىشى" دەپ بولمەگەن) بۇزاتىندار – نەگىزىنەن قازاقتىڭ جالپاق تىلىمەن ايتقاندا "ءتىل مەن جاعىنا سۇيەنگەن" ونەر مەن ادەبيەتكە جاقىن جۇرەتىن نەمەسە سول سالانىڭ ناعىز "مايتالماندارى" انا بەتسىز جاعىمپازدار دەر ەدىم.

جاعىمپازدار - تابيعاتىنان جەكە باسىنىڭ مۇددەسى ءۇشىن، اشىعىن ايتقاندا پايداسى ءۇشىن نەدەن دە تايىنباعان.

انا قانىشەر ستالين كەزىندە جازىقسىز اتىلعان 25 مىڭنان استام قازاق زيالىلارىن اتقىزعاندار - وسى جاعىمپازدار تابىنان ەدى. قازاقتا بۇل ناعىز سۋ جۇقپاس جاعىمپازدار - ءالى كۇنگە دەيىن جىرتىلىپ-ايرىلادى. ونى ءبارىمىز جاقسى بىلەمىز. بىلە تۇرىپ، بىلمەگەنسيمىز. اسىرەسە، بيلىك تىزگىنى قولىندا تۇرعاندار اياق استىنان سول جاعىمپازدارعا قۇدايداي سەنەتىن بولىپ شىعا كەلەتىنىنە تاڭ قالام.

بىلە بىلگەن ادامعا "جاعىمپازدىق" - سونشالىقتى جيىركەنىشتى دەر ەدىم.

ەگەر، شىن مانىندە كەمەل ۇلت بولامىز دەسەك، وسى جاعىمپازدارمەن اشىق كۇرەستى باستاۋىمىز كەرەك! ايتپەسە، ءبارى دە كەش بولادى.

قۇرمەتتى ۇلكەندى-كىشىلى بيلىك تىزگىنى قولدارىندا تۇرعان قازاقتار!

اينالالارىڭىزعا ءبىر ساتكە دۇرىستاپ كوز سالىڭىزدارشى؟ ءسىزدى قانشا جاعىمپاز قورشاپ ءجۇر؟ سونى ساناپ كوردىڭىز بە؟ الدە ءقازىردىڭ وزىندە كوزىڭىزدى ماقتانشاقتىق شەلى باسىپ كەتكەن بە؟

تەز ارادا وسى سىلىمتىك جاعىمپازداردان قۇتىلماي، قازاق ۇلت بولىپ جارىتپايدى، جەر بەتىندەگى جالعىزىم - مەنىڭ قازاعىم!

جاعىمپازدار، جويىلسىن!

تۇرعان كەزدە اعىپ تۇسپەي كوز امان،
قالام دەسەڭ جامان دەرتتەن تەز امان،
جاعىمپازدار!
جاعىمپازدار!
ۇلتىما -
ۇلتتىق دەرت بوپ جابىسقالى نە زامان؟!.

ەمەس ولار اقىل، ەسى كەم كىسى،
جاعىمپازدار – جالپاق-شەشەي «كونبىسى»!
ەستى ەدىڭ عوي، قايران قازاق، ەسىڭ جي،
جاعىمازدىق – قۇلدىق دەرتتىڭ بەلگىسى!

اناۋ سەنى نەگە سونشا ماقتادى ول،
ار جاعىنا اۋىر ءزىلىن ساقتادى ول...
جەتەر حالقىم، جاعىمپازدار جويىلسىن!
جەتەر حالقىم، ەسىڭدى جي، اتقا قون!..

اۆتور: جۇماش كوكبورى