ۋكراينانىڭ جاڭا سايلانعان پرەزيدەنتى ۆلاديمير زەلەنسكيي ۇلىقتاۋ راسىمىنەن كەيىن ەلدىڭ ساياساتى مەن جاعدايىن وزگەرتۋگە كىرىستى. جوعارى رادادا بەرگەن ۋادەسىندە  ۋكراينا ساياساتىنىڭ كورىنىسىن كورسەتىپ، ءوزىنىڭ پرەزيدەنتتىك جۇمىسىن ايقىن باستادى.

ءسوزىنىڭ باسىندا بۇكىل ۋكراينا حالقىنا سالەم جولداپ، ەلدىڭ ءاربىر ازاماتىنىڭ “پرەزيدەنت” ەكەندىگىن جەتكىزدى. زەلەنسكيي ونىڭ الدىندا ۋكراينا پرەزيدەنتى بولعان ادامداردىڭ دەربەستىگىن سىنعا الدى.  ول بۇل كۇننەن باستاپ ۋكراينالىقتاردان ۇلت بولاشاعى مەن ەلدىڭ كوركەيۋىنە جاۋاپكەرشىلىك الۋىن سۇرادى.

زەلەنسكييدىڭ ايتۋىنشا، ونىڭ پرەزيدەنتتىك مانسابىنداعى ەڭ باستى مىندەتى – دونباسستاعى سوعىستى توقتاتۋ.

“مەنەن ءبىر كەزدە “دونباسستاعى سوعىس توقتاتۋ ءۇشىن نە ىستەۋ كەرەك؟” دەپ سۇراعان. ءبىرتۇرلى سۇراق... ال ءسىز، ۋكراينالىقتار وزىڭىزگە جاقىن ادامداردىڭ ءومىرى ءۇشىن نە ىستەيسىز؟ مەن سوعىستى جويۋ ءۇشىن بارىنە دايىنمىن. مەن ءوزىمنىڭ اتاعىم مەن داڭقىمنان باس تارتامىن، كەرەك دەسەڭىز، بەيبىتشىلىك ورناتۋ ءۇشىن مەن پرەزيدەنتتىگىمنەن باس تارتامىن! بۇل سوعىستى ءبىز باستاعان جوقپىز. ءبىراق ءبىز بۇل سوعىستى اياقتاۋ كەرەكپىز”، – دەدى ۆلاديمير زەلەنسكيي.

سونىمەن قاتار، بۇل شيەلەنىستىڭ شەشىلۋ جولىندا، ەڭ بىرىنشىدەن، بارلىق ۋكراينالىق تۇتقىنداردى قايتارۋ ارقىلى كەلىسسوزدەرگە جول اشاتىن مالىمدەدى.

“دونباسس تا، قىرىم دا – ۋكراينانىڭ ايماعى. ءبىز ولاردى قايتارۋىمىز كەرەك. ويتكەنى، بيلىك ولاردىڭ ۋكراينالىقتار ەكەندىگىن سەزدىرمەدى. ولار بوتەن ەمەس! ولار ۋكراينالىقتار! ۋكراينا ازاماتتىعى ءتولقۇجاتتا ەمەس، ۋكراينا جۇرەكتە!”، - دەدى پرەزيدەنت زەلەنسكيي.

پرەزيدەنت اسكەريلەرگە زەينەتاقىسىن كوتەرىپ، اقىلى دەمالىس بەرەتىنىن ايتتى. ول جالعىز ەلدىڭ اۋماعىن ايتپاي، حالىقتىڭ جاعدايىن دا ويلاۋ كەرەكتىگىن ەسكەردى. اۋرۋحانالار، مەكتەپ جاعدايىن جوعارى راداعا تىكەلەي ايتقان ۋاقىتتا دەپۋتاتتار كىرەرگە تەسىك تابا الماي، امالسىز وتىردى. زەلەنسكيي بيلىكتىڭ قاي “عاجاپ الەمدە” ءمىنسىز جولداردى كورىپ جۇرگەنىن سۇرادى. ول بۇرىن اكتەر بولعان اقش-تىڭ ەكس-پرەزيدەنتى رونالد رەيگاننىڭ “ۇكىمەت ءبىزدىڭ پروبلەمانى شەشپەيدى. ۇكىمەتتىڭ ءوزى – ءبىزدىڭ پروبلەمامىز!” ءسوزىن باسا ايتتى.

“ەگەر دە ەشتەڭە شەشە الماساڭىز، قولىڭىزعا پاراق پەن قالام الىپ، ورنىڭىزدى بوساتىڭىز! ۋكرايناعا شىنىمەن كومەكتەسەتىن ازاماتتار كەرەك! مەنىڭ ويىمشا، ۇكىمەت وتستاۆكاعا كەتۋى قاجەت. ەشقانداي كابينەتتە مەنىڭ سۋرەتىم ىلىنبەۋى كەرەك. پرەزيدەنت – تابىناتىن يكونا ەمەس، يدول ەمەس، پرەزيدەنت پورترەت ەمەس! مەنىڭ سۋرەتىمنىڭ ورنىنا وزدەرىڭنىڭ بالالارىڭنىڭ بەينەسى تۇرسىن. سول كەزدە شەشىم جاسار الدىندا بالالارىڭنىڭ كوزدەرىنە قارارسىڭدار،” – دەدى جاڭادان سايلانعان پرەزيدەنت.

ول “قۇرمەتتى دەپۋتاتتار؟” دەپ ءسوزىن باستاپ، دەپۋتاتتىق دەربەستىكتى جويۋ تۋرالى، زاڭسىز اقشا جىمقىرۋ تۋرالى زاڭدى قابىلداۋ ءۇشىن راداعا ەكى اي ۋاقىت بەردى. وعان قوسا زەلەنسكيي قاۋىپسىزدىك قىزمەتىنىڭ باسشىسىن، ۋكراينانىڭ باس پروكۋرورىن، قورعانىس ءمينيسترىن جۇمىستان بوساتۋدى تاپسىردى. پرەزيدەنت مالىمدەمەسىنەن كەيىن ولاردىڭ ەكەۋى: قاۋىپسىزدىك قىزمەتىنىڭ باسشىسى ۆاسيليي گريساك پەن قورعانىس ءمينيسترى ستەپان پولتوراك وتستاۆكاعا كەتتى. سونىمەن قاتار، زەلەنسكيي جوعارى رادانى تاراتۋ تۋرالى بۇيرىق بەرىپ، ۋكراينادا كەزەكتەن تىس پارلامەنت سايلاۋى وتەتىنىن جاريالادى.

وسىعان قاراي وتىرىپ، ۋكراينا ساياساتىنىڭ جاڭا جولعا تۇسكەنىن بايقايمىز. پرەزيدەنت بولا سالىسىمەن زەلەنسكيي تۇگەلدەي كونە قۇرلىمدى جوياتىنىن انىق جەتكىزدى. بۇل تەك ءبىرىنشى كۇنى، ال ەندى ونىڭ قالاي جالعاساتىنىن كورە جاتارمىز.

ءبىزدىڭ ەلىمىزدە كەزەكتەن تىس پرەزيدەنت سايلاۋى 9-ماۋسىم كۇنى بولادى. قانداي كانديدات بولماسىن، توقايەۆتىڭ جەڭەتىنە ءبارى سەنىمدى. سونىمەن قاتار، وپپوزيسيالىق كانديداتتارعا “سايلاۋشىلارمەن كەزدەسۋدە نەمەسە كوپشىلىك اكسيالار كەزىندە قاتىسۋشىلار سانى ۇلتتىق قاۋىپسىزدىككە بايلانىستى 100 ادامنان اسپاۋى كەرەك” دەگەن ەسكەرتۋ بار. بۇعان نە ايتۋعا بولادى؟ دەموكراتيا!

نەگىزگى تاقىرىپقا كەلەتىن بولساق، توقايەۆ ناۋرىز ايىندا بولعان ۇلىقتاۋ راسىمىندە نە ايتتى؟ قازاقستانعا قانداي وزگەرىس اكەلەتىنىن جەتكىزدى؟ ەلباسىمىزدى ماقتاۋدان ءارى اسپادى. ءسوز جوق! نۇرسۇلتان نازاربايەۆتىڭ ەلىمىزگە بەرگەنى كوپ. ءبىراق تا "پرەزيدەنتىمىزدىڭ العا قويعان ماقساتى قانداي؟" دەگەن سۇراق تۋىندايدى.

قازاقستاننىڭ تاپتاۋرىن بولعان 30 جىلدىق جەتىستىكتەرىن ايتقاننان نە وزگەرەدى؟ ءبىزدىڭ ەلىمىزدە ءالى شەشىلمەگەن جاعدايلار كوپ. جەمقورلىقتان باستاپ، قاراپايىم ادام قاۋىپسىزدىگىمەن اياقتالادى. ادامدار بەيبىت شەرۋ وتكىزۋ ءۇشىن  اكىمشىلىكتەن رۇقسات الۋى كەرەك. ءبىراق تا ءارتۇرلى جاعدايلاردى ەسكەرىپ، سوڭىندا ەشقانداي ناتيجە شىقپايدى. "زاڭسىز ميتينگ جاسادىڭدار" دەپ جەرگىلىكتى بيلىك پوليسيا مەن ارنايى جاساقتاردى ءوز حالقىنا قارسى جىبەرەدى. مۇنداي باسسىزدىقتار قاشان دوعارىلادى؟ قورىتىندىلاي كەلە، توقايەۆ اشىق اسپان مەن سوعىسسىز ءومىردى قامتاماسىز ەتۋدەن بولەك، جالپى حالىق جاعدايىن كەلەشەكتە كوتەرەدى مە؟ ونى ءبىز تەك ۋاقىت وتە عانا بىلەمىز...