بۇرىنعى دوسەنت، قازىرگى ۋاقىتتا قوسانوۆتىڭ قولداۋشىسى بولىپ جۇرگەن سەرىك ابيشوۆ حالىققا ءوزىنىڭ وكپە - نازىن ايتتى. بۇل جايلى ول ءوزىنىڭ الەۋمەتتىك جەلىسىنە سالعان پاراقشاسىندا جاريالادى دەپ حابارلايدى Qamshy.kz اقپارات اگەنتتىگى. 

ءماتىنىن «ءامىرجان قوسانوۆتى قولداۋ، كومەك بەرۋ، سايلاۋ، باقىلاۋشى تۋرالى»،- دەپ باستاعان ابيشوۆ اۋدارىلعان قاراجاتتار جايىندا تولىق بىلەتىنىن ايتا كەتتى.

«بۇگىن ۇمىتكەرلەردىڭ رەسمي تۇردە شوتتارىنا قايىرىمدىلىق كومەك رەتىندە اۋدارىلعان قاراجات تۋرالى اقپاراتپەن تانىستىم. بىرگە ساراپتايىق: وسى كۇنگە دەيىن توقايەۆكا 514 ميلليون تەنگە اۋدارىلعان، ال ەسپايەۆا حانىمعا 112 ميلليون تەنگە، قىسقاسى راحيمبەكوۆتان باسقاسى (وعان 0 تەنگە) بارىنە ميلليونداعان قاراجات اۋدارىلعان (ارينە ناسيحاتتارى دا قاراجاتقا سايكەس جۇرگىزىلۋدە). ال حالىق ۇمىتكەرى ءامىرجان قوسانوۆقا جالپى 643000 تەنگە قايىرىمدىلىق كومەك رەتىندە حالىقتان قاراجات تۇسكەن.»،- دەگەن رەنىشىن بىلدىرەدى سەرىك مىرزا.

ول الدا كەلە جاتقان سايلاۋ ناۋقانىنا ۇمىتكەر ءامىرجان قوسانوۆتى جاقتاعانى سونشا، ەل ىشىندەگى قاۋەسەتتەن اقتاپ العىسى كەلىپ بىلاي دەدى:

«ءامىرجان قوسانوۆ پرەزيدەنتتىك بايگەگە شىققاندا كەيبىر ادامدار ونى "بيلىكتىڭ كىسىسى" دەگەن اقپارات تاراتتى، سايلاۋعا بويكوت جاريالاعان، ءالى دە سول پىكىردەگى ادامدار كوپ. ەگەر ءامىرجان قوسانوۆ سونداي بولسا، وندا  ۇكىمەت، بيلىكتەگىلەر نەگە كومەكتەسپەيدى؟ اگيتاتسيا بارىسىندا ونى ارتقا تارتادى، ناۋقاننان قۇلاتقىسى كەلەدى، كانەكي ەندى بويكوچيكتەر ءوز ويلارىڭىزدى پىكىرلەرىڭىزدى ايتىڭىزدار»،- دەگەن بولاتىن.

ەستەرىڭىزگە سالا كەتەيىك، سايلاۋعا قاتىسۋ جۇمىستارىنا كوپ قاراجات كەرەك ەكەنىن قوسانوۆتىڭ ءوزى دە ايتقان بەلگىلى.

وقي وتىرىڭىز: قوسانوۆتىڭ سايلاۋ شتابى قولداۋشىلارىنا قاتاڭ ەسكەرتۋ جاسادى

دايىنداعان: بەك بايتاس