جامبىل وبلىسى قۇمشاعال اۋىلىنىڭ تۇرعىندارى شاعال تاس وندىرەتىن كاسىپورىن اۋماعىنىڭ اشىق جاتقانىنا نارازى دەپ حابارلايدى Qamshy.kz اقپارات اگەنتتىگى كتك تەلەارناسىنا سىلتەمە جاساپ. 

جۇرتتىڭ ايتۋىنشا، قورشاۋسىز كەن ورنى «اجال اپانىنا» اينالعان. اشۋلى توپتىڭ سوزىنە سەنسەك، تەرەڭ قۇزدان ادام دا، مال دا قۇلاپ مەرتىگىپ جاتىر. سوندىقتان جۇرت قاۋىپسىزدىك ءۇشىن ءوندىرىس ورنى باسشىسىنان بيىك بەكىنىس سالۋدى تالاپ ەتەدى. 

اۋىلدىڭ ءبىر قاپتالى قازىلعان ور. وسى ماڭ ەل ءۇشىن ءقاۋىپتى. بۇقارا، اسىرەسە، بالالار ءومىرى ءۇشىن الاڭدايدى. سەبەبى، ويىن بالاسى قۇزدان قۇلاپ كەتۋى مۇمكىن. ايتۋلارىنشا بۇل قۇزدان سوڭعى 10 جىلدا 4 ادام قۇلاپ قازا تاپقان. ال، مال سانىندا ەسەپ جوق. قۇرىلىسقا قاجەتتى تاس-شاعال وندىرەتىن كاسىپورىن باسشىلارى بۇل ماسەلەنى بىلەتىن بولىپ شىقتى.

شاعال تاس شىعاراتىن كاسىپورنىنىڭ اۋماعى 72 گەكتار. كومپانيا باسشىلىعى سونىڭ تەڭ جارتىسىن عانا قولدانامىز دەيدى. قالعانى قاراۋسىز جاتقان جەر دەپ اقتالدى. ونىڭ ۇستىنە ادام ءولىپ، مال شىعىنى بولدى دەگەنى بەكەر دەيدى. ال قورشاۋدى باستاپ، جارىم جولدا اياقسىز قالدىرۋىن قارجى تاپشىلىعىمەن تۇسىندىرەدى. جاۋاپتىلار ءىستى تامىزعا جەتكىزبەي تياناقتايمىز دەپ انت سۋ ءىشتى. 
ءبىراق تۇرعىندار بۇل ۋادەگە سەنبەيدى. Cوندىقتان بۇقارا بيلىكتەن جاعدايدى باقىلاۋدا ۇستاۋدى سۇراپ وتىر.

ۇسىنعان: مارجان سابەت