بولاشاقتا ۇلتتىق بانكتى الماتىدان استاناعا كوشىرۋ جوسپاردا بار. بۇل تۋرالى Qamshy.kz اقپارات اگەنتتىگى ۇلتتىق بانكتىڭ ءتوراعاسى ەربولات دوسايەۆقا سىلتەمە جاساپ حابارلايدى.
بۇگىن ءماجىلىستىڭ جالپى وتىرىسىندا قارجى نارىعىن رەتتەۋ مەن دامىتۋ جانە ميكروقارجىلىق قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى قارالدى. قۇجاتتا ايتىلعانداي، 2020 جىلى قارجى نارىعىن رەتتەۋ مەن دامىتۋ اگەنتتىگىن قۇرىپ، ۇلتتىق بانكتىڭ ءبىرقاتار فۋنكسياسىن وسى جاڭا ورگانعا بەرۋ كوزدەلىپ وتىر.
دوسايەۆ جاڭا اگەنتتىكتى قۇرۋ ۇلتتىق بانكتى قايتا ۇيىمداستىرۋ ارقىلى جۇزەگە اساتىنىن اتاپ ءوتتى.
"ۇلتتىق بانكتىڭ ءبىرقاتار فۋنكسياسى مەن وكىلەتتىكتەرى جاڭا اگەنتتىككە اۋىسادى. بۇگىنگى شتاتتان شامامەن 500 ادام وسى اگەنتتىككە اۋىستىرىلادى"، - دەدى ول.
ونىڭ ايتۋىنشا، اگەنتتىك الماتى قالاسىندا بولادى. وسى كەزدە ءماجىلىس سپيكەرى نۇرلان نىعماتۋلين "بولاشاقتا ۇلتتىق بانكتى نۇر-سۇلتان قالاسىنا كوشىرۋ جوسپاردا بار ما؟"دەگەن سۇراق قويدى.
"ونداي جوسپارىمىز بار"، - دەدى دوسايەۆ.
ۇلتىق بانك سياقتى جاڭا اگەنتتىك تە رەسپۋبليكا پرەزيدەنتىنە تىكەلەي باعىنادى جانە رەسپۋبليكالىق بيۋدجەت ەسەبىنەن قارجىلاندىرىلادى.
دايىنداعان: يلدار اديلچەنوۆ
پىكىر قالدىرۋ