وليمپيادا چەمپيونى جەرلەسى گەنناديي گولوۆكيندى قارالايىن دەگەن وي بولماعانىن مالىمدەدى دەپ جازادى Qamshy.kz اقپارات اگەنتتىگى  Sputnik قازاقستانعا سىلتەمە جاساپ.

ريو وليمپياداسىنىڭ چەمپيونى، كاسىپقوي بوكسشى دانيار ەلەۋسىنوۆ سۇحباتىندا بۇرىنعى الەم چەمپيونى گەنناديي گولوۆكينگە قاتىستى داۋ نەدەن تۋىنداعانىن ءتۇسىندىردى.

گولوۆكين ءوزىنىڭ 8 مامىر كۇنى وتەتىن بوكس كەشىندە دانيار ەلەۋسىنوۆتىڭ جۇدىرىقتاسۋىنا قارسى بولعانىن بۇعان دەيىن جازعان ەدىك. بۇرىنعى الەم چەمپيونى بۇل شەشىمىن: «دانيار ءوزى ايتقانداي، «ءبىزدىڭ جولىمىز» بولەك. بۇل – ونىڭ ءوز ءسوزى» دەپ ءتۇسىندىردى.

بۇعان قاتىستى دانيار ەلەۋسىنوۆتىڭ دە ءوز ايتارى بار.

«جەرلەسىمنىڭ مەنىڭ ونەر كورسەتۋىمە قارسى بولعانى ايدان انىق. گەنناديي گولوۆكين جۋرناليستەرگە بەرگەن سۇحباتىندا «دانيار ەكەۋمىزدىڭ جولىمىز بولەك» دەپتى. گولوۆكيننىڭ ارەكەتى ونىڭ دەڭگەيىنە سايكەس كەلمەيدى دەپ ەسەپتەيمىن. ءبىراق بۇل ماسەلەدە ءبىر نارسەنى ەسكەرگەن ءجون. مەندە ونى قارالايىن دەگەن وي بولعان جوق. ەگەر رەنجىسە، مەنىمەن بەتپە-بەت جۇزدەسىپ، وزىمنەن سۇراۋعا دا بولار ەدى. اشىعىن ايتايىن، مەن گەننادييگە رەنجىگەن جوقپىن. وعان تەك ساتتىلىك تىلەيمىن»، – دەيدى سپورتشى اعىنان جارىلىپ.

سونىمەن قاتار ەلەۋسىنوۆ گولوۆكيننىڭ كەشىندە ءوزىنىڭ ورنىنا شىعاتىن وزبەك يسرايل مادريموۆقا دا كىنا ارتپايتىنىن، سپورتتا مۇنداي جاعدايلار بولىپ تۇراتىنىن جەتكىزدى. دانيار اۋەسقوي بوكستا بۇل سپورتشىنى ەكى رەت جەڭگەن ەكەن.

«ونىڭ ەش كىناسى جوق. ول – جاقسى بوكسشى»، – دەپ قىسقا قايىردى ول.

الداعى جەكپە-جەككە دايىندىق قالاي؟

اڭگىمە بارىسىندا دانيار 25 مامىردا اقش-تا وتەتىن جەكپە-جەگىنە قالاي دايىندالىپ جاتقانىن ايتىپ بەردى.

«27 جاستاعى مەكسيكالىق قارسىلاسىم تاجىريبەلى. جەڭىسىمەن قاتار جەڭىلىسى دە بار. نامىستى قولدان بەرمەۋگە تىرىسامىن.

بوكس – اۋىر سپورت، نەشە ءتۇرلى جاعداي  بولۋى مۇمكىن. وسى اپتادا شارشى الاڭعا شىعامىن. دايىندىعىم جاقسى. اقش-تىڭ فلوريدا شتاتىندا باس باپكەرىم اكەم مەن ەريك سانتوس دايىنداپ جاتىر»، – دەدى سپورتشى.

«سوققىسى ءالسىز دەيتىندەرمەن كەلىسپەيمىن»

وليمپيادا چەمپيونى «دانيار، پانچەر ەمەس، سوققىسى ءالسىز، كوبىنە تەxنيكاعا سۇيەنەدى» دەگەن سىنعا دا جاۋاپ بەرە كەتتى.

«بارلىق ادامنىڭ پىكىر بىلدىرۋگە قۇقى بار. ءبىراق ءوز باسىم مۇنىمەن كەلىسپەيمىن. ءاربىر بوكسشىنىڭ وزىنە ءتان جۇدىرىقتاسۋ مانەرى بولادى. وسىنى ەسەپكە العان ءجون. رينگتە ۋاقىتتى ۇتىمدى، ءساتتى پايدالانۋ كەرەك. سوندىقتان سوققىمدى ءالسىز دەپ ەسەپتەمەيمىن. بوكستاعى جەكپە-جەكتىڭ تاعدىرىن ۋاقىت شەشەدى. كاسىپقوي بوكستا ۇرىمتال ءساتتى ۇتىمدى پايدالانىپ، سوققى جاساي ءبىلۋ كەرەك. تەك اسىقپاعان ابزال»، – دەيدى بوكسشى.

دانيار ءوز سالماعىنداعى كيت تۋرمان، شون پورتەر، ەررول سپەنس، تەرەنس كروۋفورد سىندى مىقتى بوكسشىلارمەن كەزدەسۋگە قاتىستى ويىن ايتتى.

«بولاشاعىمدى الدىن الا بولجاعاندى ۇناتپايمىن. اللانىڭ بۇيىرعانى بولادى. ءبىز تەك امالىن جاسايمىز. سوندىقتان جەتىستىككە جەتۋ ءۇشىن كوپ ەڭبەكتەنۋ كەرەك»، – دەيدى ەلەۋسىنوۆ.

«وليمپيادا چەمپيوندارىن كىنالاۋعا بولمايدى»

دانياردان اڭگىمە بارىسىندا ەلىمىزدە وليمپيادا چەمپيوندارى نەلىكتەن كاسىپقوي بوكسقا اۋىسا بەرمەيتىنىن سۇرادىق.

«وليمپياداعا قاتىسقان بوكسشىلار كاسىبي بوكسقا اۋىسۋدان قاشقاقتايدى دەپ ويلامايمىن. قازاق بوكسشىلارىنىڭ باستى ماقساتى – وليمپياداعا قاتىسۋ ءارى ونى جەڭۋ. ولاردىڭ قاتارىندا مەن دە بولدىم. مەن دە وليمپيادا چەمپيونى بولۋدى ارماندادىم. ول باستى ماقساتىم بولدى. بۇرىن قازاق سپورتشىلارىندا «كاسىبي بوكسقا اۋىسۋ» دەگەن تۇسىنىك بولعان جوق. جىگىتتەر بوكستا قانشاما جىل تەر توگەدى. ۋاقىتىنىڭ كوپ بولىگىن وقۋ-جاتتىعۋ جيىنىندا وتكىزەدى. وتباسىن دا كورمەيتىن ۋاقىتتار بولادى. بىرنەشە وليمپياداعا قاتىسقان بوكسشىلار بار. كەيبىرىنىڭ كاسىبي بوكسقا اۋىسۋىنا ۋاقىتى جەتپەي جاتادى. ءبىرىنشى بولىپ كاسىبي بوكسقا ۆاسيليي جيروۆ اۋىستى. ونىڭ جولىن گەنناديي گولوۆكين جالعاستىردى. ول كاسىبي بوكستا ۇلكەن جەتىستىكتەرگە جەتكەن سوڭ، قازاقستاندىق بوكسشىلاردا قۇلشىنىس پايدا بولدى. سوندىقتان وليمپيادا چەمپيوندارىن «كاسىبي بوكسقا نەگە اۋىسپايدى؟» دەپ كىنالاۋعا بولمايدى»، – دەپ ءتۇسىندىردى ول.

بوكسشى ۇلى دانيەلگە ۋاقىت ءبولىپ تۇراتىنىن، جەكپە-جەگىنەن تىس ۋاقىتتا قازاقستاندا بولاتىنىن اتاپ ءوتتى.  

«دانيەلگە مەن دە قارايمىن. قۇدايعا شۇكىر، بالام ءوسىپ جاتىر.

ول نۇر-سۇلتاندا اناسىمەن بىرگە تۇرادى. بيىل ۇلىم 4 جاسقا تولادى. دانيەل بوكسشى بولاتىن، بولمايتىنىن ءوزى شەشەدى. 2018 جىلدىڭ جازىندا كاسىبي بوكستا ەكىنشى جەكپە-جەگىمدى وتكىزگەننەن كەيىن سايدا ەسىمدى قىزعا ۇيلەندىم. 2019 جىلى 1 مامىردا ەكىنشى ۇلىم دۇنيەگە كەلدى. بالامنىڭ اتىن مۇحاممەد پايعامباردىڭ قۇرمەتىنە مۇحاممەد دەپ قويدىم»، – دەپ تۇيىندەدى ءسوزىن بوكسشى.

ۇسىنعان: اسەل بولات قىزى