ايتىسكەر اقىن رينات زايتوۆ ادىرنا ۇلتتىق پورتالىنا سۇحبات بەردى دەپ جازادى Qamshy.kz اقپارات اگەنتتىگى.
سۇحبات بارىسىندا رينات زايتوۆ قازىرگى قوعامدا بولىپ جاتقان وزەكتى ماسەلەلەر توڭىرەگىندە ايتتى. "شىندىقتان قاشىپ قۇتىلا المايسىڭ"، "ءادىل سايلاۋ ءۇشىن"، "مەنىڭ ءوز تاڭداۋىم بار" دەگەن ءتۇرلى باننەرلەر ارقىلى ءوز ويىن ءبىلدىرىپ، قامالعان بەلسەندىلەردى قولدايتىنىن ايتقان ول الدا كەلە جاتقان كەزەكتەن تىس پرەزيدەنت سايلاۋى تۋرالى پىكىرىن ءبىلدىردى.
اقىننىڭ ايتۋىنشا، الدا كەلە جاتقان سايلاۋ – قازاقستان قوعامىن سانانىڭ سەرپىلىپ، قوعامنىڭ ءبىر سىلكىنۋىنە اكەلەتىن سايلاۋ.
"بۇل سايلاۋدان ۇلكەن وزگەرىس كۇتەمىن. بۇل سايلاۋ - قازاقستاندا سانانىڭ سەرپىلۋىنە، قوعامنىڭ ءبىر سىلكىنۋىنە اكەلەتىن سايلاۋ. ويتكەنى ءبىزدى 30 جىل بيلەگەن باسشى اۋىسقاننان كەيىن قوعامنىڭ ءوز تاڭداۋى وزىنە بەرىلدى. سوندىقتان بۇل سايلاۋعا مىندەتتى تۇردە قاتىسۋىمىز كەرەك. بۇعان دەيىنگى سايلاۋلاردا ءبىزدى وتىرىكپەن الديلەپ، وزدەرى كىمگە داۋىس بەرگىزگىسى كەلسە بەرگىزىپ، ءوز دەگەنىن ىستەپ كەلگەن ۇكىمەت ەندى وسى سايلاۋدا ولاي ىستەي المايتىن شىعار دەپ ويلايمىن. ىستەيمىز دەپ ويلاپ تا وتىرعان شىعار مۇمكىن. ءبىراق قاراشا حالىق ءقازىر ويلاندى، وياندى. تۇگەلدەي بولماسا دا حالىقتىڭ باسىم بولىگىنىڭ ويانعانىن اڭعارۋعا بولادى اينالادان"،- دەگەن رينات زايتوۆ الدا كەلە جاتقان ساياسي دودا تۋراسىندا شىعارعان سۋ جاڭا ولەڭىن دە وقىپ بەردى:
"قازاقستان تۇراق ەمەس ءبىر كۇندىك،
وتان ءۇشىن ءبىز بيىككە ۇمتىلدىق.
ويان، قازاق، كوتەر باستى، ەستى جي!
وسى سايلاۋ ەڭ اقىرعى مۇمكىندىك.
ءبىزدىڭ تاڭداۋ – كوك بايراقتى قۇلاتپاۋ،
ءبىزدىڭ تاڭداۋ – ۇلتقا قارىز سۇراتپاۋ.
ءبىزدىڭ تاڭداۋ – بالالاردى ولتىرمەۋ،
ءبىزدىڭ تاڭداۋ – انالاردى جىلاتپاۋ.
ءبىزدىڭ تاڭداۋ – جەرىمىزدى ساتقىزباۋ،
جازىقسىزدى اباقتىعا جاپقىزباۋ.
ءبىزدىڭ تاڭداۋ – قازاقتاردى قۇل قىلماۋ،
ناجىستەردەن نارەستەلەر تاپقىزباۋ.
ءبىزدىڭ تاڭداۋ – تەرەزەنى تەڭ قىلۋ،
ەلىمىزدى ەرتەڭىنە سەندىرۋ.
ءبىزدىڭ تاڭداۋ – جەمقورلىقتى كىسەندەۋ،
ءبىزدىڭ تاڭداۋ – ۇلتىمىزدى ەل قىلۋ،
ءبىزدىڭ تاڭداۋ – تۋىسقاندى تالاماۋ،
ءبىزدىڭ تاڭداۋ – قازىنانى توناماۋ.
ءبىزدىڭ تاڭداۋ – جۇرتتىڭ جيىپ-تەرگەنىن
جەلكەسىنەن سىعىپ الىپ قاناماۋ.
كەتپەسىن دەپ تۋىس توزىپ، دوس ارىپ،
سايلاۋعا ءوز ءۇنىمىزدى قوسالىق.
ءبىزدىڭ تاڭداۋ بولاشاعى قازاقتىڭ،
مەندىك تاڭداۋ – ول – ءامىرجان قوسانوۆ"، - دەگەن زايتوۆ الدا كەلە جاتقان سايلاۋدا "ۇلت تاعدىرى" قوزعالىسى ۇسىنعان كانديدات ءامىرجان قوسانوۆتى قولدايتىنىن جاسىرمادى. ەستەرىڭىزدە بولسا، رينات زايتوۆ بۇعان دەيىن دە ءوزىنىڭ Youtube ارناسىنان تىكەلەي ەفيرگە شىعىپ، 9 ماۋسىمدا وتەتىن كەزەكتەن تىس پرەزيدەنت سايلاۋى تۋرالى ويىن بىلدىرگەن جانە سول كەزدە دە ول ءامىرجان قوسانوۆتى قولدايتىنىن اشىق ايتقان. ءبىراق اقىن تەك بۇل ءوزىنىڭ عانا جەكە پىكىرى ەكەنىن جانە قازاقستان ازاماتى رەتىندە ونى اشىق ايتا الاتىنىن ايتتى.
بۇعان دەيىن ءوز ويىن ايتىس ساحناسىندا دا، ءتۇرلى سۇحباتتاردا دا اشىق ايتاتىن رينات زايتوۆ قازىرگى قازاقستان بيلىگىنە كوڭىلى تولمايتىنىن ءھام بۇل بيلىك جۇيەسىنە تۇبەگەيلى قارسى ەكەنىن بۇل جولى دا ايتىپ ءوتتى.
"28 جىل بيلىك قۇرعان پارتيا ("وتان"، "نۇر-وتان") 28 جىلدىڭ ىشىندە حالىقتى الداۋمەن عانا كەلدى. 28 جىلدىڭ ىشىندە ايتقان ۋادەسىندە تۇرعان جوق. ونىڭ بىرەۋىن دە حالىق ۇمىتقان جوق ءالى. كەشەگى حراپۋنوۆتى اكىم قىلعان كىم؟ تاعى وسى جۇيە. كەشەگى جەمقورلارعا بۇكىل قازىنانى ءبولىپ بەرگەن كىم؟ تاعى وسى جۇيە. "ويباي، سەندەر 2020 جىلعا دەيىن 20 ميلليون بولاسىڭدار" دەپ ۇرانداپ، ءقازىر كوپ بالالى انالاردى زار جىلاتىپ جاتقان كىم؟ تاعى دا وسى ۇكىمەت. دوللار قىمباتتامايدى دەپ ۇلتتىق بانكتىڭ ءتوراعاسىن تەلەديداردان سويلەتىپ، ءبىر ايدان كەيىن حالىقتى قان جىلاتىپ دوللار باعاسىن اسپانداتقان كىم؟ تاعى وسى جۇيە. بۇكىل قىمباتشىلىقتى الىپ كەلگەن وسى جۇيە. بۇكىل اۋىل شارۋاشىلىقتى توقتاتىپ قويىپ، بۇكىل اقشانى ءبىر قالاعا سالىپ جاتقان تاعى دا وسى جۇيە. ءقازىر اشىعىن ايتقاندا، بۇل جۇيە حالىقتى شارشاتتى. سوندىقتان ءوز ويىم سايلاۋعا قاتىسىپ، ءوز كانديداتىمىزعا داۋىس بەرۋىمىز كەرەك. قۇداي بەتىن اۋلاق قىلسىن، ءبىراق بيلىك وسى جولى دا حالىقتى ويىنشىققا اينالدىرسا، ءوز دەگەنىن ىستەسە، حالىق شىدامنىڭ شەگىندە تۇر. وسى جولى دا سايلاۋدى ادىلەتسىز وتكىزسە، حالىق سايلاۋدىڭ ەرتەسى كۇنى الاڭعا شىعىپ كەتەتىنە كەپىلدىك بەرەمىن. ونى ەشكىم ۇيىمداستىرمايدى دا، قاراپايىم حالىقتىڭ كوزقاراسى سونداي ءقازىر"، - دەدى زايتوۆ.
سونىمەن قاتار، رينات زايتوۆ قازاق جاستارىنىڭ ەلدە جۇمىس تاپپاي، جاپپاي شەتەلگە كەتىپ جاتقانى، قازاقستانداعى ءدىننىڭ ناسيحاتى، ونەر ادامدارىنىڭ ۇلت تاعدىرىنا ءۇن قوسا الماي جۇرگەندىگى تۋرالى اشىلىپ، اشىق ايتتى.
ۆيدەو ادىرنا ۇلتتىق پورتالىنىڭ Youtube پاراقشاسىنان الىندى
دايىنداعان: ميات كاشىباي
♦وقي وتىرىڭىزدار: رينات زايتوۆ: "توقايەۆتى ءوز ەركىمەن ويلانىپ وتىرعان ادام دەپ ويلامايمىن"
پىكىر قالدىرۋ