اتىراۋ وبلىستىق پوليسيا دەپارتامەنتىنىڭ باسشىسى ا. دۇيسەمبايەۆ پەن سول وبلىستاعى قارجى پوليسياسى دەپارتامەنتى باسشىسىنىڭ ورىنباسارى ۋايسوۆقا قاتىستى ادەپكە جات قىلىقتار جاساعانى ءۇشىن قاتاڭ شارا قابىلداعانىن كورىپ، قىزىلوردا وبلىسى جاڭاقورعان  اۋداندىق ءماسليحاتىنىڭ دەپۋتاتى تۇردالى قالدىبايەۆ  پرەزيدەنت قاسىم-جومارت توقايەۆقا حات جولدادى دەپ جازادى Qamshy.kz اقپارات اگەنتتىگى. 

ول تۋرالى تۇردالى قالدىبايەۆ ءوزىنىڭ فەيسبۋك پاراقشاسىندا جاريالادى. "ءبىراق، ءبىزدىڭ اۋداننىڭ اكىمى امىرەيەۆكە ەشكىمنىڭ شاماسى كەلمەيدى-اۋ؟! ويتكەنى ونىڭ كوشەربايەۆتاي كوكەسى بار"، - دەلىنگەن حاتتا. 

حات اۆتورى اۋدان اكىمى عالىم امىرەيەۆتىڭ ادىلەتسىزدىگىن اشكەرەلەيدى.

قۇرمەتتى قاسىم-جومارت كەمەل ۇلى!
بىزدەر، جاڭاقورعاندىقتار "قازاقستاندا زاڭ جوق" دەگەن ويدا ءجۇر ەدىك. الايدا ءسىزدىڭ مەملەكەتتىك ورگاندار باسشىلارىنا حالىقپەن ەتەنە ارالاسۋ ءۇشىن الەۋمەتتىك جەلىلەر ارقىلى حالىقپەن تىكەلەي بايلانىسۋدى تاپسىرعان باستاماڭىزدى قۋانا قولدادىق. الەۋمەتتىك جەلىدەگى جازبا نەگىزىندە اتىراۋ وبلىستىق پوليسيا دەپارتامەنتىنىڭ باسشىسى ا. دۇيسەمبايەۆ پەن سول وبلىستاعى قارجى پوليسياسى دەپارتامەنتى باسشىسىنىڭ ورىنباسارى ۋايسوۆقا قاتىستى ادەپكە جات قىلىقتار جاساعانى ءۇشىن قاتال شارا قابىلدانعانىن كورىپ، ءار وڭىرلەردە ءوزى بي، ءوزى قوجا بولىپ ۇيرەنىپ قالعان شەنەۋنىك-سىماقتاردى دا تارتىپكە سالاتىن ادام بار ەكەن-اۋ دەپ ريزا بولىپ قالدىق.
ءبىراق، ءبىزدىڭ اۋداننىڭ اكىمى امىرەيەۆكە ەشكىمنىڭ شاماسى كەلمەيدى-اۋ؟! ويتكەنى ونىڭ كوشەربايەۆتاي كوكەسى بار. بۇلاي دەۋىمىزگە سەبەپ 2016 جىلدان باستاپ اۋدانىمىزعا اكىم بولىپ كەلگەن امىرەيەۆ ويىنا كەلگەنىن ىستەپ وتىر. مەملەكەتتىك قىزمەت ىستەرى اگەنتتىگىنىڭ باسشىسى حالىققا ەسەپ بەرگەن كەزدە كوماندالىق ءاۋىس-تۇيىستى توقتاتتىق دەپ جارياعا جار سالادى. ءبىراق بۇل زاڭ دا ءبىزدىڭ اكىمگە ارنالماعان. ويتكەنى اۋدانعا كوماندالاس دوستارىن ەرتىپ الىپ كەلەدى. (ەل اۋزىندا اكىمنىڭ كادر جونىندەگى ورىنباسارى دەگەن اتپەن تانىس ج.دۇيسەكەيەۆ اۋدان اكىمىنىڭ باس ينسپەكتورى، ا. بەكىشيەۆ جاڭاقورعان كەنتىنىڭ اكىمى، شتاتتان تىس كومەكشىسى، اۋدان اكىمىنىڭ جانىنداعى قوردىڭ قارجىسىنا يەلىك ەتۋشى ب. قيزاتوۆ) بۇلاردىڭ بارلىعى قازىرگى تاڭدا سىبايلاس جەمقورلىقتىڭ شىرماۋىنا شاتىلىپ ءىستى بولىپ جاتىر. بۇل ايتقاندارىم جالعان بولاتىن بولسا، وبلىستىق قارجى پوليسياسىنان بىلۋگە بولاتىن شىعار. (بۇل ازاماتتاردىڭ اۋداندا جاساعان ىستەرىن جەكە-جەكە جىكتەپ جازىپ ءسىزدىڭ ۋاقىتىڭىزدى المايىن. ونى بۇكىل اۋدان حالقى بىلەدى)
اۋدان اكىمىنىڭ كادر جونىندەگى ورىنباسارى دەگەن لاقاپ اتى بار، وزىمەن ەرىپ كەلگەن كومەكشىسى دۇيسەكەيەۆ «اۋدان اكىمىنىڭ قامقورلىعىندا بولۋى ءۇشىن» ءبولىم باسشىلارى مەن اۋىل اكىمدەرىنەن تۇراقتى تۇردە قارجىلاي جانە وزگەدەي سىياقى الىپ وتىرعان. ەگەردە اۋدان اكىمىنىڭ ىقپالى بولماسا، بىرنەشە جىل قىزمەت ءوتىلى مەن ومىرلىك تاجىريبەسى بار مەكەمە باسشىلارى قارشاداي بالانىڭ ايتقانىن ىستەپ، سۇراعانىن بەرە بەرەتىندەي ولاردىڭ ارتىق دۇنيەلەرى كوپ پە ەكەن؟ بۇكىل اۋداننىڭ حالقى بىلەتىن، تاپسىرمالاردىڭ بارلىعىن اۋدان اكىمىنىڭ بەرىپ وتىرعانىن انىقتاۋعا قۇزىرلى ورگاندارعا دالەل جەتپەي جاتىر ما؟. الدە دالەل بولۋى ءۇشىن اۋدان اكىمى جەكە كومەكشىسىنە بەرگەن تاپسىرمالارىن ميكروفونمەن جالپى جۇرتتىڭ الدىندا ايتۋى كەرەك پە؟ اۋدان اكىمىمەن تاۋلىكتىڭ 24 ساعاتىندا بىرگە جۇرەتىن (اۋدان اكىمىنىڭ قىزمەتتىك تۇرعىن ۇيىندە دە بىرگە تۇراتىن) ەكى جەكە كومەكشىسىمەن ولجالى جوسپار قۇرۋى ءۇشىن، وڭاشا ورىن جەتەدى ەمەس پە؟
امىرەيەۆ جەكە كومەكشىلەرىن اكەلگەنىمەن قويماي، كومەكشىسى ج. دۇيسەكەيەۆتىڭ ايەلى جۇمىس ىستەمەسە دە اۋداندىق قارجى ءبولىمى ارقىلى زاڭسىز ەڭبەكاقى تولەنىپ، سونىڭ نەگىزىندە نەگىزسىز جۇكتىلىگىنە بايلانىستى جاردەماقى دا تاعايىندالىپ وتىر. زاڭسىز ەڭبەكاقى تولەگەن سول كەزدەگى قارجى ءبولىمىنىڭ باسشىسى ا. سالىبەكوۆتى "ادال" بەرىلگەندىگى ءۇشىن اۋدان اكىمىنىڭ ورىنباسارى ەتىپ تاعايىنداعان. 
اۋدان اكىمى مەن ونىڭ سەرىكتەستەرىنىڭ كەسىرىنەن اۋدانداعى مەملەكەتتىك ورگاننىڭ باسشىلارى قۇزىرلى ورگاندارعا جاۋاپ بەرىپ جۇرگەن جاعدايلارى بار.
بۇل جاعدايلاردىڭ بارلىعى جونىندە قىلمىستىق ءىس قوزعالماي تۇرىپ، وبلىس اكىمى ق. كوشەربايەۆقا الدىن-الا ەسكەرتىلىپ، حات جولدانعان بولاتىن.
وبلىس اكىمىنە ەسكەرتىلىپ جازىلعان حاتتا اتالعان اۋدان اكىمى امىرەيەۆكە جەكە باسىنا بەرىلگەندىك قاسيەتى بويىنشا باعالاناتىن "اۋداندىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى ح. احمەتوۆ تە سىبايلاس جەمقورلىقپەن كۇدىكتى رەتىندە ءىستى بولىپ جاتىر" دەپ ەستيمىز.
ءدال قازىرگى كەزەڭدە اۋداندا قوعامدىق-ساياسي احۋال تولقىپ تۇر. وسىنداي سايلاۋالدى ناۋقان كەزىندە جەرگىلىكتى اتقارۋشى ورگان تاراپىنان حالىقتىڭ كوڭىلىنەن شىعاتىن ساۋاتتى قادامدار جاسالماسا، جاعداي ۋشىعىپ كەتۋى مۇمكىن. ولاي دەيتىنىم، قازىرگى تاڭدا امىرەيەۆتىڭ يدەولوگيا جونىندەگى اقىلشى، كەڭەسشىسى، اۋداندىق ىشكى ساياسات ءبولىمىنىڭ باسشىسى ءا. تولەگەنوۆتىڭ جاي عانا اۋدان دەڭگەيىندە وتكىزىلگەن اۋىل اكىمىنىڭ سايلاۋىندا، اۋداندىق ماسليحات دەپۋتاتتارىنىڭ داۋىسىن بەلدەن باسىپ، قاساقانا بۇرمالاپ جۇرگەندىگىن ەسكەرەتىن بولساق، الداعى ۇلكەن سايلاۋ ناۋقانىندا ساۋاتسىز ساياسي قادامدار جاساپ، حالىقتىڭ نارازىلىعىن تۋدىرۋى ابدەن مۇمكىن.(اۋىل اكىمدەرىنىڭ سايلاۋى كەزىندەگى قوزعالعان قىلمىستىق ءىس جانە دەپۋتاتتاردىڭ اكتىسى بار) اۋداندىق ءماسليحات دەپۋتاتتارىنىڭ وسى ماسەلەگە بايلانىستى اۋدان اكىمىنە جازعان نارازىلىعىنان سوڭ، تولەگەنوۆتىڭ سول كەزدەگى سايلاۋ كوميسسياسى ءتوراعالىعىنان بوساتىلىپ، اتقارىپ وتىرعان قىزمەتىنەن بوساتۋ ماسەلەسى اۋدان اكىمىنىڭ نازارىنا الىنعاندىعى جونىندە جاۋاپ بەرىلگەن. (حاتتىڭ كوشىرمەسى بار) 
امىرەيەۆ ءۇشىن تولەگەنوۆتىڭ اقىل كەڭەسى التىننان دا قىمبات دەۋگە بولادى.سەبەبى امىرەيەۆتىڭ زاڭسىز بوساتقان يدەولوگيا جونىندەگى ورىنباسارى ايتبەمبەتتىڭ ورنىنا تولەگەنوۆتى يدەولوگيا جونىندەگى ورىنباسارى ەتىپ اكەلۋگە امىرەيەۆ اسا بەلسەندىلىكپەن جۇمىس جاساۋدا. ولاي ويلامايىن دەسەڭ، بوس ورىنعا بىرنەشە رەت كونكۋرس وتكىزگەنىمەن ەشكىم قاتىسپايدى. قاتىسقان ادام باس تارتادى. سوندا امىرەيەۆتىڭ ول ورىنعا ماماندىعى اگرونوم بولسا دا تولەگەنوۆتەن باسقا ەشكىمدى سايكەس كورمەۋى قانداي زاڭعا سايكەس كەلەدى ەكەن؟ بوس تۇرعان اۋدان اكىمى ورىنباسارىنىڭ اتقاراتىن مىندەتىنتولەگەنوۆتىڭ بىلىمىنە، ماماندىعىنا سايكەستەندىرۋ ءۇشىن مەملەكەتتىك قىزمەت ىستەرى دەپارتامەنتىنە ءوتىنىش جاساۋدا دەپ ەستيمىز.
وسى جەردە ايتارىم، وبلىس اكىمىنىڭ اپپاراتى مەن وبلىستىق مەملەكەتتىك قىزمەت دەپارتامەنتى ءبىر جىلعا جۋىق بوس تۇرعان اۋدان اكىمىنىڭ ورىنباسارى لاۋازىمىنىڭ نەگە بوس تۇرعاندىعىنان حابارسىز بولعانى ما؟ بولماسا، ەشكىم زەردەلەۋ جاسامايدى ما؟ وسىنداي ناۋقان ۋاقىتىندا نەگە جىلعا جۋىق ۋاقىت بوس تۇرادى؟ 
اۋداندا بىلىكتى مامان سانالاتىن بۇرىنعى اۋداندىق ەكونوميكا ءبولىمىنىڭ باسشىسى س. اسەنوۆتى دە جۇمىستان زاڭسىز بوساتقاندىعى جونىندە حالىق اراسىندا اشىق ايتىلىپ ءجۇر. 
قازىرگى تاڭدا رەسپۋبليكا دەڭگەيىندە حالىقتىڭ ءال-اۋقاتىن ارتتىرۋ بويىنشا كەشەندى شارالار قابىلدانىپ جاتقان ۋاقىتتا قىزىلوردا وبلىسىنىڭ حالقى كوپ شوعىرلانعان بەلدى اۋدانى، دامۋ پەرسپەكتيۆاسى بار جاڭاقورعان اۋدانىنىڭ اكىمى اۋداندى دامىتۋ ءۇشىن بىلىكتى مامانداردى جۇمىلدىرىپ جۇمىس جاساۋدىڭ ورنىنا، وزىنە «ادال» قىزمەتكەرلەرى سىبايلاس جەمقورلىققا شاتىلىپ، ال ءوزى بولسا قاراماعىنداعى قىزمەتكەرلەردى زاڭسىز قۋدالاپ، سوتتاسۋدا. سوندا دەيمىن، وزگە وڭىرلەردە اكىمدەر مەن مينيسترلەر حالىقپەن كەزدەسىپ، حالىقتىڭ مۇڭ-مۇقتاجىن تىڭداپ، ءال-اۋقاتىن ارتتىرۋعا جۇمىس جاساپ، باستارىن اۋىرتىپ جاتسا، ءبىزدىڭ اۋداندا اۋدان اكىمى باستاعان 10 – عا جۋىق مەملەكەتتىك قىزمەتشىلەر سىبايلاس جەمقورلىققا شاتىلىپ نەمەسە وز-وزدەرىمەن ايتىسىپ، سوتتاسىپ جاتىر.
وسى امىرەيەۆتىڭ كەسىرىنەن كۇدىككە ءىلىنىپ، شاتىلىپ جاتقان جانە زاڭسىز جۇمىستان بوساتىلعان قىزمەتكەرلەردىڭ ارتىندا قانشاما وتباسى مۇشەلەرى، اعايىن-تۋىستارى سارى ۋايىمعا سالىنىپ، نارازى بولۋدا.
قازاقتا "ەت ساسىسا تۇز سەبەمىز، تۇز ساسىسا نە سەبەمىز؟" دەگەن ءسوز بار. ەندەشە حالىق ءۇشىن پايداسى جوق، ەل-جۇرتتى شۋلاتىپ، حالىقتىڭ بيلىككە دەگەن رەنىشىن تۋعىزاتىن ارەكەتتەرىمەن اشكەرە بولعان امىرەيەۆ سياقتى اكىمنىڭ اۋدان ءۇشىن قانشالىقتى قاجەتى بار؟

قۇرمەتتى قاسىم-جومارت كەمەل ۇلى!

مەن ءبىزدىڭ اۋداندا بولىپ جاتقان كەلەڭسىزدىكتەردى جالپىلاما عانا اتاپ ءوتتىم. مۇنان وزگە دە اكىمدىك جانىنان قۇرىلعان قورعا ءتۇسىپ، نەگىزسىز جاراتىلعان 54 ملن تەڭگە نەمەسە جەكە كاسىپكەردىڭ ساتىپ پايدا تابۋى ءۇشىن جەكە قاراجاتىنا سالعان قۇنى 400 ملن تەڭگەدەن اسپايتىن كوپ قاباتتى تۇرعىن ۇيلەرىنە مەملەكەتتىك بيۋدجەتتەن ءۇيدىڭ قۇنىنان 3،5 ەسە كوپ، ياعني 1 ملرد 400 ملن تەڭگەگە ينفراقۇرىلىم جەتكىزۋدىڭ قانشالىقتى قاجەتتىلىگى جونىندە جانە وزگە دە ماسەلەلەر باسى اشىق كۇيىندە قالىپ وتىر.
سوندىقتان ارى قاراي ءوز تاراپىڭىزدان ءتيىستى تاپسىرمالار بەرىپ، قاجەتتى شارالار قابىلدانادى دەپ سەنەمىز.