ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ اياسىندا جامبىل وبلىسىندا باياندى باستامالار قولعا الىنىپ، جارقىن جوبالار جۇزەگە اسۋدا. اسىرەسە، ۇلتتىق قۇندىلىقتاردى ۇلىقتاۋعا، تەرەڭنەن تامىر تارتاتىن تەكتىلىگىمىزدى دارىپتەۋگە باسىمدىق بەرىلۋدە. سونىمەن قاتار جاۋھار جادىگەرلەردى ناسيحاتتاۋ ارقىلى ءتول تاريحىمىزدىڭ تاعىلىمىن تانىتۋعا دا ايرىقشا كوڭىل بولىنۋدە.  وسى ورايدا جامبىل وبلىسى اكىمدىگى تۋريزم باسقارماسىنىڭ ۇيىمداستىرۋىمەن ورتاعاسىرلىق تورتكۇل ساراي كەشەنىندە  «كونە تاراز شەبەرلەرىنىڭ» قالاشىعى اشىلدى.

ايتا كەتۋ كەرەك، قۇتتى قۇندىلىقتاردىڭ ورداسىنا اينالعان قالاشىقتىڭ ەسىگى التى اي ايقارا اشىق بولماق. ياعني ءار اپتانىڭ دەمالىس ءھام مەرەكە كۇندەرى قالا قوناقتارى مەن تۇرعىندارى ەمىن-ەركىن ەتنواۋىلعا باس سۇعىپ، ومىرشەڭ ونەر تۋىندىلارىن تاماشالاي الادى.

ۇلتتىق ناقىشتا كيىنىپ، قازداي تىزىلگەن انالار، التىباقاننىڭ ءسانىن كىرگىزگەن جاستار، ادىرنا تارتىپ، نىساناعا جەبە سىلتەگەن جۇمىر جىگىتتەر، ءان مەن جىردان شاشۋ شاشقان ونەرپازدار، وسىنىڭ بارلىعى ورتاعاسىرلىق تاريحتىڭ كۋاسى بولعان تورتكۇل ساراي كەشەنىن سالتاناتقا بولەدى. شەت ەلدەن كەلگەن قوناقتارعا دا، شاھاردىڭ جەرگىلىكتى حالقىنا دا شاراپاتتى شاتتىق سىيلادى.    

–«رۋحاني جاڭعىرۋ» باعدارلاماسى اياسىندا «قازاق اۋىلى» ەتنو-جوباسىن قۇرۋدىڭ باستى ماقساتى - كونە تاراز ءداستۇرىن، كوشپەندىلەردىڭ بىرەگەي، جارقىن جانە ايقىن مادەنيەتىن، وتكەن تاريحىن جاڭعىرتۋ. ۇلتتىق-مادەني كەشەن قوناقتاردى قازاق حالقىنىڭ باي تاريحىمەن، مادەنيەتىمەن، ونەرىمەن جانە سالت-داستۇرىمەن تانىستىرادى. كەشەندە كەز كەلگەن ادام كوشپەندىلەر وركەنيەتىنىڭ ەتنو مادەني ورتاسىن سەزىنە الادى جانە اۋىلدىڭ كۇندەلىكتى، مەرەكەلىك ومىرىنە كوز جۇگىرتۋگە تولىعىمەن يە بولادى. ەتنواۋىلدا قازاق مۋزىكالىق جانە تەاتر ونەرىنىڭ فەستيۆالدەرى، قولونەر شەبەرلەرىنىڭ ماستەر-كلاسستارى، ۇلتتىق تاعامدار، قولونەر جانە كوركەم ونەر كورمەلەرى، ەتنيكالىق مۋزىكالىق فەستيۆالدار، ۇلتتىق سپورت تۇرلەرىنەن جارىستار جانە باسقا دا ءىس-شارالار وتەدى. اتاپ ايتقاندا «ءداستۇرلى اڭ اۋلاۋ تۇرلەرى»، «ۇلتتىق ويىندار مەن ويىن-ساۋىق»، «ۇلتتىق تاعام»،  «قازاق مۋزىكالىق-تەاتر ونەرى»، «قولونەرشىلەر» سەكتورلارىن تاماشالاعان ادام قازاق حالقىنىڭ ادەت-عۇرىپى، سالت-ساناسى جايلى مول اقپارات الاتىنى ءسوزسىز،-دەيدى وبلىس اكىمدىگى تۋريزم باسقارماسىنىڭ باسشىسى قارلىعاش ارالبەكوۆا.   

شارا بارىسىندا قازاقستان قولونەرشىلەر وداعىنىڭ ءتورايىمى ايجان بەككۋلوۆا ءسوز تىزگىندەپ، سان عاسىرلار بويى تالايدى ءتانتى ەتىپ، ۇرپاقتان ۇرپاققا ميراس بولىپ جەتكەن قولونەردىڭ قىر-سىرىن، ۇلگى-ونەگەسىن كەڭىنەن اڭگىمەلەپ، تارازدىق شەبەرلەردىڭ شەديەۆرلەرىنە قولداۋ ءبىلدىرىپ، شابىت سىيلاعان ءھام وسى شارانى ۇيىمداستىرۋشىلارعا العىس ءبىلدىردى. ساحنادا ءان مەن جىر توگىلسە، ەتنواۋىل ماڭىندا زەرگەرلەر وزدەرىنىڭ اشەكەي بۇيىمدارىن، توقىلعان، ورىلگەن ونەر تۋىندىلارىن حالىققا تانىستىردى.

ونىڭ ىشىندە دومبىرانىڭ قالاي جاسالاتىنىنا دەيىن كورسەتىلدى. Qazaq-Oner قولونەرشىلەر ورتالىعىنىڭ باسشىسى ايگۇل جانسەرىكوۆا مەن ورتالىق ازيا قولونەرشىلەردى قولداۋ قاۋىمداستىعىنىڭ (CACSA) پرەزيدەنتى مۋكارراما كايۋموۆا كوپشىلىككە قولونەر تاقىرىبىندى شەبەرلىك ساعاتتارىن وتكىزدى. جالپى وتكەن جىلى وڭىرگە 400 مىڭنان استام تۋريست كەلىپتى.  ولارمەن جۇرگىزىلگەن ساۋالناما قورىتىندىسى وسىنداي شەبەرلەر قالاشىعىن  اشۋعا سەپ بولعان كورىنەدى.

ماڭىزدى شاراعا ارنايى الىستان ات تەرلەتىپ جەتكەن ونەر ماماندارى مەن ساراپشىلار از بولعان جوق. گەرمانيا، بولگاريا، تاجىكستان، وزبەكستان، قىرعىزستان ەلدەرىنەن كەلگەن مايتالماندار دا قازاقتىڭ قىرانى قالىقتاپ، تازى ويناعان، قىمىز ساپىرىلىپ، تاريحپەن سىرلاسقان ەتنواۋىلدان تابىلدى. وزدەرىنىڭ مول تاجىريبەسىمەن ءبولىستى. تاڭ سارىدەن كەشكە دەيىن جالعاسقان شارانىڭ سوڭىندا سالا مايتالماندارى، قالا مەيماندارىمەن ارىپتەستىك بايلانىس نىعايىپ، وڭىدەگى تۋريزم مەن ونەردى دامىتۋ ماقساتىندا ءبىرقاتار مەموراندۋمعا قول قويىلدى.

جويقىن جىگەر