مەديسينالىق ساقتاندىرۋ ساراپشىلارى قاراقيا اۋداندىق ورتالىق اۋرۋحانا مەن ەمحانا قىزمەتكەرلەرىنە تۇسىندىرمە جۇمىستارىن جۇرگىزدى. اتاپ ايتقاندا، مىندەتتى الەۋمەتتىك مەديسينالىق ساقتاندىرۋ جۇيەسىنىڭ قاعيدالارى، ەنگىزۋ كەزەڭدەرى مەن ونىڭ ۇتىمدى جاقتارى تۋرالى ايتىلدى. مەديسينا سالاسىنىڭ ماماندارىمەن كەزدەسۋ – بيىلعى كەڭ كولەمدى اقپاراتتىق-تۇسىندىرمە جۇمىستارىنىڭ العاشقى كەزەڭى. بۇدان بولەك،  تۇرعىندار  جانە جۇمىس بەرۋشى، سونداي-اق جۇمىسشىلارمەن دە كەزدەسۋلەر ۇيىمداستىرىلىپ وتىر.

-«قۇرىقتاعى №1-ورتا مەكتەپ ۇجىمىمەن كەزدەسىپ، دەنساۋلىق سالاسىندا 2020 جىلدا بولاتىن ەڭ ۇلكەن جاڭالىق – مەديسينالىق ساقتاندىرۋدىڭ ماڭىزىن ايتتىق. ال ءقازىر ەمحانا قىزمەتكەرلەرىنە ءمامس جۇيەسى تۋرالى وقىتۋعا كەلىپ وتىرمىز. اق حالاتتىلار جاڭا باعدارلاما تۋرالى ەگجەي-تەگجەيلى ءبىلۋى ءتيىس. سەبەبى، ساقتاندىرىلعان ازاماتتار مرت، كتا سياقتى قىمبات مەديسينالىق قىزمەت تۇرلەرىن تەگىن الا الادى، - دەدى «الەۋمەتتىك مەديسينالىق ساقتاندىرۋ قورى» جەرگىلىكتى فيليالىنىڭ باس ساراپشىسى ايانگۇل جۇماش.

            ەستەرىڭىزگە سالا كەتەيىك، قازاقستاندا ۇزدىك حالىقارالىق تاجىريبەنى ەسەپكە الا وتىرىپ مەملەكەت، جۇمىس بەرۋشى جانە ءاربىر ادامنىڭ ىنتىماقتى جاۋاپكەرشىلىگىنىڭ نەگىزىندە ازىرلەنگەن مەديسينالىق ساقتاندىرۋ جۇيەسىن ەنگىزۋ جۇمىستارى باستالادى. سونىمەن قاتار، مەملەكەت ەكونوميكالىق بەلسەندىلىگى تومەن حالىق ءۇشىن جارنا تولەيتىن بولادى. جۇمىس بەرۋشىلەر – جالدامالى جۇمىسشىلار ءۇشىن، قىزمەتكەرلەر مەن سالىق ورگاندارىندا تىركەلگەن ءوزىن-وزى قامتىعان ازاماتتار وزدەرى ءۇشىن تولەيتىن بولادى.

            مەملەكەت ازاماتتاردى تەگىن مەديسينالىق كومەكتىڭ كەپىلدىك بەرىلگەن كولەمىمەن (ءارى قاراي - تمككك) ءارى قاراي قامسىزداندىرۋىن جالعاستىرادى. ولاردىڭ قاتارىنا الەۋمەتتىك ءمانى بار اۋرۋلار، شۇعىل جاعدايلار، جەدەل مەديسينالىق كومەك، سانيتارلىق اۆياسيا مەن ۆاكسينالاۋ كىرەدى.  ال، ءمامس اياسىندا ساقتاندىرىلعان ازاماتتارعا جوعارعى تەحنولوگيالىق مەديسينالىق قىزمەتتەر، ستاسيوناردى الماستىراتىن تەحنولوگيالار، ۇزاق مەرزىمدى مەيىرگەرلىك كۇتىم، امبۋلاتورلىق دارىلەرمەن قامسىزداندىرىلعان امبۋلاتورلىق-ەمحانالىق كومەك كورسەتىلەتىن بولادى.