بۇل تۋرالى وڭىرلىك كوممۋنيكاسيالار قىزمەتى الاڭىندا وتكەن بريفينگتە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارما باسشىسىنىڭ ورىنباسارى قاراشاش نۇرمامەدوۆا مالىمدەدى.
2018 جىلى وبلىس بويىنشا 9100 ادام عانا اتاۋلى كومەكتى السا، جىل باسىنان بۇل كورسەتكىش بىرنەشە ەسە كوبەيىپ، ااك العاندار سانى 32025 ادامعا (5633 وتباسى) جەتكەن. رەسپۋبليكالىق بيۋدجەتتەن 2018-جىلى 469 ملن تەڭگە بولىنسە، وسى جىلدىڭ تەك ءبىر عانا مامىر ايىندا 733 ملن 600 مىڭ تەڭگە تولەنگەن. بۇل دەگەنىمىز، وسى جاردەماقىعا مۇكتاج ازاماتتاردى قامتۋ شارالارى ۇكىمەت تاراپىنان جوعارى دەڭگەيدە جۇرگىزىلىپ جاتقاندىعىن بىلدىرەدى. جىل سوڭىنا دەيىن ءالى 9 مىڭداي ءوتىنىش قارالۋ جوسپارلانۋدا.
«ايتا كەتەتىن ءبىر ءجايت، قۇجات تاپسىرعىسى كەلەتىن ۇمىتكەر اۋدان ورتالىعىنان شالعاي اۋىلدا تۇرسا، اۋىل اكىمىنە تىكەلەي بارىپ اتاۋلى كومەككە الۋعا ءوتىنىش جازا الادى، وعان ونىڭ تولىق قۇقىعى بار. سەبەبى، «E-XALYK» جۇيەسى ءاربىر اكىمدىكتە ورناتىلعان. وسىلايشا ۇزىن-سونار كەزەك بولماي، ماسەلەسى تەز ارادا شەشىمىن تابادى. سونىمەن قاتار، كوپە-كورنەۋ جالعان اقپارات ۇسىنىپ، قۇجاتتارى سايكەس ەمەس ازاماتتارعا جاردەماقى تولەنبەيدى. الاياقتىققا جول بەرىلىپ جاتقان فاكتىلەر دە از ەمەس. جىل باسىنان بەرى 32 مىڭنان استام ادامعا تاعايىندالعان كومەكتىڭ 16800ء-ى 18 گە تولماعان بالالار قۇراپ وتىر» ، - دەدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارما باسشىسىنىڭ ورىنباسارى قاراشاش ىشبەرگەن قىزى.
اتاۋلى الەۋمەتتىك كومەك - بۇل از قامتىلعان ازاماتتارعا جانە تابىستارى تومەن دەڭگەيدەگى وتباسىلارعا، ونىڭ ىشىندە كوپبالالى وتباسىلارعا بەرىلەتىن اقشالاي تولەم. بيىلعى جىلدىڭ 1-ساۋىرىنەن باستاپ اتاۋلى كومەكتىڭ كريتەرييلەرى وزگەرگەن. ءبىرىنشى، بۇرىن جاردەماقى كۇنكورىس دەڭگەيىنىڭ 50 پايىزىن قۇراسا، قازىرگى تاڭدا 70 پايىزى مولشەرىندە تولەنىپ وتىر. وبلىس بويىنشا كۇنكورىس دەڭگەيى 33553 تەڭگەنى قۇراسا، اتاۋلى الەۋمەتتىك كومەككە ۇمىتكەر ادامنىڭوتباسى مۇشەسىنە 23487 تەڭگەدەن جەتپەگەن جاعدايدا بۇل وتباسى كومەك اكشانى الۋعا قۇقىلى بولىپ تابىلادى. ەكىنشى، تاپسىراتىن قۇجاتتار تىزبەسى وڭتايلانعان، ياعني ءبىر عانا جەكە باسىن كۋالاندىراتىن قۇجاتپەن ەسەپكە تۇرا الادى. سەبەبى، ۇمىتكەر تۋرالى بارلىق اقپاراتتار حالىقتى ەڭبەكپەن جانە الەۋمەتتىك قورعاۋ مينيسترلىگىنىڭ اقپاراتتىق جۇيەسىنە ەنگىزىلگەن. وسىنىڭ ارقاسىندا قولجەتىمدىلىك ۇلعايىپ، مۇمكىندىكتەر ارتقان.
پىكىر قالدىرۋ