مەملەكەتتى باسقاراتىن ءبىرىنشى تۇلعانى سايلاۋ قاي ەلدە بولماسىن اسا جاۋاپتى ءىس رەتىندە قابىلدانادى. سەبەبى ول ادام سول ەلدىڭ كەلەشەك دامۋىن انىقتاۋدا، ەكونوميكاسى مەن حالىقتىڭ ءال-اۋقاتىن دامىتۋدا اسقان جاۋاپتى شەشىمدەر قابىلدايدى، سول باعىتتا كەلەلى جۇمىستار اتقارىلۋىنا باعىت-باعدار بەرەدى.

حالقىمىز ءوز قالاۋىن جاسادى، ەلىمىزدىڭ پرەزيدەنتى بولىپ كورنەكتى مەملەكەت جانە قوعام قايراتكەرى قاسىم-جومارت كەمەل ۇلى توقايەۆ سايلاندى. مەن مۇنى وتە دۇرىس شەشىم دەپ قابىلدايمىن. قاسىم-جومارت كەمەل ۇلى قازاق حالقىنان شىققان شەتەلدەرگە تانىمال تۇلعا.

قازاق ەلى قازىرگى ۋاقىتتا الەمدىك كەڭەستىكتە وزىندىك ورنى بار كەلەلى مەملەكەتتەردىڭ ءبىرى. جاھاندانۋ زامانىندا قانداي بولماسىن ەلدىڭ دامۋى باسقا مەملەكەتتەرمەن ءتيىمدى جۇرگىزىلەتىن كوپسالالى قاتىناستارعا بايلانىستى بولادى. قاسىم-جومارت كەمەل ۇلىنىڭ وسى باعىتتاردى قازىرگى ۋاقىتقا دەيىن جۇرگىزىلگەن ىستەردى جاڭا قارقىندا جۇرگىزە الاتىنىنا حالىق مول سەنىم بىلدىرەدى.

كومپاراتيۆيست عالىم رەتىندە زەرتتەۋلەر جۇرگىزىپ، ءوز جاستارىنا ساپالى ورتا ءبىلىم بەرىپ وتىرعان 30 ەلدى انىقتادىم. ول ەلدەر ەكونوميكاسى قارقىندى دامىپ وتىرعان ەلدەر بولىپ شىقتى. ەلىمىزدىڭ تۇراقتىلىعىنىڭ، حالىقتىڭ ءال-اۋقاتى مەن ەل ەكونوميكاسىنىڭ قارقىندى دامۋىنىڭ باستى كەپىلى جاستارعا ساپالى ورتا ءبىلىم بەرۋ ەكەنىن ايتقىم كەلەدى.  وسى رەتتە، جاستارعا قولداۋ كورسەتىپ وتىرعان پرەزيدەنتىمىزدىڭ  ساياساتىن تولىق قولدايمىن، سايلاۋدا جەتكەن جەڭىسىمەن قۇتتىقتايمىن.

پەداگوگيكالىق عىلىمدار  اكادەمياسىنىڭ باسقارما ءتوراعاسى، بۇكىلدۇنيەجۇزىلىك سالىستىرمالى ءبىلىم بەرۋ قوعامدارى كەڭەسىنىڭ اتقارۋشى كوميتەتىنىڭ مۇشەسى،

ق ر مەملەكەتتىك سىيلىعىنىڭ يەگەرى، اكادەميك

اسقاربەك قۇسايىنوۆ