ەلباسىمىزدىڭ باستاماسىمەن جاريالانعان «جاستار جىلىندا» قمدب-نىڭ وسكەمەن ايماعى وكىلدىگىنىڭ ۇيىمداستىرۋىمەن شىعىس قازاقستان وبلىسىندا «جاس تولقىن: دالا سەمينارى» جوباسى ءوز جۇمىسىن باستادى. بۇل تۋرالى Qamshy.kz اقپارات اگەنتتىگى شىعىس قازاقستان وبلىستىق «حاليفا التاي» مەشىتىنىڭ باسپا ءسوز قىزمەتىنە سىلتەمە جاساپ حابارلايدى.
وكىلدىكتەن التاي اۋدانى كۇمىسبۇلاق ولكەسىنە ونشاقتى كيىز ءۇي تىگىلىپ، سپورتتىق الاڭقاي جاسالىپ، ءار وبلىستاردان كەلگەن جاستارعا بارلىق جاعداي جاسالدى. قازىرگى تاڭدا «دالا سەمينارى» جوباسىنا ەلىمىزدىڭ ءار وبلىسىنان، قمدب وكىلدىكتەرىنەن جينالعان 80-گە تارتا جاس قاتىسىپ جاتىر. ولار 3-4 مەزگىل اس-سۋمەن، جاتار ورىنمەن قامتىلعان. شارانىڭ ءساتتى وتۋىنە وكىلدىك تاراپىنان ەرەكشە نازار اۋدارىلىپ، وڭىرگە قاراستى اۋدان، قالا مەشىتتەرى تۇگەل جۇمىلدىرىلدى.
«دالا سەمينارى» بارىسىندا جاستارعا جات اعىمدارعا قارسى كۇرەس، ۇلتتىق قۇندىلىقتاردى ناسيحاتتاۋ تۋراسىندا سەمينار-ترەنينگتەر ۇيىمداستىرىلىپ جاتىر. سونىمەن قاتار قوعام قايراتكەرلەرىمەن كەزدەسۋلەر وتكىزۋ دە جوسپارلاندى.
سەمينار تۋرالى قمدب وسكەمەن ايماعىنىڭ وكىل يمامى ەرمەك قاسبولات ۇلى: «تابيعات اسىندا كيىز ۇيدەگى وسى شارا جاستاردىڭ ەرەكشە قىزىعۋشىلىعىن تۋعىزدى. ەلباسىمىزدىڭ باستاماسىمەن جاريالانعان «جاستار جىلىندا» جاستاردى قامتىعان رۋحاني-تانىمدىق شارالار وتكىزۋ ارقىلى جات اعىمداردان ساقتانۋ، ۇلتتىق قۇندىلىقتارى دارىپتەۋ قازىرگى تاڭداعى وزەكتى ماسەلە ەكەندىگى ايان. سوندىقتان وكىلدىكتەن ايىرىقشا فورماتتاعى وسى شارانى ۇيىمداستىرىپ وتىرمىز. جاستار تازا اۋادا دەمالۋىمەن قاتار ءبىر بىرىمەن تانىسىپ، بىرلىگىن ارتتىرىپ، تاجىريبە الماسادى» دەپ اتاپ ءوتتى.
بۇل يگى باستاما ءوز كەزەگىندە قمدب جاستار ءىسى بولىمدەرىنىڭ ءوزارا تاجىريبە الماسۋىنا دا ەرەكشە اسەرىن تيگىزەرى انىق.
ەلىمىزدە العاش رەت قولعا الىنىپ وتىرعان «جاس تولقىن: دالا سەمينارىنا» جاستار ايىرىقشا بەلسەندىلىكپەن قاتىسىپ، جاڭا يدەيالارىن ورتاعا سالىپ، تازا اۋا، تابيعات اياسىندا باس قوسىپ، ماسەلەلەر تالقىلاپ قانا قويماي، ونەرمەن سپورتتان سايىسقا ءتۇسىپ، ءىس-شارا ەرەكشە سيپاتتا ءوتىپ جاتىر.
الداعى كۇندەرى جاستار وبلىستاعى ماڭىزدى تاريحي ورىندارى ارالايدى دەپ كۇتىلۋدە.
پىكىر قالدىرۋ