شىعىس قازاقستاننىڭ ءىرى كاسىپورىندارى مەن تۇرعىندارى ارىس قالاسىنا كومەك رەتىندە 166 ميلليون تەڭگەدەن استام قاراجات جينادى دەپ حابارلايدى Qamshy.kz اقپارات اگەنتتىگى.  

بۇعان قوسا 211 توننادان استام گۋمانيتارلىق كومەك وڭتۇستىكتەگى اپاتتان زارداپ شەككەن اعايىندارعا جونەلتۋگە دايىن. ونىڭ باسىم بولىگى ازىق-تۇلىك، سونىمەن قوسا گيگيەنالىق زاتتار، توسەك-ورىن جابدىقتارى مەن كيىم-كەشەك. 

– گۋمانيتارلىق كومەك جيناۋ «Nur Otan» پارتياسى وبلىستىق فيليالىنىڭ باقىلاۋىندا بولدى. وڭىردەگى ءار كاسىپورىن كومەك كورسەتۋگە تىرىستى. قول ۇشىن سوزۋعا ەڭبەك ۇجىمدارى، دوستىق ۇيلەرى مەن ەتنومادەني بىرلەستىكتەر، جاستار ۇيىمدارى، ازاماتتىق اليانس ءبارى دە ءبىر كىسىدەي اتسالىستى، – دەدى دانيال احمەتوۆ. 

سونداي-اق ءىرى ساۋدا ورتالىقتارىندا «قايىرىمدىلىق سورەلەرى» ۇيىمداستىرىلىپ، تۇرعىندار شاما-شارقىنشا ازىق-تۇلىك پەن گيگيەنالىق زاتتاردى جيناسا، كۇرشىم اۋدانىندا وتكەن رەسپۋبليكالىق «جايدارمان» جاستار فەستيۆالىنەن تۇسكەن قارجى دا ارنايى شوتقا سالىنىپ، ارىسقا جىبەرىلدى.  

ىزگى ىستەن اۋداندار دا قالىس قالمادى. زايسان اۋدانى 40 تونناعا جۋىق ۇن جىبەرسە، گلۋبوكوەلىك كاسىپكەرلەر ءبىر تونناداي كۇنباعىس مايىن جيناپ بەردى. 

ايتا كەتەيىك، ارىستاعى اپاتقا بايلانىستى وبلىسىمىزدىڭ اۋدان ورتالىقتارى مەن قالالارىندا زارداپ شەككەندەرگە گۋمانيتارلىق كومەك كورسەتۋ ماقساتىندا 20-عا جۋىق كومەك قابىلداۋ پۋنكتى اشىلعان بولاتىن.