ارىستانبەك مۇحامەدي ۇلى جالاقىسى تۋرالى رەسمي مالىمدەمە جاسادى دەپ جازادى Qamshy.kz اقپارات اگەنتتىگى. بۇل تۋرالى ول ءوزىنىڭ فەيسبۋك پاراقشاسىنا جازدى. 

"دوستارىم، جالاقىمنىڭ قانشا بولاتىنى ءالى وزىمە دە بەلگىسىز بولىپ تۇرعاندا، ول تۋرالى جالعان اقپارات تاراپ كەتتى. 3 000 000 تەڭگە كولەمىندەگى ەڭبەكاقى - جالعان. مۇنداي شىندىققا جاناسپايتىن اقپارات تاراتۋ كىمگە پايدا اكەلەتىنىن بىلمەيمىن، fake news قولدان جاسالعانىنا كۇمانىم جوق. تىم اسىرە سىلتەپتى، باسقا نە ايتۋعا بولادى.

وزدەرىڭىزگە ايان، كوپتەن بەرى مادەنيەت سالاسى قىزمەتكەرلەرىنە جوعارى جالاقى بەرۋىن سۇرايتىنمىن. مينيستر قىزمەتىن اتقارعان بەس جىل ىشىندە وسى ماسەلەنى بىرنەشە رەت كوتەردىم. ەگەر وسىنداي اقپارات شىندىققا جاناسسا، ارينە قۋانار ەدىم، وكىنىشكە قاراي، بۇل ازىرگە مۇمكىن ەمەس. ادەتتەگىدەي سىزدەرگە شىنىمدى ايتايىن: مينيستر قىزمەتىن اتقارعاندا ەڭبەكاقىم 980 000 بولدى، 2015 جىلعى 31 جەلتوقسانداعى №1193 «ازاماتتىق قىزمەتشىلەرگە مەملەكەتتىك بيۋدجەت قاراجاتى ەسەبىنەن ۇستالاتىن ۇيىمداردىڭ قىزمەتكەرلەرىنە، قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» ق ر ۋكىمەتىنىڭ قاۋلىسى نەگىزىندە ۇلتتىق مۋزەي ديرەكتورى رەتىندە 172 436 تەڭگە ەسەپتەلىپ، قولىما 139 673 تەڭگە بەرىلەتىن بولادى. بۇل قىزمەتتەگى مەنىڭ ساناتىم «ا1-1»، ەڭبەك ءوتىلىم مامىر ايىن قوسا العاندا 31 جىل ءۇش اي بولدى.

سونىمەن، دوستارىم، نە شىقتى؟ ناعىز فەيك. جالعان اقپاراتتا مەنىڭ ايلىق جالاقىم رەتىندە كورسەتىلگەن سوما مەنىڭ ەڭبەكاقىمدى 95 % كوبەيتىپ، مەن 12 ايدا الاتىن 1 676 076 تەڭگەنى ەكى ەسەگە ارتتىرىپتى. بىزدە «ون ءۇشىنشى ەڭبەكاقى»، بونۋستار جوق. «كەزدەيسوق» ميلليوندارعا قاتەلەسىپ كەتىپتى...

مۇنداي جالعان اقپاراتقا سەنگەن ادامدار تابىلىپ، ولارعا تۇسىنىك بەرۋىم كۇلكىلى جاعداي. وسىمەن بۇل تاقىرىپتى تالقىلاۋدى دوعارايىق، اعايىن. مۇنداي ۇساق-تۇيەككە ۋاقىتىمدى ەندى كەتىرمەيمىن: اقىلدىلار وزدەرى تۇسىنەدى، اقماقتارعا تۇسىندىرە المايسىڭ. بارشاڭىزعا جاقسى كوڭىل-كۇي ءۇشىن راقمەت!"، - دەپ جازدى ارىستانبەك مۇحامەدي ۇلى.