ايتىسكەرلەر نەگە بيلىكتى سىنايدى؟ سەبەبى ولارمەن دۇرىس جۇمىس جۇرگىزىلمەگەن. وڭىرلەردى ارالاپ جۇرگەن «نۇر وتان» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك وسىلاي دەدى دەپ حابارلايدى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ.
ونىڭ پىكىرىنشە، ءقازىر ايتىستىڭ دەڭگەيى تومەن. ۇپاي جيناۋعا تىرىساتىندار كوپ.
بۇرىن ءوزى باسقارعان «نۇر وتانعا» قايتىپ كەلگەن باۋىرجان بايبەك جۇمىسقا بىلەك سىبانا كىرىستى. الدىمەن پارتيانىڭ حاتشىسى تامارا دۇيسەنوۆانى اۋىستىردى. باسپا ءسوز قىزمەتىندە دە كادرلىق وزگەرىس بولدى. 14 وبلىس پەن 3 مەگاپوليستىڭ اراسىنان ءبىرىنشى باتىس قازاقستان وبلىسىنا باردى. وڭىردەگى پارتيانىڭ جۇمىسى ناشارلاپ كەتكەن. حالىقتى تولعاندىرعان ماسەلە كوپ. نۇروتاندىقتار ونىڭ بارىنە نەمقۇرايلى قارايدى ەكەن.
"فراكسيانىڭ جۇمىسى كوڭىلدەن شىقپايدى. وزەكتى ماسەلەلەردى قاراستىرمايدى. قاراپايىم سۇراقتاردان باستاۋ كەرەك. ءماسليحاتتاعى دەپۋتاتتاردىڭ باسىم كوبى نۇر وتان پارتياسىنىڭ مۇشەلەرى. ولار بيۋدجەتتى، باعدارلامالاردىڭ ورىندالۋىن قاداعالاپ وتىرۋى قاجەت. اكىمدەر دۇرىس جۇمىس ىستەمەسە ونى دا ءبىر جاعىنا شىعارۋعا بولادى"، -دەدى "Nur Otan" پارتياسى ءتوراعاسىنىڭ ءبىرىنشى ورىنباسارى باۋىرجان بايبەك.
جەرگىلىكتى اتقارۋشى بيلىكتىڭ جۇمىسىن قاداعالاۋدى كۇشەيتەمىز دەيدى. سونداي-اق، «نۇر وتان» ۇلتتىق ونەر، ايتىستى دا قولعا الماق. سەبەبى، رۋحانيات سالاسى دا ۋىستان شىعىپ، اقىندار بەت-بەتىمەن كەتكەن.
"ەڭ ءبىرىنشى قولعا العان ءىسىڭىزدىڭ ءبىرى ۇلتتىق ونەر، ونىڭ ىشىندە ايتىستى قولداۋ بولدى. ءبىراق سىرت كۇشتەر وسىنىوزىنە قولدانىپ كەتىپ جاتقانىندا كورىپ ءجۇرمىز. الداعى ايتىس تۋرالى جوسپارىڭىزدى بىلگىم كەلەدى" - دەپ سۇراق قويدى مۇحتار نيازوۆ.
"كەزىندە ايتىسكەرلەر ۇلكەن ساحنادان نۇر وتان تۋرالى ايتىپ، حالىققا ونى جاقىن كورسەتكەن بولاتىن. سوڭعى سايلاۋدا وزدەرىڭىز بىلەسىزدەر، كەيبىر ايتىسكەرلەر بيلىككە قارسى شىقتى. نەگە، ولارمەن ناقتى جۇمىس جۇرگىزىلمەگەن. قازىرگى كەزدە كەيبىر ايتىسكەرلەردىڭ دەڭگەيى تومەن. جالپى اڭگىمەنى ايتادى، حالىققا ۇناۋ ءۇشىن. ۇپاي جيناۋ ءۇشىن"، - دەدى باۋىرجان بايبەك.
باۋىرجان بايبەكتىڭ سوزىنشە، ەندى «نۇر وتان» بۇرىنعىداي مۇلگىپ وتىرمايدى. الەۋمەتتىك جەلىدە بەلسەندىلىكتى ارتتىرىپ، ەل-جۇرتتىڭ كەز-كەلگەن ماسەلەسىنە رەاكسيا تانىتىپ، ۋاقىت تالابىمەن بىرگە وزگەرەمىز دەيدى.
پىكىر قالدىرۋ