2020 جىلدىڭ 1-قاڭتارىنان باستاپ مىندەتتى مەديسينالىق ساقتاندىرۋ جۇيەسىنىڭ ىشكەرىلەندىرىلۋى ارقاسىندا بالالارعا ارنالعان دارى-دارمەكتەر تەگىن بولماق. بۇل تۋرالى دەنساۋلىق ساقتاۋ ءمينيسترى ەلجان ءبىرتانوۆ مالىمدەدى دەپ جازادى Qamshy.kz اقپارات اگەنتتىگى.
"كەلەسى جىلدان باستاپ الەۋمەتتىك مەديسينالىق ساقتاندىرۋ ەسەبىنەن بالالارعا بەكىتىلگەن دارى-دارمەكتەر تەگىن بولادى. ءبىز ءارى قاراي تەگىن دارى-دارمەك بەرىلەتىن ازاماتتاردىڭ ءتىزىمىن كەڭەيتە تۇسپەكپىز"، - دەدى مينيستر.
ەلجان ءبىرتانوۆتىڭ ايتۋىنشا، رەسەپت ارقىلى بەكىتىلەتىن دارىلەردىڭ جالپى نارىقتىق قۇنى – 300 ميلليارد تەڭگە. وسى كورسەتكىشتىڭ ۇشتەن ءبىرى عانا مەملەكەت ەسەبىنەن تولەنەدى.
"مەملەكەت كەلەسى باعىتتاردى دارى-دارمەكپەن قامتاماسىز ەتپەك: بالالار اۋرۋى، ونكولوگيالىق اۋرۋلار، تۋبەركۋلەز جانە پسيحياتريا. كەلەسى جىلدان باستالاتىن بۇل جەڭىلدىكتى ءقازىر قولدا بار قارجى ارقىلى ەكى جىل قامتاماسىز ەتە الامىز"، - دەدى ءبىرتانوۆ.
سونداي-اق، مينيستر قازىرگى ۋاقىتتا ازاماتتاردىڭ ەلەكتروندى مەديسينالىق كارتاسى ىسكە قوسىلىپ جاتقانى تۋرالى ايتتى. ونىڭ ايتۋىنشا، ازاماتتار ەلەكتروندى مەديسينالىق كارتا ارقىلى وزدەرىنىڭ وسى ۋاقىتقا دەيىن قايدا ەمدەلگەنىن جانە قانداي دارىلەر قابىلداعانىن بىلە الادى.
پىكىر قالدىرۋ