قالا اكىمى 2019 جىلدىڭ قاڭتار-مامىر ايىندا جۇرگىزىلگەن جۇمىستارعا توقتالىپ، وسى ۋاقىت ارالىعىندا قۇرىلىس جۇمىستارىنىڭ كولەمى 17،44 ملرد. تەڭگەنى قۇراعانىن مالىمدەدى. بۇل كورسەتكىشتى جىل سوڭىنا دەيىن ءالى دە ۇلعايتۋ ءۇشىن جۇمىستار جۇرگىزىلۋدە.

ال جالپى اۋدانى 278،7 مىڭ شارشى مەتر تۇرعىن ءۇي پايدالانۋعا بەرىلگەن. «7-20-25 يپوتەكالىق» باعدارلاماسى بويىنشا جىل باسىنان بەرى 410 ءوتىنىم ماقۇلدانعان. سونىمەن قاتار، جيىن بارىسىندا كوپقاباتتى ۇيلەردەگى ليفتىلەردىڭ ماسەلەسى كوتەرىلدى. ستاندارتقا سايكەس، ليفتىلەردىڭ جۇمىس جاساۋ مەرزىمى 25 جىل بولسا، بۇگىنگى تاڭدا ەكى ليفتىلىك ۇيلەردىڭ ءبىر ليفتىلەرى عانا اۋىستىرىلعان. قاۋىپسىزدىك ءۇشىن كەيبىرىن شۇعىل تۇردە جوندەپ نەمەسە اۋىستىرۋدى تالاپ ەتەدى. وسى تۇستا ماڭعىستاۋ وبلىسىنىڭ اكىمى سەرىكباي ترۇموۆ ىستەن شىققان ليفتىلەردى اۋىستىرۋ ءۇشىن جەرگىلىكتى بيۋدجەتتەن قارجى بولىنەتىنىن اتاپ ءوتتى.

كەڭەس كەزىندە ايماق باسشىسى كەڭىنەن توقتالعان تاعى ءبىر ماسەلە قالاداعى قۇرىلىس جۇمىستارى. ياعني، جاڭادان بوي كوتەرەتىن عيماراتتاردا زاڭعا سايكەس بولۋ، ساۋلەتىنە نازار اۋدارىپ، ينفراقۇرىلىم جاعىن ءبىرىنشى رەتتە قولعالۋ كەرەكتىگىن اتاپ ءوتتى. سونداي-اق، ول عالىمجان نيازوۆقا ءبىرقاتار ناقتى تاپسىرمالار بەردى. اتاپ ايتار بولساق، بيۋدجەت قاراجاتىن ۇنەمدەۋ جانە ءتيىمدى پايدالانۋ، قالا تازالىعى مەن كوگالداندىرۋ جۇمىستارىن جۇيەلى تۇردە ۇيىمداستىرۋ، قوعاممەن اشىق بايلانىس ورناتۋ ماقساتىندا ازاماتتاردىڭ وتىنىشتەرىن ۋاقىتىلى قابىلداۋ ءارى تۇرعىندارمەن تۇراقتى تۇردە كەزدەسەتىن شارالاردى ءجيى وتكىزۋدى ەسكەرتتى.